Je, Emery de Caen, Capitaine de la Marinne, commandant le
navire nommé le _Don de Dieu_, suivant le congé qu'il a pleu à
Monseigneur le Cardinal de Richelieu, Grand Maistre, Chef & sur
Intendant de la Navigation & Commerce de France, donner au
sieur Guillaume de Caen, cy devant Général de la flotte de la
Nouvelle France, pour envoyer un navire à ladiste Nouvelle,
traister avec les sauvages, recepvoir les debtes qu'il luy
seroyent deubz, ledist sieur de Caen s'il en auroit donné le
commandement, & estant arrivé à l'isle d'Orléans, près
l'habitation de Québec, audist païs. J'aurois envoyé Jacques
Cognard, sieur de l'Espinay, porter la coppye de mon dist congé
à une signification dudist sieur de Caen, ensemble ma
signification & protestation au bas, en datte du quatriesme
jour de Juillet mil six cens trente un, au Capitaine Louis
18/1430 Kearke, Commandant pour le Roy de la Grand Bretagne, du fort &
habitation du dist Québec, lequel m'avoit mandé pouvoir venir
par ma commission, ce que j'aurois faist, & trois jours après
mon arrivée audict lieu il m'auroit faist mettre noz voilles,
mousquets & piques dans la dicte habitation. Et ayant parlé par
plusieurs fois audist sieur Gouverneur & aux commis de la
compagnye d'Angleterre, pour nous accorder pour faire la
Traitte par ensemble pour esvitter aux desordres qui eussent
peu arriver. Nous aurions en fin traitté l'un avec l'aultre
pour pain, poix & aultres marchandises, des Castors & peaux
d'orignal passez & grains de pourcelaine, lesquels castors &
peaux ont esté mis en leur magasin pour les separer entre eux &
nous. Et ne m'auroyent desfendu la traitte ny donné
empeschement jusques au jour d'hier que les Hurons sont arrivez
avec quantité de castors & aultres peletries, ilz m'auroyent
envoyé leur principal commis, nommé Jehan Loo, me signifier une
article comprise dans l'ordre qu'ilz ont de leur compagnye,
signée de Monsieur le chevallier Guillaume Alexandre & le
Capitaine David Kearke, cy devant général de la flotte Angloise
pour le dist païs, pour & au nom de toute la compagnye, par
laquelle ilz ordonnent de prendre & saisir tous navires qui
traitteroyent dans le dist païs. Et prendre leurs castors
jusques à fin de traitté, & auroyent mis dans mon dit navire &
barque plusieurs de leurs gens sans m'avoir laissé aulcun
exploict de la dicte signiffication, pour m'empescher de
traitter mes marchandises avec lesdistz sauvages. Et deffence à
moy de ce faire, encore que je leur aye remonstré & dit que le
païs appartenoit au Roy mon souverain Seigneur & Maistre, Et
que j'avois droist de traitter sans aucun contredit ny
empeschement, suivant ma commission de mon dit Seigneur le
Cardinal, & qu'ilz ne me montroyent aucune commission du Roy de
la Grande Bretagne, pour me prendre, & empescher la traitte,
eux ayans la force à la main, & desirant entretenir le pais, de
ma part ay protesté cy devant & de rechef proteste pour le
susdict Général de Caen & assossiez contre le sieur Gouverneur
Kearke, & capitaine des vaisseaux leurs bourgeois &
adventureurs en général, & chacun en leur propre & privé nom,
de les faire respondre de tous despans, domages & interestz
soufferts & à souffrir pour l'arrest & empeschement qu'ilz me
font de la vente & traitté de mes marchandises dont je leur en
donneray facture, comme de la prinse des castors que j'avois
traittés cy devant. Faist dans le navire nommé le _Don de
Dieu_, devant le fort & habitation de Québec, le vingt
deulxiesme jour d'aoust mil six cens trente un, presence de
Michel Morieu, Maistre dudist navire, Jacques Cognard sieur de
l'Espinay, Olivier le Tardif, Jacques Barbault & Jacques
Ferment, officiers du dist navire. Signé Emery de Caen, Michel
Morieult, de l'Espinay, Tonnent, Jacques Barbault, Charles
Mons, Dereau dit St Amours, le Merc de Jean Hanin, Chalot
Poullain de Mury, Le Juif, Pierre Rousseau, Le Tardif, Le Merc
de Jehan Crocquet, Jehan Tontain & le Merc de Nicolas Gomme.
(_State Paper Office, Colonial Papers_, vol. VI, art. 23.)
19/1431