_Apocalypsis Jesu Christi_. Pro dicendis faciam fundamentum Hieronymi
dicentis ad Paulinum: Apocalypsis tot habet sacramenta quot verba etc.
Ergo oportet duo vitare, scilicet nimium cursum, et nimiam tarditatem;
ne ergo sim tardus, relinquam tot divisiones, argumenta, pompas,
auctoritates, etc.; similiter quæstiones extravagantes; et aggrediar
secundum Scripturas et doctores, et forte quid novi inveniemus; non
enim potuerunt metere usque ad solum, et colligere spicas remanentes,
ut dicitur in Levitico. Ergo et nos aliis relinquemus etc.
Primo ponit titulum et suprascriptionem; 2º Salutationem; 3º
Narrationem. In primo vide sex: scilicet materiam revelationis,
ordinem, certitudinem, brevitatem, manifestationem, et eorum quibus
manifestatur felicitatem; et declara primo: quod materia est iis
quæ a solo Deo sciri possunt, quia est solus æternus; unde dic quod
est æternitas secundum Boethium, et mulieribus dic quod est Deus.
Viris discurre per vitas, et ostende quod sola vita Dei est perfecta
possessio etc.; doctis vero ne declara subtiliter, sed excusa etc.,
et reprehende divinos; deinde, ostende quo ordine veniunt ad nos
revelationes et cæteræ partes, per ordinem etc.
Secundo ponit salutationem; sed personam salutantem non oportet
laudare. Dic autem de numero septenario, et quod Asia significat
elationem; et hic declara intentionem libri, quibus scilicet scribit,
et move quæstionem quia videtur quod Deus dulcis non debet tribulare
amicos. Unde Job conqueritur c. 30: _mutatus es mihi in crudelem_ etc.
Sed dic quod est magna superbia non acquiescere huic argumento: Deus
fecit, ergo bonum; Deus dixit, ergo verum etc.; vel huic: tribulavit
proprium filium pro nobis, ergo et amicos, ut faciet eos similes ei
etc.
Vis adhuc rationem humanam? Audi: duæ sunt in anima potentiæ, una
videns, alia cæca; voluntas, enim, sequitur intellectum per viam duorum
terminorum, scilicet, Creatoris et creaturæ; quando ergo creaturam
intelligit, quia eam in Creatore videt, errare non potest. Proba etc.
Sed e converso: vadens, aliquando videns pulchrum hospitium, remanet in
eo, sicut Lucifer; et plus homo, qui insensibilibus et intelligibilibus
manet. Ad quæstionem, ergo, dico: quod Deus ex vehementi amore
flagellat. Sic amans amicæ suæ vituperat alios amatores, vel etiam
interficit; vult enim cor amicæ totum uniri ad se etc. Applica
figuram etc. Similiter vas plenum igne non emittit ad superius
foramen ignem, si habeat ad pedes multas fenestras etc. Ergo Joannes
scribit: _elevatis per tribulationes_, _sicut erat Arca_ etc. Spe qua
tribulatur, ut verus amicus etc.