Philippe le Long autorise les oubliers de Paris à rétablir la confrérie
fondée par eux en l’honneur de saint Michel.
Janvier 1321 (n. s.).
Philippus, etc..... Cum igitur nebularii ville Parisiensis a longe
retroactis temporibus confratriam inter se tenere et habere in honore
gloriosi Dei archangeli sancti Michaëlis consueverint, que postmodum
per carissimum dominum et genitorem nostrum, sicut et cetere confratrie
ville nostre Parisiensis predicte, certis ex causis fuit teneri
prohibita, prefati nebularii nobis humiliter supplicaverunt, ut tenendi
et habendi inter se dictam confratriam, modo quo alias tenere ipsam et
habere consueverant, sibi licenciam concedere dignaremur. Nos igitur,
attendentes quod cause propter quas idem dominus et genitor noster
dictas confratrias teneri prohibuit, cessant omnino, et jam diu est
cessaverunt, prefatis nebulariis, ipsorum in hac parte supplicationibus
inclinati, ob ipsius gloriosissimi archangeli, cui ab eodem domino
Jeshu Christo fidelium animas in lucem sempiternam representandi est
collata potestas, reverenciam et honorem, tenendi et habendi dictam
confratriam de cetero inter se, sicut alias consueverant, licenciam
concedimus per presentes, necnon, cum super aliquibus que suarum
salutem animarum et dicte confratrie utilitatem prospexerint agere
vel tractare habuerint, possint in aliquo loco Parisius honesto
convenire, ut conferentes insimul ipsi sibi subvenire studeant auxiliis
opportunis, et sic ex bonis operibus caritatis fraterne splendeant
apud Deum et homines, quod ceteri pios actus eorum considerantes
glorificent patrem suum celestem et ad consimilium operum excercicia
propensius animentur. Volumus tamen quod, quociens insimul convenire
voluerint[1181], prepositus noster Parisiensis aut deputatus ab eo,
pro omni evitando scandalo, eorum congregationi presens intersit. Quod
ut firmum..... Datum et actum Parisius, anno Domini Mº CCCº vicesimo,
mense Januarii.
(Trésor des Chartes, reg. 60, pièce 3.)