die de Wohning asahe wollten! Der Nand konnt sich net esu schnell of
der Seit brenge, do warn se aa schie bei ne an Haus dra. Der Nand hoot
bal Blut geschwitzt. Ar tat sich immer drehe un wenden, die Leit
wunreten sich über dos olbere Getue. Se dachten bei sich: »dos muß oder
e narscher Karl sei!« Un de Frau saht ze ihrn Maa: »Der Kerl is mir
unheimlich!« Se machetn nu nei ins Haus, wu abn de Mienel wieder alles
dorcheenanner feiern tat, weil se immer noch dacht, der Nand hätt dan
Schlissel irgendwuhi verräumt. Die Stadtleit kame ihr racht ugelagn!
Esu pulisch hatts lange Zeit net ausgesah! Die Fraa tat aa schie de
Nos' rümpfen. Dann führet de Miene de Leit de Trepp nauf. Natirlich
tat se aa gruß dermiet, daß se wagn darer Trepp in der Versichering
wärn. Der Maa fraget när, öb do schie racht viel runnergesterzt wärn?!
Nu machet de Miene mit grußen Stulz ihre Stub auf. 's erschte, wos mer
sog, war ne Nand sei Aermelgack, die mitten in der Stub log! De Miene
saht ewos von de liederling Mannsen, un hub de Gack esu fix wie 's ging
auf! Die Leit guckten sich när ewing üm. »Die Stube ist ja ganz nett«,
saht die Fraa. »Wie sind denn die Betten?« freget nu dar Maa un decket
bei en de Zudeck ewing wag. Do fuhln seine Agn uf die vermaledeite
Kognakflasch -- un dar Blick, dan die bedn Stadtleit mitenaner
austauschten, saht der Miene genung! Oder eine Wut packet se, 's war ne
Nand sei Gelück, daß er net miet in der Stub war!! Die Leit macheten
wieder fort und sahten, se wollten sichs noch emol überlegn. Weil sie
oder gar net wagn Preis gefregt hatten, wußt de Miene genung!
De Miene ging nuner in der Stub zu ihrn Nand un hatt de Kognakflasch
in Arm! Der Nand war derschrocken, er wußt net wie. Ar tat sich oder
fix zamrichten un hatt aa noch die Uverschamthät zu fregn: »Seit
wann seifst dä du aa Kognak?« Do gabs en Plautz un die Flasch flug
der Miene aus der Hand, dort an der Wand na, wu der Nand gar net
lang erscht gestanden hatt! Dann fing die Miene aa ze gammern un
gerod naus ze fleschen, vir Wut un Arger, daß der Nand när fix ne
Brutschrankschlüssel reihulet, daß se sich beruhing sollt! De Miene gab
oder noch net geleich Ruh. Se hoot sich orndlich ausgesprochen, un die
Leit, die unten of der Stroß virbeiginge, hobn net garschtig gehorcht.
Der Nand war gescheit, ar hoot net derhaufen gesaht. När, wenn emol
später jemand fregn tat: »Nu, Nand, bei eich war doch salten a rachts
Geteps?«, do saht er allemol: »Ja, ihr Kinner, die Hitzwell, die hotn
Teifel!«
[Illustration]
[Illustration]
De Schwammekonferenz.
Wenn der Spätsommer kimmt, su in Afang September, un de Gager langsam
afange an de Rehböck ze denken, wenn de Karpen afange gut ze schmecken
un aa de Gäns miet reif warn, do gieht fir de Leit in Geberg e schiene
Zeit lus. En Sport treiben se, wie de Leit in grußen Städten. Se
strenge Händ un Fiß a, se treiben sich aa in der Walt rim, oder ihr
Sport stinkt net, 's fliegt aa niemanden e Ball an Kup, un se schreie
un bläken aa net esu derbei wie de richting Sportbossen. Ihr Sport kost
aa nischt, in Gegntäl, ar brengt'n Leiten noch ewos ei! Un wos is dos
fir e narrsch Bissel Sport? Se giehe in de Schwamme!
