Je partis de Rouen le 5 Mars[315] pour aller Honfleur, où je
m'embarquay(316), & le 7 May j'arrivay à Québec, où je trouvay
ceux qui y avoient hyverné en bonne disposition, sans avoir
esté malades, lesquels nous dirent que l'hyver n'avoit point
esté grand, & que la riviere n'avoit point gelé. Les arbres
commençoient aussi à se revestir de fueilles, & les champs à
s'esmailler de fleurs.
[Note 315: De l'année 1613. Pour plus amples détails, voir 1613, p.
283-287, et ci-après, ch. v.]
[Note 316: Il s'embarqua le lendemain, 6 de mars, dans le vaisseau de
Pont-Gravé. (1613, P. 287.)]
Le 13, je partis de Québec pour aller au Sault Sainct Louys, où
j'arrivay le 21[317]. Or n'ayant que deux canaux, je ne pouvois
199/855 mener avec moy que 4 hommes, entre lesquels estoit un nommé
Nicolas de Vignau, le plus impudent menteur qui se soit veu de
long temps, comme la suitte de ce discours le fera voir, lequel
autrefois avoit hyverné avec les Sauvages, & que j'avois envoyé
aux descouvertes les années précédentes. Il me rapporta à son
retour à Paris en l'année 1612. qu'il avoit veu la mer du nort.
Que la riviere des Algoumequins[318] sortoit d'un lac qui s'y
deschargeoit, & qu'en 17 journées l'on pouvoit aller & venir du
Sault Sainct Louys à ladite mer. Qu'il avoit veu le bris &
fracas d'un vaisseau Anglois, qui s'estoit perdu à la coste, où
il y avoit 80 hommes qui s'estoient sauvez à terre, que les
Sauvages tuèrent, à cause que lesdits Anglois leur vouloient
prendre leurs bleds d'Inde, & autres vivres, par force, & qu'il
en avoit veu les testes, qu'iceux Sauvages avoient escorchées
(selon leur coustume) lesquelles ils me vouloient faire voir,
ensemble me donner un jeune garçon Anglois qu'ils m'avoient
gardé. Ceste nouvelle m'avoit fort resjouy, pensant avoir
trouvé bien prés ce que je cherchois bien loin. Ainsi je le
conjuray de me dire la verité, afin d'en advertir le Roy, & luy
remonstray que s'il donnoit quelque mensonge à entendre, il se
mettoit la corde au col: aussi que si sa relation estoit
veritable, il se pouvoit asseurer d'estre bien recompensé. Il
me l'asseura encor avec serments plus grands que jamais. Et
pour mieux jouer son rolle, il me bailla une relation du pays,
qu'il disoit avoir faite au mieux qu'il luy avoit esté
200/856 possible. L'asseurance donc que je voyois en luy, la simplicité
de laquelle se le jugeois plein, la relation qu'il avoit
dressée, le bris & fracas du vaisseau, & les choses cy-devant
dites, avoient grande apparence, avec le voyage des Anglois
vers Labrador, en l'année 1612. où ils ont trouvé un destroit
qu'ils ont couru jusques par le 63 degré de latitude, & 290 de
longitude, & ont hyverné par le 53 degré & perdu quelques
vaisseaux, comme leur relation en fait foy[319]. Ces choses me
faisans croire son dire véritable, j'en fis dés lors rapport à
Monsieur le Chancelier[330]; & le fis voir à Messieurs le
Mareschal de Brissac, & President Jeanin, & autres Seigneurs de
la Cour, lesquels me dirent qu'il falloit que je veisse la
chose en personne. Cela fut cause que je priay le sieur
Georges, marchand de la Rochelle, de luy donner passage dans
son vaisseau, ce qu'il fit volontiers; où estant, il
l'interrogea pourquoy il faisoit ce voyage. Et d'autant qu'il
luy estoit inutile, il luy demanda s'il esperoit quelque
salaire, lequel fit response que non, & qu'il n'en pretendoit
d'autre que du Roy, & qu'il n'entreprenoit le voyage que pour
me monstrer la mer du nort, qu'il avoit veue, & luy en fit à la
Rochelle une déclaration pardevant deux Notaires.
