LA quatrième entreprise fut celle du Sieur Commandeur de
Chaste, gouverneur de Dieppe, qui estoit homme très-honorable,
bon Catholique, grand serviteur du Roy, qui avoit dignement &
fidèlement servy sa Majesté en plusieurs occasions signalées.
Et bien qu'il eust la teste chargée d'autant de cheveux gris
que d'années, vouloit encore laisser à la posterité par ceste
louable entreprise une remarque très charitable en ce dessein,
45/701 & mesmes s'y porter en personne, pour consommer le reste de ses
ans au service de Dieu & de son Roy, en y faisant une demeure
arrestée, pour y vivre & mourir glorieusement, comme il
esperoit, si Dieu ne l'eust retiré de ce monde plustost qu'il
ne pensoit, & se pouvoit-on bien asseurer que souz sa conduite
l'heresie ne se fust jamais plantée aux Indes: car il avoit de
tres-chrestiens desseins, dont je pourrois rendre de bons
tesmoignages, pour m'avoir fait l'honneur de m'en communiquer
quelque chose.
Donc après la mort dudit sieur Chauvin, il obtint nouvelle
commission de sa Majesté. Et d'autant que la despense estoit
fort grande, il fit une societé avec plusieurs Gentils hommes,
& principaux marchands de Rouen, & d'autres lieux, sur
certaines conditions. Ce qu'estant fait, ils font équiper
vaisseaux tant pour l'exécution de ceste entreprise, que pour
descouvrir & peupler le pays. Ledit Pont-Gravé avec commission
de sa Majesté (comme personne qui avoit desja fait le voyage, &
recognu les defauts du passé) fut éleu pour aller à Tadoussac,
& promet d'aller jusques au Sault Sainct Louys, le descouvrir,
& passer outre, pour en faire son rapport à son retour, &
donner ordre à un second embarquement; & ledit Sieur Commandeur
quitter son gouvernement, avec la permission de sa Majesté, qui
l'aimoit uniquement, s'en aller au pays de la nouvelle France.
Sur ces entre-faites, je me trouvay en Cour, venu fraischement
des Indes Occidentales, où j'avois esté prés de deux ans &
46/402 demy[54], après que les Espagnols furent partis de Blavet[55],
& la paix faite en France, où pendant les guerres j'avois servy
sadite Majesté souz Messeigneurs le Mareschal d'Aumont, de
Sainct Luc, & Mareschal de Brissac. Allant voir de fois à autre
ledit Sieur Commandeur de Chaste, jugeant que je luy pouvois
servir en son dessein, il me fit ceste faveur, comme j'ay dit,
de m'en communiquer quelque chose, & me demanda si j'aurois
agréable de faire le voyage, pour voir ce pays, & ce que les
entrepreneurs y feroient. Je luy dis que j'estois son
serviteur: que pour me licencier de moy-mesme à entreprendre ce
voyage, je ne le pouvois faire sans le Commandement de sadite
Majesté, à laquelle j'estois obligé tant de naissance, que
d'une pension de laquelle elle m'honoroit, pour avoir moyen de
m'entretenir prés d'elle, & que s'il luy en plaisoit parler, &
me le commander, que je l'aurois tres-agreable. Ce qu'il me
promit, & fit, & receut commandement de sa Majesté pour faire
ce voyage, & luy en faire fidel rapport: & pour cet effect
Monsieur de Gesvre Secrétaire de ses commandemens, m'expédia,
avec lettre addressante audit Pont-Gravé, pour me recevoir en
son vaisseau, & me faire voir & recognoistre tout ce qui se
pourroit en ces lieux, en m'assistant de ce qui luy seroit
possible en ceste entreprise.
[Note 54: Champlain avait été deux ans et deux mois à ce voyage des
Indes Occidentales. Parti du Blavet au commencement d'août 1598, avec
son oncle le capitaine Provençal, il se rendit en Espagne, où on lui
confia le commandement d'un des vaisseaux de la flotte des Indes, qui
partit au «commencement de janvier 1599». Il fut de retour au
commencement de 1601.]