War noch net miet in de Schwamme war, hot iberhaupt ken Viduz, wos dos
ze bedeiten hot. Zu ener Zeit, wu de richting Grußstadtleit erscht aus
der Schenk ehämgiehe, do stieht mer schie auf. Mer hot an Ohmd vornewag
schie de Schwammsackle zeracht gelegt. E Pfeif werd gestoppt un in der
Tasch nei nochn Schnappmasser gegriffen, dä 's Handwarkszeich mecht mer
doch beienaner hobn. Kaffee trinkt mer net, dä im darer Zeit hot de
Fraa noch kä Feier in Ufen, dann giehts zon Ding naus. E Pfeif Tobak
is immer ewos Guts, oder an zeiting Morgn, wenns in de Schwamm gieht,
is se e grußartige Gitt. Ellä gieht niemand in de Schwamm, 's tunne
sich immer zwä, drei Freind zamm, oder dann giehts föder. 's dauert a
net lang, is mer in Wald; un wenns in der ganzen Walt käne Schwamm
gäb -- esu in der Früh in Wald ze sei is ellä wart, daß mer esu zeitig
aufstieht, obwuhl doch e Jeds weß, daß früh an schensten in Bett is. Of
de Wiesen un Straicher hänge noch de Nabelfatzen, 's is draußenrim, als
tät de ganze Walt ihr Nachthem ausziehe; un de Grasle un Bamle sei noch
ben Kaffee- oder, wos richtiger is, ben Wassertrinken, dä überoll liegn
de Wassertröpple noch drauf. Un in dan Wald die Ruh! In käner Kerch is
en esu adächtig. Un wenn a e Vögele ab un zu en Pipertz tut, dos is
gerod wie bei de klen Kinner, wenn die in Schlof emol nach ihrer Mutter
rufen. Mer wogt kä lautes Wort ze sprachen, aus Angst, mer kennt sinst
ewos aufwecken. Un in darer Ruh fanstert of emol de Sonn en Strahl nei!
Oder do giehts lus! Aus allen Ecken pfeifts un trillerts un wenn vollst
de Zippen noch afange, do is Konzert fertig. Nu schitteln sich aa de
Fichtle un in Stangewald fange de Spacht a ze hammern -- war esuwos
noch net derlabt hot, weß net, wie schie's of darer Walt is, un wenn
er sinst ewu hikomme wär. Un dann gieht doch erscht 's Vergnign lus.
Die Fräd, wenn ener e Pilzel find, un erscht, wenn ner emol en richting
Flack hot -- 's is werklich ka Wuner, daß maniche Mannsen wie tottend
ofs Schwammegiehe sei.
Esu warsch ganz gewieß ben Wagnerschuster -- oder, wie ar bei allen
Leiten hieß -- bein Tiftelschuster. Dan Name hat'r, weil er bei
jeder Sach erscht zahmol drimrimfreget, bis ar när alles wußt, ar
war, wie mer e manichsmol spricht, e richtige Grundsupp. Dar un der
Richterposamentier -- se hießen ne när, weil er esu klä un derr war,
's Fadel -- ginge jede Woch, die Gott warn ließ, zewingst dreimol in de
Schwamme. Mer konnts'n aa net verdenken, de Arbet derdricket se net, un
dreimol in der Woch Schwamme, dos war aa ihrn Weibsen noch'n Geschmack.
Un die bäden ginge aa »richtig« in de Schwamme. Früh in der vierten
Stund macheten se derhem fort, un vir neine an Ohmd kame se net wieder
anzaat. De Tiftelschustern hat schie e mannichsmol gefregt, öb se epper
de Schwamme mit der Laterr suchen täten, oder weil se sist e gute Fraa
war, saht se nischt weter driber. Nu muß mer oder zugabn: de Schwamme
war net 's Enzige, wos die Manner nauszug. Die wußten doch de richting
Flack un Nachmittig im dreie hatten se gewieß ihre Sackle voll. Nä,
dann kam dar anere Täl von darer Schwammgeschicht; mer mecht sprachen:
Hatten se erscht mit Händen un Fissen geschafft, dann kam de Kopparbet.
