Gisant mort la noble personne
De charles le grant roy de france
Septiesme du nom d'excellence
Qui moult esleva sa couronne
Sa fin fut vertueuse & bonne
Debile en fut le droit meurdrier
Comme d'un simple chevallier
Le duc de guyenne choisy
Gisant tout mort en my la voye
Par accident qui l'eut saisy
Et de telle mort ou quasi
Son nepveu le duc de savoye
Le duc jehan que je regrettoye
De cleves veiz la mort gesir
Que debile avoit fait finer
Tout hors du terroyr crestien
Veiz qui tous aultres passa
En tous triumphes sans moyen
C'est ce turc & puissant payen
Qui douze regnes subjuga
Et deux empires conquesta
Grant fut ce mahommet banny
Mais debille l'a esbahy
Se mathussalle devoye
Qui vesquist plus de neuf cens ans
Et plus que tousjours j'escripvoye
Les mors qu'en ce lieu je trouvoye
Si me seroit petit le temps
Si prendront en gré les lisans
Chascun en peult assez penser
Et n'est besoing de leur nommer
La veiz gesir dessoubz les lames
Par nombre non a estimer
En derrieres roynes & dames
Duchesses contesses & femmes
Tant qu'on ne les sçavoit nombrer
Je me passe de les nommer
Mais beaulté haulteur ne vertu
Ne a contre la mort rien valu
Les evesques & bonnommeaulx
Les papes & simples convers
Les mendians les cardinaulx
Patriarches & peres chaulx
Tous sont la gisant a l'enveres
La mort les fait menger aux vers
Et sont leurs os sy tressemblables
Qu'ilz ne sont point recongnoissables
Les empereurs & les coquins
Les mecaniques & les roys
Contes & ducs & gallopins
Les bedeaulx & les eschevins
Povres riches faulz & adroitz
La mort a tout prins a la roys
Et n'en lerra par ses cautelles
Ung seul pour dire les nouvelles
Les converses & les prieuses
Les abbesses & les novisses
Damoiselles devocieuses
Mondaines & religieuses
Possessans & sans benefices
La mort en a fait sacrifices
Toutes a prins toutes prendra
Tout est pourry tout pourrira
Et me dist pour tout reconfort
Fresche memoire pour conclurre
Tu voys les euvres de la mort
Riens ny vault puissance ne fort
Il te fault a cella reduire
Le meilleur ou l'en te peult duyre
C'est de memoire despescher
Du scinderesse de peché
C'est qu'elle dist c'estoit raison
Combien que ce fut fort a faire
Si rentrasmes en sa maison
Ou il eut des biens a foison
Pour nous desjuner & refaire
La dame qui fut de bonnaire
M'a sceust si bien arraisonner
Qui valloit mieulx que le disner
Les choses qu'elle me monstra
Me firent penser a loisir
Tout conclud ce mont s'en alla
Ma dame quant est a cella
Plus ne fault mon penser couvrir
Adviengne qui peult advenir
L'adventure veult approuver
Qu'onques homs ne peult eschever
Lors me dist & je le t'otroye
Et si te menray celle voye
Si demanda son palefroy
Je le meneray & elle & moy
Heureux fuz quant tel guyde avoye
Plustost que dire ne savoye
Tous d'eulx nous trouvasmes sans faille
Ou devoit estre la bataille
A l'approucher j'ouyz l'effroy
Grant tourbe de gens & murmure
Coups ferir comme a ung tournay
Voulentiers fusse retournay
Pour eviter telle adventure
Ung perron devant la closture
Trouvay a grans lettres dorees
Ou j'ay telz parolles trouvees
Cy fine le chemin mondain
Cy fine la sante de vie
Cy se fiert le plus inhumain
Dont atropos juge soudain.
