[527]En loquence étoit paisible[528] et abundant et appertement délivroit
et manifestait par paroles quanques il voulloit. Si n'avoit pas tant
seulement langue françoise[529], mais savoit plusieurs languages que il
avoit apris en son enfance[530]. Entre les autres avoit le latin si prest
et si à main qu'il le parloit aussi légièrement comme françois; mais le
grec entendoit-il mieux qu'il ne parloit. Si emparlé[531] et sage estoit en
parolles qu'il sembloit que ce feust un grant clerc et un grand maistre;
clerc estoit-il voirement; Car il fu introduis ès libérales sciences, si
comme nous dirons cy-après. Il escripvit lui-meisme les chans de diverses
chançons que l'en chante des fais et des batailles des anciens roys[532].
Il mist noms aux doze moys selon la langue Tyoise. Il mist noms propres aux
doze vens, car avant ce, ils n'estoient nommés que les quatre vens
cardinals.