Draußen in Sauwald stand e klä Kneipel, de »Morgnsonn«, do gings
allemol hi; un war wissen wollt, wos de Leit dort neizug, dar brauchet
när emol in Wochenblatt ze gucken; do konnt mer alle Tog lasen:
=Rest. Morgensonne, Sauwald[4]
Fortwährend Schwammekonferenz.=
Dos war fir alle Schwammegieher de Uneverschetät, oder aa manichsmol
der Reichstog, esu wur gestrieten. Mer konnt oder aa denken 's wär e
Gagerversammling, sette Lorken un Lign wurn do derzehlt. Un daß die
Sach a ihr Mantele hatt', do sahten alle Konferenzleit derhem zu ihrn
Weibern, se hätten erscht dorten de Schwamme putzen müssen, daß derhem
net sette Schweinerei warn sollt.
Nu warsch emol an en Montig Nochmittig. Der Tiftelschuster un 's Fadel
kame vollgepackt voll Schwamme ne Zimmerwag rauf, dar akarot noch der
Morgensonn führet. Se konnten fruh sei, heit hatt's Stäpilz gab'n,
wie bal in ganzen Gahr net. Se konntens schie kaum derwarten, daßen
se in der Schwammekonferenz ihre Sackle auspacken konnten. Heit würn
die anern net garstig gucken, noch derzu, weil's an Montig, wu alles
blaa machet, in Wald bal mehr Schwammegieher gab wie Schwamme. Wie se
an der Lichting nakame, kam ne Kreizwag rauf der Bargeltwilhelm, dar
sinst in der Woch Fransen nähe tat, mit seiner Marie, en fein Madel
von epper zwanzig Gahrn. »Wu wart ihr dä?« fing er a, wie er die
vullen Schwammesack sog. »In de Schwamme«, saht 's Fadel in aller Ruh.
»Dos sah ich«, saht der Bargeltwilhelm, »daß ihr käne Pflasterstä in
eiern Säcken hobt, ka ich mer denken! Ich mähn, wu?« »Ach su«, saht
der Tiftelschuster, »do drunten. -- Zeig emol har, Wilhelm, hast de
aa weliche?« »'s stand net derhaufen heit«, saht der Bargeltwilhelm,
»e paar Taiberling ho ich un e paar Galbschwammle! Sogt mir när e
enzigsmol, wu ihr hilaaft; mei Sackel wür doch da aa miet voll!«
»Eiju«, mahnet 's Fadel wieder, »do drunten stinne Schwamme, mer muß
sich in acht nahme, daß mer net drauftritt! Mer hobn heit när de paar
besten mietgenomme. Do stinne se noch haufenweis.« De Marie gucket
geleich ne Wag noner, ob se net weliche stiehe sog; oder ihr Voter
huppet net of dan Leim, dä daß die bäden Gorken uhne en Imwag ze
machen vun ihrn Flack waggange wärn, wollt'n net racht eileichten. Wie
se nei in der Morgnsonn kame, war schie e fei bissel Labn. Un en Tisch
soßen vier Mann un spieleten Doppelkopp. Do war aa der alte Wachtmäster
aus der Stadt derbei, dar hat sich zor Ruh gesetzt un ging alle Tog in
de Schwamme, weil er nischt annersch ze tue hatt, un trutzdam er bal
nischt derkenne konnt, bracht er seiner Fraa alle Tog e Sackel ehäm;
ar ging namlich när bis in der Morgnsonn un tat dorten de Schwammeleit
olauern; dann spielet er sen Doppelkopp, un zeletzt kafet er sich vu
en richting Schwammegokel e Sackel Schwamme, manichsmol im teiersch
Gald. Wenn er oder nei in der Stadt kam, kehret er drei-, viermol ei
un tat sich gruß mit seine Schwamme. När in »Roß« ging er net mehr
nei, weil ne der Fichtenbarger Kanter, dar an Ohmd e manichsmol dorten
soß, emol gefregt hatt, öb dos Konferenzschwamme wärn. Heit war der
Wachtmaster racht neigierig, wu er seine Grußtuschwamme harkriegn wür,
dä war gekomme war, hatt se net haufenweis gehatt. Wie nu de letzte
