Sheffield, 9 juillet 1574.
«Monsieur de Glasco, pour le present je ne vous diray sinon que, Dieu
merssy, je me porte mieulx que d'avant mes bayns, durant lesquels je
vous escrivis. Au reste, je vous prie me faire recouvrer des
tourtelles et de ces poules de Barbarie, pour voir si je pourray les
faire eslever en ce pays (comme vostre frère m'a dit que vous en aviez
faict nourrir en cage, et des perdrix rouges chez vous), et despescher
quelqu'un jusqu'à Londres pour les apporter, qui m'enverra
l'instruction. Je prendrois plaisir de les nourrir en casge, comme je
fays de tous les petits oiseaux que je puis trouver. Ce sont des
passe-temps de prisonnière, et mesmes pour ce qu'il n'y en a pas en ce
pays. Je vous ay escrit il n'y a pas longtemps; je vous prye, tenez la
main que mon intention soit suivie, et je prieray Dieu vous avoir en
sa garde.
«Vostre bien bonne mestresse et amie,
«MARIE, R.»