_Coment il vint de rechief en Sassoigne, et coment il mena les Saisnes par
deus fois à soveraine desconfiture. De la mort la royne Hildegarde; des
espousailles la royne Fastrade; de la mort sa mère, la royne Berthe. Coment
il mut en Sassoigne par trois fois ou par quatre. Coment il se vengea des
François Orientels, qui contre luy s'estoient révélés par mauvais conseil_.
[336]Quant le printemps fu repairié et la saison renouvellée, le roy
s'appareilla de rechef pour ostoier en Sassoigne, car il avoit nouvelles
oïes que les Saisnes s'estoient révélés contre luy plus fièrement qu'ils
n'avoient oncques fait devant. Avant qu'il se départist de la ville où il
avoit iverné, fut morte sa femme Hildegarde en la seconde kalende de may.
Le roy fist enterrer le corps si comme il avoit proposé. Il entendit que
les Saisnes estoient assemblés en un lieu qui a nom Theomel[337], et qu'ils
s'appareilloient à bataille contre luy à tout leur effort. Vers celle part
tourna son chemin, si tost comme il peut. Bataille leur rendi, que pou en
eschappa de si grant nombre comme ils estoient que tous ne feussent occis.