Gesellschaft kam, hatt er wieder Hoffning, e paar wür er schie kriegn,
dos wußt er. Der Tiftelschuster, 's Fadel un der Bergeltwilhelm mit
sen Madel setzten sich hie. 's tat net lang dauern, do kriegeten se
ihrn Pfefferminz un ihr Gelos Bier, de Marie lacket an ihrn Stangelbier
rim. Do taten unere bäden Schwammefreind ihre Sackle imsterzen. In
der Schwammekonferenz wur der rene Aufruhr! Se hätten alle zam gar
ze garn gewußt, wu dar Flack war, dar e sette Matz hargob. Dan bädn
Karln fuhls natirlich net ei, ewos ze verroten, in Gegentäl, wenn
noch dan ihrn Reden jemand geloffen wär, dar wär über de Roscherfelsen
nei in der Boch gesterzt. Itze zeiget 's Fadel en Stäpilz har, fest,
rund un gesund wie e Wiesner Buttermadel. Ar hielt ne esu, daß ne der
Wachtmäster geleich ze Gesicht krieget. Wie dar dan Pilz sog, war sei
Adacht bein Spieln wag, un e Spiel, dos engtlich fest wie e Mauer
stand, wur verlurn. Kaum warn se fertig, lof er hie zun Fadel un saht:
»Wos soll dä dos Pilzel kosten?« 's Fadel saht: »Ich bi kä Hanelsmaa!«
Der Wachtmäster ließ oder kä Ruh. Ihn tät dos Schwammel esu gefalln, ar
sollt's'n när olossen. Der Tiftelschuster zwinkret ne Fadel zu un dar
saht endlich: »Ja, bezohln Se en Pfefferminz, dann solln se's kriegn.«
Der Wachtmäster saht geleich: »Harr Kunze«, wos der Wert war, »gab'n Se
emol en klen Pfafferminz!« »Nu nä«, fing oder do der Tiftelschuster a,
»bräng när en Zwämännischen! Heit sei de Stäpilz rar!« Na se kriegeten
ihrn Faustpensel, un der Wachtmäster stecket sen Stäpilz ganz gelicklich
in sei Schwammesackel. Dann spieleten se weter. Kaum noch'n zwäten
Spiel meld mei Wachtmäster en grün Solo a. Se hatten kaum agefange,
do langet der Tiftelschuster a e Stäpilzel raus, bal noch schener
wie dos anere. Der Wachtmäster hatt's kaum gesah, do warn seine Aagn
mer of dan Stäpilzel wie of sen Spiel, un richtig, er verkneppt sei
Solo. Kaum war er fertig, machet er hie zun Tiftelschuster un fing a
mit dan zu haneln. 's dauret a net lang, do hatt' mei Wachtmäster sei
Pilzel un der Tiftelschuster sen Pfefferminz. Der Bargeltwilhelm konnt
sich net derhalten ze sogn: »Na, dos Schwammel kimmt Se oder teier
ze stiehe, vier Neigrosch!« »Wuhar dä?« freget der Polezeimaa. »Nu,
drei Neigrosch Ihr Solo un en der Faustpensel! Do, kafen Se mer dan
Taiberlich o, dan kriegn Se schie für en klen Schnaps!« Dodrauf ging
oder der Wachtmäster net ei. Ar spielet esu uhne Gedanken, daß sei
Mitspieler sahten, se wollten när lieber aufhörn, oder ar sollt mehr
of sei Karten gucken, wie of de Schwamme. Noch e paar Minuten gungset
der Tiftelschuster 's Fadel, un dann brachten se e Ruthätel aus'n Sack,
bal wie en klen Regnschirm. Do warsch mit'n Wachtmäster seiner Ruh
aus. Dosmol mußt'r oder bluten, dä die Schwammegokeln verlangeten jeds
e Tippl Bier. Ar mocht wolln oder net, 's halfen nischt, ar mußt se
bezohln. Ja, die Hanelei ging esulang, bis de Bäden mit Schwammeputzen
fertig warn; un derbei hatten se freie Zech gehatt, dä der Wachtmäster
ruhet net, bis sei Sackel epper dreivertel voll war. Wahrend dar Sach
warn noch e fei paar Schwammesucher komme, un in der Konferenz war e
Unterhalting, daß mer bal konnt sei Wort net verstiehe. Mer heret immer
