Sheffield, 18 juillet 1574.
«Si vous avez congé de m'envoyer quelqu'un avecques mes comptes,
envoyez Jean de Compiegne, et qu'il m'apporte des patrons d'habits et
eschantillons de draps d'or, d'argent et soye, les plus jolis et rares
que l'on porte à la cour, pour là-dessus entendre ma volonté. Faytes
moy faire à Poissy une couple de coiffes à couronne d'or et d'argent,
telles qu'ils m'en ont aultrefoys faictes; et que Breton se souvienne
de sa promesse, qu'il me fasse recouvrer d'Italie des plus nouvelles
façons des coiffures et voiles et rubans avecques or et argent, et je
l'en feray rembourser.
«Souvenez-vous des oiseaux dont je vous ay escrit dernièrement, et
communiquez la présente à Messieurs mes oncles, et leur priez de me
fayre part de quelques unes des nouveautés qui leur viendront, comme
ils font à mes cousines; car bien que je n'en porte, elles seront
employées en meilleur lieu. Et pour fin, je requiers Dieu qu'il vous
donne, Monsieur de Glascou, bonne et longue vie.
«Vostre bien bonne amye et mestresse,
«MARIE, R.»