«Et avoit en ceste nove ville dou roi (il s'agit d'une ville
fondée par Édouard III pour y loger son armée pendant le siége de
Calais), toutes coses necessaires, apertenans à un host.
Quant messires Jehans de Viane fu venus en Calais, et il ot veu
le siège et comment les Englois estoient amasé, ensi que pour
demorer vint ou trente ans là devant au siège, et il ot fait
visiter la poissance des vivres qui estoient en la ville, il en
fist un jour widier et partir plus de XXVIIe, hommes, femmes et
enfans, pour alegerir la ville.
Quant chil peuples issi hors premierement de Calais, auquns
Englois quidièrent, quant il les veirent issir, que il les
venissent courir sus. Si se assamblèrent à l'encontre de euls les
archiers, et les fissent requler jusques ens ès fossés de la
ville. Là i ot, entre ces Englois, auquns preudommes piteus, qui
congueurent tantos que ce n'estoient pas gens pour faire nul
contraire. Si fissent cesser les aultres de euls courir sus, et
lor demandèrent où il aloient. Il respondirent que on les avoit
bouté hors de Calais pour tant que il cargièrent trop la ville,
et aloient ailleurs à l'aventure querir lor mieuls. Ces nouvelles
vinrent au roi d'Engleterre qui, meus en pité, les fist entrer en
l'oost, et commanda que tout et toutes fuissent bien disné[137].»
[137] _OEuvres de Froissart, publiées sous les auspices de
l'Académie royale de Belgique. Chroniques_, t. V, p. 87 et 88.
Bruxelles, 1868 in-8º.