Le quinziesme de May[512], une barque estant preste l'on la mit
à l'eau, qui fut chargée de vivres, pour traitter avec les
Sauvages de Tadoussac. Le Mons commis s'embarqua en icelle luy
huictiesme, & en son chemin fit rencontre d'une chalouppe, où
estoit le Capitaine du May, & Guers, Commissionnaires de
monseigneur de Montmorency, avec cinq matelots, trois soldats,
& un garçon, qui fut cause que nostre commis retourna sur sa
9/993 route, & s'en revinrent ensemble à nostre habitation. Ledit du
May fut très-bien receu, venant de la part de mondit seigneur
de Montmorency, lequel me dit estre venu devant, en un vaisseau
du port d'environ trente cinq tonneaux, avec trente personnes
en tout, pour me donner advis de ce qui se passoit en France, &
que proche de Tadoussac, il avoit fait rencontre d'un petit
vaisseau volleur de Rochelois, de quarante cinq tonneaux, & en
avoit approché de si prés, qu'ils s'en tendoient parler, estans
l'un & l'autre sous voiles: Mais comme le Rochelois estoit
meilleur voilier, il se sauva. Ce fut une belle occasion
perdue, par ce que ceux qui estoient dedans avoient traitté
nombre de peleteries.
[Note 512: Il est évident, par le contexte, que c'est le 15 mai 1621.]
Ledit Guers me donna les lettres qu'il pleut au Roy & à
Monseigneur me faire l'honneur de m'escrire, accompagnées de
celle de Monsieur de Puisieux, & autres, des sieurs Dolu, de
Villemenon & de Caen. Voicy celle du Roy.
«Champlain, j'ay veu par vos lettres du 15 du mois d'Aoust,
avec quelle affection vous travaillez par delà à vostre
establissement, & à ce qui regarde le bien de mon service,
dequoy, comme je vous sçay très-bon gré, aussi auray-je à
plaisir de le recognoistre à vostre advantage, quand il s'en
offrira l'occasion: & ay bien volontiers accordé quelques
munitions de guerre, qui m'ont esté demandées, pour vous donner
tousjours plus de moyen de subsister, & de continuer en ce bon
devoir, ainsi que je me le promets de vostre soing & fidelité.
10/994 A Paris le 24e jour de Fevrier 1621.