A le pouoir & seigneurie
Nul n'y entre qui ne desvie
Deux champions a si tresfors
Qu'ilz ont tous les ansestres mors
Accident combat le premier
Peu en attainct qui luy eschappe
S'il fault/ lors vient le grant murdrier
Debile prince d'encombrier
Qui tost occist & tost attrappe
Riens ne vault cuyrasse ne chappe
Veez cy la mortelle adventure
Ou prent fin toute creature
Au perron ne feis demeuree
Ains tiray vers les lices closes
Pour ce que je y veiz assemblee
Regardans debat ou meslee
Ou aulcunes estranges choses
La ne fuz minutes ne poses
Que je veiz en son eschauffault
Atropos seoir au plus hault
Atropos d'un habit divers
Fut paré d'estrange maniere
Bendé de couleurs en travers
Dentellé de terre & de vers
Et seant en pompeuse chayere
Contenance monstroit tresfiere
Tenant ung dar de deffiance
Contre tel qui guiere ny pense
Cy devise de la bataille faicte entre debile & le duc philippe de
bourgoigne. Et commence la quatriesme partie de ce livre.
[Illustration]
Son mareschal fut cruaulté
Qui me tint des lices l'ordonnance
Son herault estoit voulenté
Portant ung baston tout drappé
De couleurs de mescongnoissance
Son cheval estoit de doubtance
Portant le sceau d'une soucye
En telz armes nul ne s'y fie
Les lices furent de douleurs
Des mains de tristesse charpentees
Le pavillon fut de clameurs
Les bannieres furent de pleurs
Au cousté l'appellant plantees
Et les gardes de deux entrees
Furent je ne l'oubliay mye
Fielle despit & villainie
Le pavillon du deffendeur
Estoit tresrichement bordé
De toute bonté & doulceur
Les bannieres furent d'honneur
Qui moult bien paroyent en ceste
Le herault eut nom bien aymé
Qui portoit blason de proesse
Couronne d'entiere noblesse
Voulenté en place sault
Et fist crier parmy la lice
Que nulz par signes bas ne hault
N'avantaigeast en cest assault
Sur peine que l'on le punisse
Puis affin que l'on se fournisse
Il cria laissez les aller
Chascun pense de se monstrer
Lors saillit de son pavillon
Debile portant deux gisarmes
L'une fut persecution
Et l'autre consummation
Pour le dernier coup & fait d'armes
De sable sur sa cotte d'armes
Qui fut pourtraict & figuré
Ung homme mort & descharné
Et pour fournir ceste besoigne
Le deffendant sault d'aultre part
Vestu de armes de bourgoigne
Honneur le conduist & enseigne
Et ne le laisse tost ne tart
Ce fut celluy ou dieu a part
Philippe duc qu'on ayma tant
Le plus grant des ducz & vaillant
Il tenoit en sa dextre main
Une lance de bon advis
En l'autre je veiz tout aplain
Ung tergon tout paré & plain
De loz de pouoir & d'amis
Et pour le tout estre au vray mys
Sa hache fut de fermeté
Contre l'assault d'adversité
Debile sembloit moult a craindre
Et branloit ung dard de grevance
Monstrant qu'il ne se veult pas faindre
Et s'il peult sa partie attaindre
Il est mort ou mys en oultrance
Le bon duc demenoit sa lance
Et sembloit bien ung chevalier
Qui ne daigneroit desmarchier
Ainsy marcherent fermement
L'un sur l'autre les dessusditz
Debile tout premierement
Gettant son dard griefvement
Et cuida avoir tout conquis
Mais le duc qui estoit apris
Comme ung asseuré champion
Receut le coup a son tergon
De ce coup le duc se deffit
Monstrant chevalleureux devoir
Son gect met avant & partist
Si bien que peu qu'il ne deffist
Debile qui monstroit pouoir
Lors chascun se fist bien valoir
Chascun vouloit estre vaincueur
De la bataille & de l'honneur
Le duc print son bec de faulcon
Qui fut de fermeté cloué
Et debile le tresfelon
Frappa de persecution
Grans coups tous plains d'enfermeté
Chascun eut fiere voulenté
L'un fiert l'autre rabat & maille
En celle cruelle bataille
Memoire monstroit esperance
Que le duc vaincroit la journee
Pour sa tresapre resistance
Dont plusieurs foys fist apparence
Contre accident en la meslee
Mais debile par destinee
Doubtoit pource qu'il fiert & blesse
Des coups qui viennent de foiblesse
Pour savoir d'armes le mestier
S'apprendre on peult a ceste escolle
Si l'assaillant est dur & fier
Le deffendeur est a priser
Se l'un meshaigne l'autre affolle
Hardiment parmy le champ volle
Pour rebaudir les champions
Qui vault d'or trente millions
Tant ont feru & tant maillé
Chascun d'eux sans faire reprinse
Que le plus sain fut meshaigné
Foullé/ grevé/ & travaillé
Et affoibly en mainte guyse
Mais debile monstra maistrise
Car d'un coup soudain d'un quaterre
Mist mort le noble duc par terre
Aussy fut le noble duc abatu
Dont atropos la forcennee
Pour ce noble prince vaincu
Ne tint non plus que d'un festu
Et ne luy fut q'une rosee
Monstrant qu'elle est acoustumee
Et prent son singulier plaisir
A veoir gens finer & mourir
Lors heraulx comme bien apris
Prindrent ung drap texu de gloire
Et l'ont sur le noble corps mys
Et porté en terre & assiz
Au saint lieu de digne memoire
Ou l'on le trouvera encore
Tant que le monde definera
Ne jamais n'en departira.