esu dorchenaner bläken; »Herschpilz, wie e Tisch esu gruß!« »Uner jeden
Fichtel drei Röstling!« »Ruthäteln wie de Spargelstange!« »Stäpilz
stinne bal gar net!« Jeder tat sich gruß mit sen Flack, oder tat sich
aa hüten, ze viel ze verroten, sinst hätten doch de anern higiehe kenne
un sahe, wos ar alles derzugesuhlt hatt'. Anere wieder, die strieten
über die Geschicht, die in Wochenblatt gestanden hatt, wu su viel Leit
an Pilzvergifting gestorbn warn. Doderbei war mer sich oder enig:
War nischt vun de Schwamme verständ, sollt derhem bleibn un sich sei
Schwamme kafen. Der Werfelschmied wollt dan Leiten vireden, de besten
Schwamme wärn de Fliegnschwamme, in Drasen würn se zantnerweis' in der
Markthall verkauft. 's müßt när de Haut orndlich ogezugn un de Brieh
ogegossen warn. Dodrüber wurn se sich oder net enig, 's wollt a käner
bei sich derhem prubiern, un der Werfelschmied salber wullt aa net
racht naa, wie er sich derzu hargabn sollt. Ne Bargeltwilhelm sei Marie
tat sich net garstig langweiln. Se hatt' de Bilder in Sontigblatel
rim un nim agesahe, ihre paar Schwamme warn aa geputzt, un nu wußt
se net racht, wos se machen sollt. Sie krieget erscht dann ewing
Vertuing, wie de Tir aufging un der Barthelfritz aus Städorf reitrot.
Dar hatt' aa e Packel Schwamme, oder -- im's geleich ze sogn -- dan
ihretwagen war er net nausgeloffen, dos Schwammel, wos dar suchet,
soß dorten in der Schwammekonferenz -- un dos war de Bargeltmarie!
Se trafen sich zwar alle verzehn Tog ofn Tanz, oder sinst war der
Bargeltwilhelm ze sehr derhinerhar, daß se net mitenaner scharmeziern
konnten. Desto greßer war sei Fräd, daß esu eitraf, wie se an Suntig
mitenaner ausgemacht hatten. De Manner warn esu ben Dischkeriern, daß
se gar nischt marketen; a dos marketen se net, daß die bäden gunge Leit
erscht noch emol de Suntigbeilag racht sahr agucken taten, när war dos
Blattel ze klä, zwä Köpp ginge net derhiner. A dos fuhl net auf, wie de
Marie emol zor Tir nausging, un niemand hatt' e Obbacht drauf, wie der
Barthelfritz noch e paar Minuten aa wag war. In der Schwammekonferenz
ginge de Wugn huch. Se warn abn derbei, öb sich net aa e Schwammezucht
harrichten ließ, wie bei de Blume. Der Tiftelschuster hat sich schie
e Kreizing von Stäpilz un Ruthäteln zerachtgelegt -- korz un gut, 's
war bei dan Schwammestreit e mannichs derbei, wu mer dernoch hätt sogn
kenne: »Schwamm drüber!«
's mocht nu im sechse sei, do besann sich der Bargeltwilhelm of seiner
Familie un saht: »Marie, willst De e Bindel Heu assen? -- Nu, wu is dä
mei Madel?« Der Wert wullt se net gesahn hobn, e anersch hat se a net
weiskriegt. Der Wilhelm ging emol naus vir der Tir un rufet, oder er
krieget kä Antwort. Ar freget noch emol in der Gaststub rim, öb niemand
sei Madel gesahe hätt, 's war oder vergablich. Do kriegets mei Wilhelm
mit der Angst ze tue. »Se werd doch epper net of Eiern Flack geloffen
sei, Fadel?« freget er. »Dan werd se wuhl net finden«, saht dar, »se
weß doch net, wuhi!« Do menget sich oder der Werfelschmied nei un saht:
»Eiju, dos werd sei, die hot aufgepaßt wie e Haftelmacher, wie der
Tiftelschuster sen Flack beschriebn hot! Die werd wuhl do noner sei«.
