Note 340: _Chetivoison._ Captivité.
En celle année meisme trespassa de ce siècle la royne Berthe mère du roy
Charlemaines, qui femme eut esté son père Pepin le roy. En la tierce yde de
juin mourut[341]. Dame estoit plaine de bonnes meurs et de doulce mémoire.
En sépulture fu mise en l'églyse mon seigneur saint Denis en France, coste
à coste du roy Pepin. Si couroit alors le temps de l'Incarnacion Nostre
Seigneur, sept cents quatre-vingt-quatre.
Note 341: La fin de l'alinéa est du traducteur, comme presque tous
les détails relatifs à la sépulture des personnes royales.
Le roy départit son ost et vint pour yverner en une ville qui a nom
Haristalle. Là célébra la sollennité de Noël et de Pasques.
[342]Quant la nouvelle saison fu venue, le roy assembla ses osts pour
ostoier en Sassoigne, et pour essaier s'il pourroit mettre à fin cette
guerre qui tant avoit duré. Le Rin trespassa à la fontaine de Lippie[343];
de là vint au fleuve de Wisaire, en un lieu qui a nom Huccubi, en dégastant
toutes les contrées de Westefalois. Ses heberges fist tendre, pour demourer
sur le fleuve. Mais en dementiers qu'il y demouroit, il apperceut qu'il ne
pourroit entrer en Sassoigne par devers Galerne[344], si comme il avoit
proposé, pour les eaues qui estoient crues pour les grans pluies qui eurent
esté. Pour ce tourna en Thoringe, à Charlot son fils laissa une partie de
son ost et luy commanda qu'il ne se esloignast de la contrée de Westephale.
Lors entra ès plaines de Sassoigne parmy Thoringe. Ces plaines sient entre
le fleuve d'Albe et un autre qui a nom Salan. Et puis qu'il fu entré en la
terre, il dégasta et destruisit tous les champs et les contrées des Saines,
partie en occist et partie en mit en chétivoison; les villes destruist et
ardit. A tant retourna en France.