Comment le duc charles de bourgoigne combatit messire accident.
[Illustration]
A peine fut levé le corps
Ou du moins au sepuschre mys
Que j'ouys le bruyt par dehors
De deux ostz trespuissans & fors
Chascun paré de ses amys
Accident le premier je veiz
Qui sur le ranc se vint esbatre
Monté & armé pour combatre
Cheval & bride d'arrogance
Son harnois trempé de courroux
Maleur avoit ferré sa lance
L'espee fut d'oultre cuidance
Dont moins fut batu & escoux
Et pour donner les rudes coups
A son arçon pent une masse
De fortune qui tout amasse
D'aultre part sault ung bourgoignon
Charles qui fut prince doubté
Et ressembloit bien compaignon
Qui vouloit avoir sa raison
Au plus pres de sa voulenté
Son cheval s'appelloit fierté
Et fut armé entierement
D'un harnois fait par hardement
Sa lance fut de haulte emprinse
Grant cueur luy donna son espee
Le forgeur s'appelloit maistrise
Sa dague se nommoit franchise
Pour estre vaincueur de l'armee
Quant j'euz sa façon regardee
Vice je n'y peuz parcevoir
Fors seullement de trop vouloir
La n'eut tente ne pavillon
Ou ses armes furent pendues
Ce fut en l'ombre d'un buisson
Sans bruit ne fut pas ne sans son
L'assembler de ses deux venues
Les lances qui furent agues
Coucherent tous deux d'un desir
Pour trop mieulx attindre & ferir
Accident hurta par despit
Sur le duc a toute puissance
Trois fois son cheval abatit
Dont pourtant ne fut desconfit
Mais eut cueur de sa recouvrance
Ainsi passa le cours de lances
Qui ne fut pas a l'avantaige
De ce duc ne de son bernaige
Les espees furent saisies
Pour mieulx assommer ce debat
La monstra chascun ses envyes
Le jeu ne touchoit que leurs vies
En telz perilz est qui combat
Ayde estremye ne rabat
Ne peult a ce besoing servir
En fin fault ou vaincre ou mourrir
Le duc qui fut vaillant & fier
Mist son corps a toute deffense
Mais accident pour le dernier
Empoigna son baston murdrier
C'est la masse de mal vueillance
Que fortune par excellence
Luy donna pour ceulx desmonter
Qui se veullent hault eslever
Le duc accident rebouta
Jusques fortune vint en place
Dont accident tel coup donna
Que mort a terre tresbucha
Le duc a qui dieu pardon face
De ce maleur je me soulasse
Qu'il mourut pour non faire faille
Dedans le champ de la bataille
Se la guerre fust a louer
Par ung honnorable exercite
Gensdarmes bien devez plorer
Plaindre gemir & lamenter
Le duc charles dont je m'aquitte
Et m'est confort que je recite
Que mon maistre ne fust vaincu
Par nul homme qui l'ait valu
Mais fortune tient en ses mains
Par la tresdivine puissance
Tous les affaires des humains
Tant des mauvais comme des sains
A son plaisir on fiert & lance
Car du ciel ne de l'influance
De quoy parle aristobolez
Nous n'en savons que par les faitz
Quant on a des bien a planté
Et que le tout vient a plaisir
On se dit de bonne heure né
Et que l'homme est bien destiné
Car il a tout a son desir
Mais s'il est povre au definer
Ou diffamé aucunement
On en juge tout aultrement
Dont qui veult son mal destourner
Selon la divine doctrine
Il nous fault noz cueurs retourner
Vers celluy qui tout fait tourner
Qui la lune croist & decline
C'est cil comme dit le proline
Qui au secret de ses ydees
Se joue de noz destinees
Ainsy eut accident victoire