»Daß Gott derbarm!« saht der Tiftelschuster, »wenn die geloffen is,
wie ich saht, is se ne Roscherfelsel nogesterzt!« Nu wur oder Labn in
Brutsook! De ganze Bande stand auf, setzet de Mitzen ofn Kopp un wollt
noch dan Madel suchen giehe. Draußen vir der Tir wur ausgemacht, daß
jeder Trupp fir sich lafen sollt. Von Zeit ze Zeit wollten se alle emol
bläken. Der Wachtmäster machet mit'n Tiftelschuster fort, er dacht
doch, 's ging ofn Schwammeflack. Nu wur der ganze Sauwald ogesucht,
oder dos Madel wur net gefunden. Se konnten schreie wie se wollten,
's gob kä Marie Antwort. Dos stand nu bei dan ganzen Mannsen fest: 's
war e Ugelick gepassiert. Der Bargeltwilhelm klattret mit noch en ne
Roscherfelsel noner, oder dorten war aa nischt ze sahe. Der Anzige, dar
von darer Sucherei ewos hatt, war der Wachtmäster. Der Tiftelschuster
konnts doch net lossen un gucket manichsmol ofn Ardbuden, als kennt
sich dos Madel dort neigegrobn hobn. Bei darer Gelanghät sog er
doch e paar Schwamme, un ar war esu astännig, daß er ne Wachtmäster
allemol bal mit der Nos draufdricket. Un dar hatt' ene Fräd! Dos war'n
doch of sen ganzen Schwammegiehe net virkomme, doß er hätt e Pilzel
oschneiden könne! 's war oder ner narrsch, doß er als Schwammgokel
net emol e Masser miethat, dos mußt'n der Tiftelschuster aa noch
borgn. Ar war esu begierig, er hätt an liebstn de Schwamme mit Stump
un Stiel rausgeruppt. Do war oder der Tiftelschuster derhinerhar, daß
er dos net machen tat. Wie se nischt gefunden hatten, kame se zerick
zor Morgnsonn. Der Wachtmäster war ganz aus'n Heisel. Der Wert sog se
komme, un weil der Wachtmäster esu ofn Damp war, freget er geleich:
»Ihr hat se wuhl gefunden?« »Haa«, saht der Wachtmäster, »mir hobn se,
vier Stick of en Flack!« »Ach, alts Gemahr«, fuhl ne der Tiftelschuster
in der Red, »nischt hobn mer gefunden, ich ka mer net denken, wu dos
Madel hie is!« Do freget der Wert: »Sog emol, war dä virhinst der
Barthelfritz net ze strich? Drine stieht noch sei agetrunkenes Gelos.
Suchen is er oder net miet!« »Nu, dos tät mich oder wunnern«, mänet der
Schuster, »'s häßt doch immer, dar un de Bargeltmarie liefen mitenaner;
dar werd schie aa miet suchen?« »Na, dos is sicher«, saht der Wert
wieder, »wie's zun Suchen ging, war er schie nimmer do!« »Weßt de«,
fing do der Schuster aa, »itze gieht mir net när e Licht, nä geleich
e ganzer Christbaam auf! Dos gunge Zeich werd schie erngtwu stacken!«
Se warn noch ibern Reden, do kam der Bargeltwilhelm ganz klälaut a.
