Adiaŭ, ho belulino!
L'armeo al la fronto
Foriras; se mi haltus,
Eterna estus honto.
Ne ploru! mi spereble
Revenos, ho anĝelo!
Aŭ, en batal' mortinte,
Vin vidos en ĉielo.
La glavon, la pafilon,
Mi portas, kaj pistolojn;
Je l'sunleviĝ' mi diros
La adiaŭparolojn.
Turnestron mi surmetis,
Per tuta prepareco!
Mi, vir' kaj militisto!
Vivu la libereco!
Militi mi ne iros
Kontraŭ patrujaj bandoj!
Sed la fremdulojn peli
El la Italaj landoj.
De longe per tiranoj
Ni estas suferantaj;
Mi iras Lombardion
Kontraŭ la subpremantoj.
Ho! la pasioj estas
Teruraj; sed la morto
Por gajni liberecon
Estos belega sorto.
Kun tiom da aliaj
Mi ankaŭ mortos--eble--
Sed ne maltrankviliĝu!
Mi mortos honoreble.
Se mankus la novaĵoj
Pri via vir' amanta,
Per kuglo mortigita,
Ne estu sopiranta.
Mi ne vin lasos sole;
Ĉar restos la trezoro;
Kaj li sin konsolados;
La fil' de mia koro.
Jen! la trumpet'! l'armeo.
Foriras; ne min tenu!
Al filo kison donu,
Kaj libereco venu!