[Note 317: _Conf._ 1613, p. 290, 291.]
[Note 318: L'Outaouais.]
[Note 319: Voir 1613, p. 293.]
[Note 320: Nicolas Brûlart de Sillery.]
Or comme je prenois congé de tous les Chefs, le our de la
Pentecoste[321], aux prières desquels je me recommandois, & de
tous en général, je luy dis en leur presence, que si ce qu'il
m'avoit cy devant dit n'estoit vray, qu'il ne me donnast la
peine d'entreprendre le voyage, pour lequel faire, il falloit
201/857 courir plusieurs dangers. Il asseura encores derechef tout ce
qu'il avoit dit, au péril de sa vie.
[Note 321: La Pentecôte, cette année, tombait le 26 de mai.]
Ainsi nos canaux chargez de quelques vivres, de nos armes &
marchandises, pour faire present aux Sauvages, je partis le
Lundy 27 May de l'isle de Saincte Heleine, avec quatre François
& un Sauvage, & me fut donné un adieu de nostre barque avec
quelques coups de petites pièces. Ce jour nous ne fusmes qu'au
Sault Sainct Louys, qui n'est qu'une lieue au dessus, à cause
du mauvais temps, qui ne nous permit de passer plus outre.
Le 29, nous le passasmes partie par terre, partie par eau, où
il nous fallut porter nos canaux, hardes, vivres & armes sur
nos espaules, qui n'est pas petite peine à ceux qui n'y sont
pas accoustumez: & après l'avoir esloigné deux lieues, nous
entrasmes dans un lac[322] qui a de circuit environ 12 lieues,
où se deschargent 3 rivieres[323], l'une venant de l'ouest, du
costé des Ochataiguins, esloignez du grand sault de 150 ou 200
lieues: l'autre du sud pays des Hiroquois, de pareille
distance: & l'autre vers le nort, qui vient des Algoumequins &
Nebicerini, aussi à peu prés de semblable distance. Ceste
riviere du nort (suivant le rapport des Sauvages) vient de plus
loin[324], & passe par des peuples qui leur sont incogneus,
distans environ de 300 lieues d'eux.
[Note 322: Le lac Saint-Louis. (Voir 1613, p. 294, note 2.)]
[Note 323: Voir 1613, p. 295, notes 1, 2, 3, 4.]
[Note 324: vient de plus loin que les nebicerini: l'outaouais, comme on
sait, prend sa source une cinquantaine de lieues plus au nord que le lac
nipissing.]
Ce lac est remply de belles & grandes isles, qui ne sont que
202/858 prairies, où il y a plaisir de chasser, la venaison & le
gibbier y estans en abondance, aussi bien que le poisson. Le
pays qui l'environne est remply de grandes forests. Nous fusmes
coucher à, l'entrée dudit lac, & fismes des barricades, à cause
des Hiroquois qui rodent par ces lieux pour surprendre leurs
ennemis; & m'asseure que s'ils nous eussent tenu, ils nous
eussent fait le mesme traittement; c'est pourquoy toute la
nuict nous fismes bon guet. Le lendemain je prins la hauteur de
ce lieu, qui est par les 45 degrez 18 minutes de latitude. Sur
les trois heures du soir nous entrasmes dans la riviere qui
vient du nort, & passasmes un petit sault par terre pour
soulager nos canaux, & fusmes à une isle le reste de la nuict
en attendant le jour. Le dernier May nous passasmes par un
autre lac[325] qui a 7 ou 8 lieues de long, & 3 de large, où il
y a quelques isles. Le pays d'alentour est fort uny, horsmis en
quelques endroits, où il y a des costaux couverts de pins. Nous
passasmes un sault, qui Sault de est appellé de ceux du pays
_Quenechouan_[326], qui est remply de pierres & rochers, où
l'eau y court de grand' vistesse; & nous fallut mettre en
l'eau, & traisner nos canaux bord à bord de terre avec une
corde. A demie lieue de là nous en passasmes un autre petit à
force d'avirons, ce qui ne se fait sans suer, & y a une grande
dextérité à passer ces sauts, pour eviter les bouillons &
brisans qui les traversent: ce que les Sauvages sont d'une
telle adresse, qu'il est impossible de plus, cherchans les
destours & lieux plus aisez qu'ils cognoissent à l'oeil.
