(Vol. I, pag. 449.)
_Breve di papa Alessandro VI, col quale si ordina di formare la nuova
Congregazione Tosco-Romana_.[581]
Dilectis filiis salutem et apostolicam benedictionem. Reformationi
et augumento vestræ sacræ religionis, pro ut tenemur favorabiliter
attendentes, quæ omnium conditori gratissima, et pie devotioni
fidelium accepta est et fructuosa: libenter ad illa intendimus, per
quo utiliter et salubriter valeat provideri, quod laudabiliter ritus,
mores et observantia regularis in omnibus domibus vestri ordinis,
continue vigeat et prosperum suscipiat, adiuvante Domino, incrementum.
Huiusmodi, igitur, pio desiderio inducti, ac sperantes quod si Domus
S. Mariae de Querqua æxtra muros Viterbienses, S. Spiritus de Senis,
S. Catherine de Pisis, S. Sabine de Urbe, nec non S. Dominici de
S. Geminiano ordinis vestri, quæ congregationi Fratrum Lombardiæ
unitæ et incorporatæ aliquandiu permanserunt, si a congregatione
predicta et illius vicarii et prælatorum in presentia separarentur, ac
statueretur quod tam predictæ quam etiam alie Domus vestræ, S. Mariæ
supra Minervam de Urbe, S. Mariæ ad Gradus Viterbiensis, S. Dominici
de Perusio, S. Dominici Cortonensis, S. Agnetis Montis Politiani,
S. Marci de Florentia, S. Dominici de Fesulis, S. Mariæ de Saxo
nec non S. Dominici Pratensis, et S. Romani de Luca et S. Dominici
Pistoriensis vestri ordinis Domus, et vos nunc et pro tempore degentes
in eis, Priores et Fratres, unam aliam congregationem in vicem fratrum
_Romanæ et Thusciæ provinciæ_, ex more dicti ordinis nuncupandam, sub
unius proprii vicarii degentium, constituere exinde profecto salubris
propagatio ritus et mores observantiæ regularium instituere dicti
ordinis domibus, et eorum fratribus proveniret. Præsertim cum dictæ
Domus invicem in magna existant propinquitate, et commode a suo vicario
visitari, Fratresque in ipsis degentes ad eum faciliter sese conferre,
et suis opportunitatibus subvenire possunt, juxta vestrarum seriem
costitutionum.
Motu igitur proprio, non alicuius nobis oblate petitionis instantia,
sed de nostra mera liberalitate et ex certa scientia, S. Mariæ
de Querqua, S. Spiritus Senensis, S. Dominici de S. Geminiano, S.
Catherinæ de Pisis, S. Sabinæ de Urbe domus, et vos nunc et protempore
degentes in eis Priores et fratres, a congregatione predicts Lombardiæ
et illius vicarii et Prelatorum obbedientia segregamus et separamus.
Nec volumus per hoc detrimentum aliquod sive damnum gravari aut quoquo
modo provenire præfatis domibus. Ac etiam apostolica autoritate
statuimus, ut de cetero, perpetuo futuris temporibus, tam prefatæ
S. S. C. per nos a dicta congregatione separatæ, quam aliæ domus
predictæ in dicta _Romana et Thuscia provincia_ consistentes; et vos
nunc et protempore in eis degentes Priores et Fratres, insimul unam
novam congregationem fratrum regularis vite observande _Romanæ et
Thusciæ provinciæ_ nuncupandam constituatis, Magistroque Generali
et unius eiusdem congregationis Vicarii obbedientiæ subiciamini, qui
hac prima vice, per venerabilem fratrem nostrum Olivierum episcopum
Sabinensem, cardinalem Neapolitanum, cum consilio dilecti filii
Generalis Magistri Vestri ordinis, pro biennio nunc proxsimo futuro,
deputetur; et huiusmodi biennio illasso statim ab officio vicariatus
censeatur absolutus, et singulis biennis perpetuis suis temporibus, a
prioribus et sociis et aliis electoribus juxta formam Constitutionum
vestri ordinis, positam in capitulo de electione prioris provincialis,
eligatur: quæ electio per Magistrum Generalem confirmetur nec alius
Vicarius possit institui; nisi qui sit per Congregationem prima vice et
legiptime electus, ipseque vicarius in dictæ congregationis domos, et
illarum Priores et Fratres, pari quam prior provincialis in domos et
fratres suæ provinciæ, superioritate, jurisdictione et preheminentia
ac potestate fungatur. Et quolibet anno, priores dictarum domorum
cum eorum sociis ad congregationem vocare et dictas domos et in eis
degentes Priores et Fratres, vel legiptime impeditus per alium in
capitibus et membris visitare teneatur et debeat: nec possit in sui
Vicariatus officio, finito biennio, quoquomodo confirmari, aut de novo
in Vicarium eligi infra biennium, tunc proxime futurum. Nec etiam
interim, ab officio sui vicariatus, nisi per eamdem congregationem
absolvi, aut eidem congregationi alius qui per congregationem ipsam
electus in vicarium vel vice vicarium, sive locum tenentem eius:
aut sub quovis alio nomine eiusdem congregationis præfici. Quod si
contingat ipsum in vicariatu suo ab hac vita migrare, tunc Prior
Domus S. Mariæ supra Minervam vices eius in omnibus obtineat,
teneaturque infra menses sex vocare Priores antiquorum domorum
dictæ Congregationis, de quorum consilio determinabit quando prefata
electio fieri debeat, et quousque alius electus fuerit et confirmatus,
eius autoritate in omnibus fungatur. Ipse vicarius tamen et electos
confirmet.
