Antaux miloj da jaroj la hxinoj estis la plej klera nacio en la mondo.
Dum aliaj nacioj ankoraux ne konis metodojn por presi librojn, kaj
ankoraux faris ilin skribe, la samtempaj hxinoj jam estis forlasintaj
tiun multekostan kaj tedan metodon. Ili jam estis presantaj la pagxojn
de miloj da libroj. Aliaj nacioj tiam estis batalantaj kiel eble plej
kruele, per sago kaj pafarko, kaj per lanco. Sed ili ankoraux ne havis
pafilojn, cxar pulvo estis tute nekonata al ili. Tamen la hxinoj jam
bone konis metodojn por fari kaj por uzi pulvon, kaj faris tiajn amuzajn
flavrugxajn fajrojn, kiajn ni ankoraux hodiaux acxetas de ili, por uzi
je festaj tagoj. Sed la hxinoj ne multe sxatis la komercon, kaj ne
deziris acxeti aux lerni de aliaj nacioj. Ili ankoraux nun havas la
samajn metodojn por presi librojn kaj por fari pulvon, kiajn ili havis
antaux mil jaroj. Ili malofte sxangxas siajn kutimojn. Tial la aliaj
nacioj, kiuj antauxe ne estis tiel kleraj, antauxeniras pli rapide ol
la hxinoj. La lando de la hxinoj enhavas tiom da personoj, kiom tri aux
kvar aliaj nacioj. Granda parto de tiu lando estas ankoraux nekonata al
okcidentaj nacioj, kvankam plej multe da nia teo elvenas el la hxina
lando. Oni diras ke la parolata lingvo kaj la skribata lingvo de la
hxinoj estas du tre malsamaj aferoj. La lingvo estas almenaux treege
malfacila, kaj post kiam oni estas longe studinta gxin, oni tamen estas
nur duone lerninta gxin. Mi gxojas tial ke la lingvoj studataj en la
lernejoj de nia lando ne estas tiel malfacilaj kiel la hxina lingvo. La
latina kaj germana lingvoj estas suficxe malfacilaj, kvankam ili estas
tre interesaj kaj ankaux konataj de la kleruloj en multaj landoj. La
latina lingvo jam ne estas parolata lingvo.