[Note 325: Le lac des Deux-Montagnes.]
[Note 326: Voir 1613, p. 296, note 4.]
203/859 Le Samedy premier de Juin nous passasmes encor deux autres
sauts: le premier contenant demie lieue de long, & le second
une lieue, où nous eusmes bien de la peine: car la rapidité du
courant est si grande, qu'elle fait un bruit effroyable; &
descendant de degré en degré, fait une escume si blanche par
tout, que l'eau ne paroist aucunement. Ce sault est semé de
rochers, & quelques isles qui sont ça & là, couvertes de pins &
cèdres blancs. Ce fut là où nous eusmes de la peine: car ne
pouvans porter nos canaux par terre, à cause de l'espoisseur du
bois, il nous les falloit tirer dans l'eau avec des cordes, &
en tirant le mien, je me pensay perdre, à cause qu'il traversa
dans un des bouillons; & si je ne fusse tombé favorablement
entre deux rochers, le canot m'entraisnoit, d'autant que je ne
peus défaire assez à temps la corde qui estoit entortillée à
l'entour de ma main, qui me l'offensa fort, & me la pensa
couper. En ce danger je m'escriay à Dieu, & commençay à tirer
mon canot, qui me fut renvoyé par le remouil de l'eau qui se
fait en ces sauts: & lors estant eschapé je louay Dieu, le
priant nous preserver. Nostre Sauvage vint après pour me
secourir, mais j'estois hors de danger; & ne se faut estonner
si j'estois curieux de conserver nostre canot: car s'il eust
esté perdu, il falloit faire estat de demeurer, ou attendre que
quelques Sauvages passassent par là, qui est une pauvre attente
à ceux qui n'ont dequoy disner, & qui ne sont accoustumez à
telle fatigue. Pour nos François, ils n'en eurent pas meilleur
marché, & par plusieurs fois pensoient estre perdus: mais la
204/860 divine bonté nous preserva tous. Le reste de la journée nous
nous reposasmes, ayans assez travaillé.
Nous rencontrasmes le lendemain 15 canaux de Sauvages appellez
Quenongebin[327], dans une riviere, ayans passé un petit lac
long de 4 lieues, & large de 2, lesquels avoient esté advertis
de ma venue par ceux qui avoient passé au sault S. Louis,
venans de la guerre des Hiroquois. Je fus fort aise de leur
rencontre, & eux aussi, qui s'estonnerent de me voir avec si
peu de gens, & avec un seul Sauvage. Après nous estre saluez à
la mode du pays, je les priay de ne passer outre, pour leur
déclarer ma volonté, & fusmes cabaner dans une isle.
[Note 327: Ou Kinounchepirini. (Voir 1613, p. 298, note I.)]
Le lendemain je leur fis entendre que j'estois allé en leur
pays pour les voir, & pour m'acquitter de la promesse que je
leur avois par cy devant faite; & que s'ils estoient resolus
d'aller à la guerre, cela m'agréroit fort, d'autant que j'avois
amené des gens à ceste intention, dequoy ils furent fort
satisfaits. Et leur ayant dit que je voulois passer outre, pour
advertir les autres peuples, ils m'en voulurent destourner,
disans qu'il y avoit un meschant chemin, & que nous n'avions
rien veu jusques alors. Pour ce je les priay de me donner un de
leurs gens pour gouverner nostre deuxiesme canot, & aussi pour
nous guider, car nos conducteurs n'y cognoissoient plus rien.
Ils le firent volontiers & en recompense je leur fis un
present, & leur baillay un de nos François, le moins
205/861 necessaire, lequel je renvoyois au sault, avec une fueille de
tablette, dans laquelle, à faute de papier, je faisois sçavoir
de mes nouvelles.
