By proces, as ye knowen everichoon,
Men may so longe graven in a stoon, 830
Til som figure ther-inne emprented be.
So longe han they conforted hir, til she
[486: T. 11145-11181.]
Receyved hath, by hope and by resoun,
The emprenting of hir consolacioun,
Thurgh which hir grete sorwe gan aswage; 835
She may nat alwey duren in swich rage.
And eek Arveragus, in al this care,
Hath sent hir lettres hoom of his welfare, (110)
And that he wol come hastily agayn;
Or elles hadde this sorwe hir herte slayn. 840
Hir freendes sawe hir sorwe gan to slake,
And preyede hir on knees, for goddes sake,
To come and romen hir in companye,
Awey to dryve hir derke fantasye.
And finally, she graunted that requeste; 845
For wel she saugh that it was for the beste.