Note 337: _Theomel._ Latin: _Thietmelle_. C'est encore _Dethmold_.
Après cette victoire se départit du champ et s'en ala à un lieu qui a nom
en leur langage Padrabone[338]. Là fist tendre ses heberges pour attendre
une partie de son ost qui à luy devoit venir.
Note 338: _Padrabone._ Paderborn.
Tandis qu'il demouroit encore en ce lieu, nouvelles lui vindrent que les
Saisnes qui de sa bataille estoient eschappés, à quanques ils povoient
avoir de secours de toutes pars, estoient assemblés ès contrées de
Witefale[339] sur une eaue qui a nom Hasan. Là se rapareillèrent pour
combatre de rechief contre luy, s'il alloit en ces parties. Quant le roy
eut oy ces nouvelles, il rassembla ses gens qui puis estoient à luy venus
de France, avec ceux que il avoit devant, et vint sans demeure au lieu où
ils estoient assemblés. A eus se combatit aussi benheureusement comme il
avoit fait devant, si que la plus grant partie en fut occise et l'autre
prise et mise en chétivoison[340]. Et François ravirent toutes leurs
despoilles et firent proie de quanques ils avoient. Premièrement vint au
fleuve de Wisaire et puis à un autre qui a nom Albe, en cerchant tout le
païs et le dégastant par feu et par occision. Et quant il eut toutes ces
contrées détruites il retourna vers France: Femme espousa qui avoit nom
Fastrade; Françoise estoit de nacion. Et après pou de temps elle conceut et
enfanta du roy deux filles.