Aa die anern Manner kame getraten, mer merket oder geleich alln a, se
hatten de Marie net gefunden. Se warn allezam dar Asicht, daß dos Kind
vermalliert wär. Ne Bargeltwilhelm stand's Wasser in de Agn. Ar machet
sich ewing vun die Manner wag un hinnersch Haus, nochn Kegelschub zu.
Dort stand e grußer Vugelbeerbaam, unner dan war, e finkel versteckt, e
Bankel. Of emol blieb der Wilhelm traatn, 's Fadel war ne nachgeloffen
un gucket aa miet hi, drehet sich oder geleich rim un winket dan
anern, se sollten racht leise harkomme. Un wos sog mer do? Of dan
Bankel soß, ne Leiten mitn Buckel zugewendt, mei Barthelfritz mit der
Marie, un dricket ihr abn en Schmatz ofs Guschel, daß när esu knallet.
In dan Agnblick schlug de ganze Schwammkonferenz e Lach auf, daß de
beden gunge Leit in greßten Schrack ausenaner fuhrn. Nu fing oder
mei Bargeltwilhelm aa: »Wos is mer dä dos? Ihr sucht wuhl Schwamme
dohinten? No, do hert mer oder de Gemietlichkeet auf! Mir denken, dos
Madel liegt in Wald un hoot 's Genick gebrochen, un do hot se e gunger
Bos bein Genick!« »Sahts ichs net«, saht der Werfelschmied, »die hot
ne richting Flack gesucht? Do hot se'n gefunden!« Der Barthelfritz hat
en ganz ruten Kop un de Marie bracht de Scherz net vun Gesicht runer,
esu schamet se sich. Der Fritz machet sich oder an Bargeltwilhelm na
un tat e Weil mit'n streiten. Un wie se fertig warn, do drehet sich
der Wilhelm rim un saht: »Na, 's doch zu ewos gut gewasen, mer warn
geleich noch ewing Verlobing feiern!« Der Wert mänet derzu: »Dos kenne
mer aa in der Gaststub machen, do brauchen mer net hausen harzetraten.«
Darer Asicht warn die anern aa, un se macheten, daß se neikame. Do ging
nu ein Gegratelier lus, un e mannichs Tipel Bier wur noch of das gunge
Paar leergemacht. -- 's war spät gewurn, wie alles ehämzug. Unerwags
saht der Wachtmäster zon Fadel: »Dos is in der Schwammekonferenz aa
noch net virkomme!« »Wos dä?« freget dar. »Na, daß Verlobing gefeiert
werd!« »Ach su«, saht der Tiftelschuster, »ich dacht, Harr Wachtmäster,
daß Sie emol e paar Schwamme salber ogeschnieten hätten, wär noch net
gepassiert!« Der Wachtmäster saht nischt drauf, heit machet er oder nei
in Roß, heit konnt der Fichtenbarger Kanter dositzen, dan wür er'sch
schie weißmachen!
Dos war dar gruße Tog in der Schwammekonferenz, un in der ganzen
Gegnd wur drüber geredt un gelacht. Wenn mer nu oder emol nei in der
Morgnsonn kam, soßen allemol e Sticker finf, sechs gunge Madle dorten,
die de letzte Hoffning of der Schwammekonferenz gesetzt hatten! Oeb
se'n ewos genützt hoot? -- Ich weß fei net, gehört hot mer nischt
wieder!
[Illustration]
[Illustration]
De Pfingstkantat'.
Es is ein rachtes Gelück, daß der alte Kanter F. M. Gast e sette
Matz settge feine Kantaten geschriebn hot, 's wüßt -- meiner Seel
-- manicher Kanter heitzetog net, wos er sen Leiten egal für
Kirchenmusiken zu de grußen Fast virsetzen kennt.