Ainsi nous nous separasmes: & continuant nostre routte à mont
ladite riviere, en trousasmes une autre fort belle & spacieuse,
qui vient d'une nation appellée Ouescharini[328], lesquels se
tiennent au nort d'icelle, & à 4 journées de l'entrée. Ceste
riviere est fort plaisante, à cause des belles isles qu'elle
contient, & des terres garnies de beaux bois clairs qui la
bordent: & la terre est bonne pour le labourage.
[Note 328: Ou Ouaouiechkaïrini, la Petite Nation. (Voir 1613, p. 299,
note 1.)]
Le 4, nous passasmes proche d'une autre riviere[329] qui vient
du nort, où se tiennent des peuples appellez Algoumequins,
laquelle va tomber dans le grand fleuve Sainct Laurent, trois
lieues aval le Sault Sainct Louys(330) qui fait une grande isle
contenant prés de 40 lieues, laquelle[331] n'est pas large,
mais remplie d'un nombre infiny de sauts, qui sont fort
difficiles à passer. Quelquefois ces peuples passent par ceste
riviere pour eviter les rencontres de leurs ennemis, sçachans
qu'ils ne les recherchent en lieux de il difficile accez.
[Note 329: La Gatineau.]
[Note 330: En remontant la Gatineau, on va tomber par le Saint-Maurice,
trente lieues à val le saut Saint-Louis. (Voir 1613, p. 299, note 3.)]
[Note 331: Laquelle rivière, c'est-à-dire, la Gatineau.]
A l'emboucheure d'icelle il y en a une autre[332] qui vient du
sud, où à son entrée il y a une cheutte d'eau admirable: car
elle tombe d'une telle impetuosité de 20 ou 25 brasses[333] de
haut, qu'elle fait une arcade, ayant de largeur prés de 400
206/862 pas. Les Sauvages passent dessouz par plaisir, sans se
mouiller, que du poudrin que fait ladite eau. Il y a une isle
au milieu de ladite riviere, qui est comme tout le terroir
d'alentour, remplie de pins & cèdres blancs. Quand les Sauvages
veulent entrer dans la riviere, ils montent la montagne en
portant leurs canaux, & font demie lieue par terre. Les terres
des environs sont remplies de toute sorte de chasse, qui fait
que les Sauvages s'y arrestent plustost. Les Hiroquois y
viennent aussi quelquefois les surprendre au passage.
[Note 332: La rivière Rideau.]
[Note 333: Cette chute a une trentaine de pieds de haut.]
Nous passasmes un sault à une lieue de là, qui est large de
demie lieue, & descend de 6 à 7 brasses de haut. Il y a
quantité de petites isles, qui ne sont que rochers aspres &
difficiles, couverts de meschans petits bois. L'eau tombe à un
endroit de telle impetuosité sur un rocher, qu'il s'y est cavé
par succession de temps un large & profond bassin: si bien que
l'eau courant là dedans circulairement, & au milieu y faisant
de gros bouillons, a fait que les Sauvages l'appellent
_asticou_, qui veut dire chaudiere. Ceste cheutte d'eau meine
un tel bruit dans ce bassin, que l'on l'entend de plus de deux
lieues. Les Sauvages passans par là, font une cérémonie que
nous dirons en son lieu. Nous eusmes beaucoup de peine à monter
contre un grand courant, à force de rames, pour parvenir au
pied dudit sault, où les Sauvages prirent les canaux, & nos
François & moy, nos armes, vivres, & autres commoditez, pour
passer par l'aspreté des rochers environ un quart de lieue que
contient le sault, & aussi tost nous fallut embarquer, puis
207/863 derechef mettre pied à terre pour passer par des taillis
environ 300 pas; & aprés se mettre en l'eau pour faire passer
nos canaux par dessus les rochers aigus, avec autant de peine
que l'on sçauroit s'imaginer. Je prins la hauteur du lieu, &
trouvay 45 degrez 38 minutes de latitude[334].
[Note 334: Le saut de la Chaudière est à environ 45° 12'.]