Sur ce prince fier & puissant
Il vivra en noble memoire
Et sera nommé en hystoire
Le duc charles le tresvaillant
De luy nous cesserons a tant
Et reviendrons par pons & pas
A ce qui advint en ce pas
Accident se voulut arrester
Pour attaindre nouvelle proye
Et se fist de nouvel armer
D'un harnoys fait de deseper
Affin que de loing on le voye
Aprés se tint en my la voye
A tout ung glayve de mesure
Que l'on nommoit malaventure
Ung poingnart met a son costé
Fait de soudaine maladie
Mains en a occis & tué
Et pour avoir le champ oultré
Et plus tost vaincre sa partie
De secrete melancolie
Avoit une dague affillee
Qui mainte personne a tuee
La estoient menestrelz clerons
Harpes tabourins & vielles
Orgues & manicordions
Faisans aubades & grans sons
Tout triumphoit au som d'icelles
Chascun couroit a ces nouvelles
Chascun demandoit que c'estoit
Car la matiere le valloit
La veiz venir une lictiere
De deux licornes soustenue
Dont l'une fut bonté entiere
Et l'autre fut doulce maniere
La plus qui fut oncques congneue
Toute d'or se monstroit a veue
La lictiere & le parement
Qui cousta merveilleusement
Les deux licornes par le frain
Quattre grans princes demonstroient
Fleur de jours fut le premerain
Au bon renom qui n'est pas vain
Ces deux la premiere memoire
Les aultres deux qui suyvoient
L'un fut noble cueur sans envie
Et desdain contre villainie
Apres suyvoit grant baronnie
De dames a grant quantité
Chascun triumphoit a l'envie
Moult fut belle la compaignie
Et de richesse & de beaulté
Or est temps d'avoir raconté
De la lictiere le droit veoir
Qui vault bien le rementevoir
Comment accident combatit la duchesse d'ostriche/ et elle vaincue
l'acteur se voulut presenter pour faire son devoir Et comment atropos
l'envoya contremander par respit son herault
[Illustration]
La seoit en magnificence
Une princesse toute armee
Qui venoit pour prendre vengence
Du grief & de la desplaisance
Que ce pas luy avoit donné
Celle sembloit panthasillee
Qui vint la mort de hector vengier
Mais elle le compara chier
Son harnoys fut fat de plaisir
Et luy donna bonne pensee
Son bassinet pour garentir
Tout ce qui pouvoit survenir
A l'assault de celle meslee
Elle eut une trenchant espee
Nommee desir de bien faire
Pour mieulx grever son adversaire
Ung gavelot eut pour getter
Qui se nommoit plaisant racueil
Et le tergon pour soy garder
S'appelloit loyaument aymer
Sans changer ne de cueur ne dueil
Et puis que oublier je ne vueil
Sa cotte d'armes j'apperceuz
Plaine de cent mille vertus
La dame de son bon gré sault
Preste d'accident rencontrer
Et fist publier au plus hault
Par loyaulté son bon herault
Veez cy qui se vient presenter
Au jour qu'on luy fist assigner
C'est d'ostriche la vraye duchesse
Qui veult tenir foy & promesse
Quant accident veit sa partie
En telle beaulté & valeur
S'il eut peur je n'en doubte mye
Doubtant son emprinse faillye
Et qu'il n'en saillist a honneur
Je veit grant pouoir & hault cueur
En vingtz & quattre ans seullement
Cela l'esbahit durement
Mais forcené son conseillier
Luy dist te fauldra le couraige
Jeune arbre peult on bien ployer
Jeunesse se peult esmayer
Par fermeté & par usaige
Et si trouveras par usaige
Que qui l'assault de maladie
Morte est tost qui n'y remedie