Su e Kanter hot überhaupt kä Zuckerlacken: Macht er käne Kerchnmusik,
do heeßts, er machet überhaupt garn nischt. Macht er weliche un se
klingt net schie, sprachen de Leit wieder, der Kanter taget nischt. Und
dos muß doch zugegabn warn: En maning Karl sei Maul paßt besser zon
Pfeifrachn, als wie zon Singe, un er singt doch.
Sei nu in en Dorf lauter settge, do ka's der Kanter machen, wie er
will, 's is net racht. Un wos möcht er net alles bedenken, daß er
niemand of de Füß tritt! Doß de Kanterei singt, dos verstieht sich von
salber.
Nu will oder aa der Gesangverein »Liederkranz« mittue. Die Verstärkung
is net esu gruß, de Hälft von dan Sängern is doch aa in der Kanterei.
Sei nu gelücklich zah Mann zamgebracht, do ka mer mit Sicherhät drauf
rachne, daß'r achte dervu Solo singe wolln. 's is überhaupt mit die
Sangesbrüder e settge Sach, mer trifft selten emol en, dar sich net
steif un fest einbild, er könnt sich geleich, wie er is, of e jeds
Theater stelln un mietsinge.
Von zah Sängern sei oder när drei Tenör und siebn Bäß. Von dan drei
Tenörn wieder ka när ener orndlich singe, un der Kanter ka vir jeden
Fast verzehn Tog lang net schlofen, aus Angst, »dar« Tenor kennt eper
emol ze huch in der Tranksteuer geroten un hescher warn. Mit de öbern
Stimm hoot er lechter ze hantiern. Do hot er doch zeerscht seine
Schulkiner, un dann sei in Dorf e ganze Hard Maadle, die singe wie de
Hädellerchn. Un aa mit de Solostimme hoots käne Nut, do hilft de Fraa
Pastern, oder ne Kanter seine Fraa oder ihre Maadle. Un dann kimmt de
Begleitung! Werd när Orgel derzu gespielt, dos is ne Leuten ze wing. 's
Musikkorps, dos sinst immer in Gericht Tanzmusik spielt, will bei de
Fasttog aa zeign, daß 's e Religiu hoot un will miettue.
Nu sei die Musekanten, die sette Kerchnmusiken zameschreibn, e
manichsmol racht narrsche Karle. Wos die alles für Instrumenter
verlange! Do langetn doch, weß der Hole, 50 Musekanten net, die dos
spieln könne. Ja, ich hoo emol e settigs Nutenbuch gesah, do sollt
sugar a Harf mitspieln! Dos fahlet noch, daß die böhmischen Harfenmähd
aa noch in der Kerch ihre Zupperei afinge; dä ich wüßt sinst ken, dar
sich of der Harf verständ.
Do is mitn alten Gast sen Kantaten e anere Sach. Dar hoot gewußt, wos
de Leit brauchn un hoot e ganze Hetz Kantaten gemacht, die sei werklich
net von schlachten Eltern. Se klinge schie, sei net esu schwer, un
wos verlangt werd, dos is aa in mesten Dörfern aufzetreibn. Dodrim
hatt sich aa der Geyersberger Kanter, wie er geleich noch Ostern e
Pfingstmusik raussuchn tat, virgenomme, of ne erschten Pfingstfeiertog
ene Kantat' vor F. M. Gast zu singe.
Der Kanter war kaum fruh, daß er die Ostermusik waghatt, do gings schie
wieder of Pfingsten lus. De Kantat war ewos Feines un passet aa racht
für seine Kräft. Se ging lus mit en lange Blosakkord, do konnt sich der
Weigelfläscher e Gitt tue mit seiner Trompet. Dann macheten de Geiger
lauter sette kläne Strich zemerscht immer of en Ton, un dann fing e
Sopransolo aa, de Pfingstgeschicht aus der Bibel ze singe. Dos mochet
sich racht schie, un de Leut konnten sich aa ewos derbei denken, net
wie bei maning anern Lied, wu niemand derhinerkimmt, wos die Singerei
engtlich ze bedeiten hoot.