Après midy nous entrasmes dans un lac[335] ayant 5 lieues de
long, & 2 de large, où il y a de fort belles isles remplies de
vignes, noyers, & autres arbres agréables: & 10 ou 12 lieues de
là amont la riviere nous passasmes par quelques isles remplies
de pins. La terre est sablonneuse, & s'y trouve une racine qui
teint en couleur cramoisie, de laquelle les Sauvages se
peindent le visage, & mettent de petits affiquets à leur usage.
Il y a aussi une coste de montagnes du long de ceste riviere, &
le pays des environs semble assez fascheux. Le reste du jour
nous le passasmes dans une ise fort agréable.
[Note 335: Le lac de la Chaudière.]
Le lendemain[336] nous continuasmes nostre chemin jusques à un
grand sault[337], qui contient prés de 3 lieues de large, où
l'eau descend comme de 10 ou 12 brasses de haut en talus, &
fait un merveilleux bruit. Il est remply d'une infinité d'isles
couvertes de pins & de cèdres; & pour le passer il nous fallut
resoudre de quitter nostre maïs ou bled d'Inde, & peu d'autres
vivres que nous avions, avec les hardes moins necessaires,
reservans seulement nos armes & filets, pour nous donner à
vivre selon les lieux, & l'heur de la chasse. Ainsi, allégez,
208/864 nous passasmes tant à l'aviron, que par terre, en portant nos
canaux & armes par ledit sault, qui a une lieue & demie de
long, où nos Sauvages qui sont infatigables à ce travail, &
accoustumez à endurer telles necessitez, nous soulagerent
beaucoup.
[Note 336: Le 5 de juin.]
[Note 337: Ce saut et les deux autres mentionnés plus loin, forment ce
qu'on appelle le rapide des Chats.]
Poursuivans nostre routte nous passasmes deux autres sauts,
l'un par terre, l'autre à la rame, & avec des perches en
debouttant, puis entrasmes dans un lac[338] ayant 6 ou 7 lieues
de long, où se descharge une riviere[339] venant du sud, où à
cinq journées de l'autre riviere il y a des peuples qui y
habitent appellez Matououescarini. Les terres d'environ ledit
lac sont sablonneuses, & couvertes de pins, qui ont esté
presque tous bruslez par les Sauvages. Il y a quelques isles,
dans l'une desquelles nous reposasmes, & veismes plusieurs
beaux cyprès rouges, les premiers que j'eusse veu en ce pays,
desquels je fis une croix, que je plantay à un bout de l'isle,
en lieu eminent, & en veue, avec les armes de France, comme
j'ay fait aux autres lieux où nous avions posé. Je nommay cette
isle, l'isle Ste Croix.
[Note 338: Le lac des Chats.]
[Note 339: La rivière de Madaouaska, ou des Madaouaskaïrini.]
Le 6 nous partismes de ceste isle saincte Croix, où la riviere
est large d'une lieue & demie, & ayans fait 8 ou 10 lieues,
nous passasmes un petit sault à la rame, & quantité d'isles de
différentes grandeurs. Icy nos Sauvages laisserent leurs sacs
avec leurs vivres, & les choses moins necessaires, afin d'estre
plus légers pour aller par terre, & eviter plusieurs sauts
qu'il falloit passer. Il y eut une grande contestation entre
209/865 nos Sauvages & nostre imposteur, qui affermoit qu'il n'y avoit
aucun danger par les sauts, & qu'il y falloit passer. Nos
Sauvages luy dirent, Tu es las de vivre. Et à moy, que je ne
le devois croire, & qu'il ne disoit pas vérité. Ainsi ayant
remarqué plusieurs fois qu'il n'avoit aucune cognoissance
desdits lieux, je suivis l'advis des Sauvages, dont bien m'en
print, car il cherchoit des difficultez pour me perdre, ou pour
me dégouster de l'entreprise, comme il confessa depuis (dequoy
sera parlé cy-aprés). Nous traversasmes donc la riviere à
l'ouest, qui couroit au nort, & pris la hauteur de ce lieu, qui
estoit par 46° 2/3[340] de latitude. Nous eusmes beaucoup de
peine à faire ce chemin par terre, estant chargé seulement pour
ma part de trois harquebuzes, autant d'avirons, de mon capot, &
quelques petites bagatelles. J'encourageois nos gens, qui
estoient un peu plus chargez, & plus grevez des mousquites, que
de leur charge.