[Note 55: Aujourd'hui Port-Louis, département du Morbihan.]
Me voila expédié, je pars de Paris, & m'embarque dans le
vaisseau dudit du Pont l'an 1603. nous faisons heureux voyage
47/703 jusques à Tadoussac, avec de moyennes barques de 12 à 15
tonneaux, & fusmes jusques à une lieue à mont le Grand-sault
Sainct Louis. Le Pont Gravé & moy nous nous mettons dans un
petit bateau fort léger, avec cinq matelots, pour n'en pouvoir
faire naviger de plus grand, à cause des difficultez. Ayant
fait une lieue avec beaucoup de peine dans une forme de lac,
pour le peu d'eau que nous y trouvasmes, & estans parvenus au
pied dudit Sault, qui se descharge en ce lac, nous jugeasmes
impossible de le passer avec nostre esquif, pour estre si
furieux, & entre-meslé de rochers, que nous nous trouvasmes
contraints de faire presque une lieue par terre, pour voir le
dessus de ce Sault, n'en pouvans voir d'avantage, & tout ce que
nous peusmes faire fut de remarquer les difficultez, tout le
pais, & le long de ladite riviere, avec le rapport des Sauvages
de ce qui estoit dedans les terres, des peuples, des lieux, &
origines des principales rivieres, & notamment du grand fleuve
S. Laurent.
Je fis dés lors un petit discours, avec la carte[56] exacte de
tout ce que j'avois veu & recognu, & ainsi nous nous en
retournasmes à Tadoussac, sans faire que fort peu de progrés:
auquel lieu estoient nos vaisseaux qui faisoient la traitte
avec les Sauvages, ce qu'estant fait, nous nous embarquasmes,
mettant les voiles au vent, jusques à ce que nous fussions
arrivez à Honnefleur, où sceusmes les nouvelles de la mort du
Sieur Commandeur de Chaste[57], qui m'affligea fort,
48/704 recognoissant que mal-aisément un autre pourroit entreprendre
ceste entreprise, qu'il ne fust traversé, si ce n'estoit un
Seigneur de qui l'authorité fust capable de repousser l'envie.
[Note 56: Cette carte ne se trouve pas même dans l'exemplaire du Voyage
de 1603 que possède la Bibliothèque Impériale.]
[Note 57: Il était mort le 13 mai de cette année 1603 (Asseline, _ms_ de
Dieppe). Son tombeau est dans l'église de Saint-Rémi à Dieppe.]
Je n'arresté gueres en ce lieu de Honnefleur, que j'allay
trouver sa Majesté, à laquelle je fis voir la carte dudit pays,
avec le discours fort particulier que je luy en fis, qu'elle
eut fort agréable, promettant de ne laisser ce dessein, mais de
le faire poursuivre & favoriser. Voila le cinquiesme voyage
rompu par la mort dudit Sieur commandeur.
En ceste entreprise je n'ay remarqué aucun defaut pour avoir
esté bien commencé: mais je sçay qu'aussi tost plusieurs
marchands de France qui avoient interest en ce négoce,
commençoient à faire des plaintes de ce qu'on leur interdisoit
le trafic des pelleteries, pour le donner à un seul.
_Voyage du Sieur de Mons. Veut poursuivre le dessein du feu
Commandeur de Chastes. Obtient commission du Roy pour aller
descouvrir plus avant vers Midy. S'associe avec les marchands
de Rouen & de la Rochelle, L'Autheur voyage avec luy. Arrivent
au Cap de Héve. Descouvrent plusieurs ports & rivieres. Le
Sieur de Poitrincourt va avec le Sieur de Mons. Plaintes dudit
Sieur de Mons. Sa commission revoquée._