Sanctissime Pater etc.
Fuit apud nos, per multos jam annos, Frater Hieronymus Savonarola,
prædicator insignis, ea doctrina, religione, moribus, integritate
vitæ, ut non ipse solum, verum etiam nomen ejus apud nos in maxima
veneratione sit. Is multa et magna universo huic populo documenta
dedit, multa induxit bona, quæ ad honeste sancteque vivendum plurimum
profuerant. Hæc autem attestamur Sanctitati Vestræ, beatissime Pater;
quoniam intelleximus crimina quædam in fratrem ipsum Hieronymum
calumniose conjecta fuisse, quæ multo esse a veritate aliena, quanto
nos certe scimus Sanctitati Vestræ in testimonium veritatis reticere
non possumus. Existimamus, autem, Sanctitatem Vestram pro solita sua
humanitate incredibilique benignitate, et fidem nobis adhibituram et
id quod universo populo nostro ad bonos mores, ad pacem et concordiam,
ad animarum salutem plurimam confert, a nobis non remoturum. Speramus,
itaque, Sanctitatem Vestram, iis intellectis, et Fratrem Hieronymum
apud nos permanere permissuram; et conventus Sancti Marci de Florentia
ac Sancti Dominici in Monte Fesulano ab congregatione Lombardiæ olim
separatos, et nunc incredibili quadam vitæ integritate ac religionis
sanctitate degentes, in eodem statu, cum inde multa quotidie immensaque
bona nobis proveniant, conservaturam; quo mihil gratius in præsentia,
et quo magis lætaremur ab Sanctitatis Vestræ benignitate concedi
posset. Cui nos etc. Ex Palatio nostro, die 17 septembris 1495.[498]