[Note 340: Il faut lire 45° et deux tiers. (Voir 1613, p. 303, note 1.)]
Ainsi après avoir passe quatre petits estangs, & cheminé deux
lieues & demie, nous estions tant fatiguez, qu'il nous estoit
impossible de passer outre, à cause qu'il y avoit prés de 24
heures que n'avions mangé qu'un peu de poisson rosty, sans
autre saulce, car nous avions laisse nos vivres, comme j'ay dit
cy-dessus. Nous nous reposasmes sur le bord d'un estang, qui
estoit assez agréable, & fismes du feu pour chasser les
mousquites qui nous molestoient fort, l'importunité desquelles
est si estrange, qu'il est impossible d'en pouoir faire la
description. Nous tendismes nos filets pour prendre quelques
poissons.
210/866 Le lendemain[341] nous passasmes cet estang, qui pouvoit
contenir une lieue de long, & puis par terre cheminasmes 3
lieues par des pays difficiles plus que n'allions encor veu, à
cause que les vents avoient abbatu des pins les uns sur les
autres, qui n'est pas petite incommodité, car il faut passer
tantost dessus & tantost dessouz ces arbres. Ainsi nous
parvinsmes à un lac[342], ayant 6 lieues de long, & 2 de large,
fort abondant en poisson, aussi les peuples des environs y font
leur pescherie. Prés de ce lac y a une habitation de Sauvages
qui cultivent la terre, & recueillent du maïs. Le chef se nomme
Nibachis, lequel nous vint voir avec sa troupe, esmerveillé
comment nous avions peu passer les sauts & mauvais chemins
qu'il y avoit pour parvenir à eux. Et après nous avoir presenté
du petum selon leur mode, il commença à haranguer ses
compagnons, leur disant; Qu'il falloit que fussions tombez des
nues, ne sçachant comment nous avions peu passer, & qu'eux
demeurans au pays avoient beaucoup de peine à traverser ces
mauvais passages, leur faisant entendre que je venois à bout de
tout ce que mon esprit vouloit. Bref qu'il croyoit de moy ce
que les autres Sauvages luy en avoient dit. Et sçachans que
nous avions faim, ils nous donnèrent du poisson, que nous
mangeasmes: & après disné, je leur fis entendre par Thomas mon
truchement, l'aise que j'avois de les avoir rencontrez. Que
j'estois en ce pays pour les assister en leurs guerres, & que
je desirois aller plus avant voir quelques autres Capitaines
211/867 pour mesme effect, dequoy ils furent joyeux, & me promirent
assistance. Ils me monstrerent leurs jardinages & champs, où il
y avoit du maïs. Leur terroir est sablonneux, & pource
s'adonnent plus à la chasse qu'au labeur, au contraire des
Ochataiguins[343]. Quand ils veulent rendre un terroir
labourable, ils coupent & bruslent les arbres, & ce fort
aisément: car ce ne sont que chesnes & ormes. Le bois bruslé
ils remuent un peu la terre, & plantent leur maïs grain à
grain, comme ceux de la Floride. Il n'avoit pour lors que 4
doigts de haut.
[Note 341: Le 7 de juin.]
[Note 342: Le lac au Rat-Musqué.]
[Note 343: Ou Hurons.]
_Continuation. Arrivée vers Tessouat, & le bon accueil qu'il me
fit. Façon de leurs cimetières. Les Sauvages me promirent
quatre canaux pour continuer mon chemin. Tost après me les
refusent. Harangue des Sauvages pour me dissuader mon
entreprise, me remonstrans les difficultés. Response à ces
difficultés. Tessouat argue mon conducteur de mensonge, &
n'avoir esté ou il disoit. Il leur maintint son dire véritable.
Je les presse de me donner des canaux. Plusieurs refus. Mon
conducteur convaincu de mensonge, & sa confession._