Mandamus insuper, et districte precipimus in virtute S. obbedientiæ
universis et singulis fratribus ad dictas domos quoquomodo
pertinentibus: et qui de dicta provincia sint oriundi ad ipsam
_Congregationem Thusciæ et Romanæ provinciæ_, omni excusatione
postposita, illico revertantur; nec aliquis Frater ipsius
Congregationis inde discedere possit, absque ipsius Vicarii expressa
licentia. Concedimus preterea motu et scientia simillibus vicario,
Domibus et Fratribus dictæ _Congregationis Romanæ et Thusciæ Provinciæ_
et qui pro tempore erunt, ut omnibus et singulis prorogativis,
privilegiis, gratiis, immunitatibus, et donis ac indulgentiis et
indultis spiritualibus et temporalibus congregationi præfate Lombardiæ
et illius Vicario domibus et Fratribus per nos in genere et a Sede
Apostolica vel alias quomodolibet concessa: et quibus Congregatio
predicta et eius vicarii domus et fratres ingenere utuntur, potiuntur
et gaudent, ac uti imposterum poterint et gaudere, uti, potiri, gaudere
libere et licite valeant. Proinde ac si pro ipsa Congregatione _Romanæ
et Thusciæ provinciæ_, ac illius Domorum vicario et fratribus eque
principaliter emanassent, quibus etiam salvis, non intelligatur per
ea derogatum superioritati Magistri vestri ordinis Generalis et vestræ
in eum subiectioni, non obstantibus costitutionibus et ordinationibus
apostolicis, ac dictæ congregationis Lombardiæ, aut alicui ex prioribus
et domibus prædictis _Romanæ et Thusciæ_ provinciæ, concessis literis
etiam in forma brevis, et privilegiis quibus illa est, si de eis
eorumque totis tenoribus de verbo ad verbum, sive quavis alia expressio
habenda est et in eis quævis clausulæ derogatariarum derogationis
fortiores et insolitæ continerentur in his præsentibus, pro expressis
habentes ac vice dumtaxat illis alias in suo loco permansuris. Quoad
premissa specialiter et expresse derogamus ceterisque contrariis
quibuscunque. Volumus insuper, et præsentium tenore, in virtute S.
obbedientiæ districte precipiendo, sub excomunicationis latæ sententiæ
pœna mandamus universis et singulis cuiuscumque conditionis, status,
dignitatis, gradus existentibus; quatenus præsentibus nostris literis
nullo modo, per se vel per alium, directe, vel indirecte seu quovis
titulo aut quesito colore, condicere, sive impedimentum prestare
audeat aut praesumat, decernentes etiam irritum et inane si secus
supra premissis aliquorum premissorum scienter vel ignoranter a quoquam
contingent detentari. Datum Romæ, apud S. Petrum, sub anulo Piscatoris.
Die VII novembris 1496. Pontificatus nostri anno VI.
Dilectis filiis S. Mariæ supra Minervam de Urbe, S. Mariæ ad Gradus
Viterbiensis, S. Mariæ ad Quercam extra muros viterbienses, S. Spiritus
Senensis, S. Catherinæ de Pisis, S. Sabinæ de Urbe, S. Dominici de S.
Geminiano, S. Marci de Florentia, S. Dominici de Fesulis, S. Dominici
de Pistorio, S. Dominici de Prato, S. Romani de Luca, S. Agnetis de
Monte Politiano, S. Dominici de Perusio, S. Marie de Saxo, Prioribus et
Fratribus cum eis degentibus.