Accident honteux sault avant
Comme cil que despit argue
La dame luy vint au devant
Lors la navra soudainement
D'un gect de fievres continue
De coup l'avons nous perdue
Helas de bourgoigne marie
Qui laissa mainte ame marrie
Accident cruel & felon
Par ce meurdre desordonné
a robbé le palladion
Le fort la benediction
Soubz qui la bourgoigne a regné
Ce nom est failly & finé
Au trespas de la bonne dame
Je prie a dieu qu'il en ait l'ame
C'estoit pour nous le troyllus
Dont troye fut reconfortee
Qui les troyans a soustenuz
En couraige & en grans vertus
Plus hector en longue duree
Car celle nous fust demouree
En nous estoit de soustenir
Ce qui nous pouoit advenir
O vous qui ce livre lisez
Pensez bien a ceste adventure
En ce beau mirouer vous mirez
Car ce trespas vous passerez
Beaulté deviendra pourriture
La mort guerroye de nature
A charger & mener affin
Son ennemy & son affin
Et peult chascun lisant entendre
Que ce m'est desplaisance dure
De veoir mors & en terre estendre
Iceulx trois a qui je dois rendre
Amour foy hommaige & droicture
Car soubz eulx j'ay prins nourriture
Ilz m'ont nourry & eslevé
Qui ne doit pas estre oublié
Quant je veiz la bataille oultré
De ceulx a qui subget je fuz
J'ay toute crainte despitee
Sy ay ma visiere baissee
Com cil qui ne veult vivre plus
Sans craindre qui me coure sus
A chascun en donnay le chois
Qu'a tous deux a une foys
Fresche memoire me disoit
Qu'a dieu je me recommandasse
Chascun ne fait pas ce qu'il doit
Car qui sent le cueur en destroit
La reigle de raison tout passe
Sy me mys en renc & en place
Pour l'assault d'accident souffrir
Ou debile s'il veult venir
Mais il vint ung herault petit
Qui portoit ung blason d'attente
Son nom fut en arme respit
Doulcement me parla & dist
Amys donnés a moy entente
Atropos qui droit cy regente
Vous mende que vous departez
Jusques a ce que mandé soyez
Respit qui n'est pas des plus grans
Me fist departir & retraire
Car atropos en celluy temps
Avoit assez de combatans
Et me fault sa voulenté faire
Fresche memoire de bonnaire
Que tant je trouve amoureuse
Se monstra de ce mot joyeuse
Comment freche memoire ramaine l'acteur en sa maison & luy devise en
chemin de ses nouvelles.
[Illustration]
Et conclud qu'il me meneroit
Au lieu ou trouvé je l'avoye
Et qu'entendement m'aideroit
Qui moult bien me conseilleroit
Pour les armes que aprins avoye
Ainsy nous maismes a la voye
Pour aller en sa demourance
Par le doulx chemin d'allegance
Memoire qui me veit muser
M'entretint de beaulx ditz & comptes
Moult bien luy seoit le parler
Le chemin me fist oublier
Et me dist entre ses racomptes
Je sçay roys ducz barons & contes
Sepulturez nouvellement
Depuis nostre departement
Loys filz du duc de bourbon
Evesque du liege tant digne
Conte du loz duc de buillon
Du royal sang prince tant bon
Qui de parens eut une mine
Accident qui la vie mine
L'a n'a gueres mort & tué
Au fort de sa meilleur cité
Le conte de chunay tant saige
Tant plaisant & tant estimé
Tant agreable personnaige
Tant de vertuz eut en partaige
Que de chascun fut desiré
Accident l'a mort & maté
D'une fievre soudainement
Avant qu'on sceust savoir comment
De luxembourg le conte pierre
Qui six foys conte se nommoit
Accident luy a fait la guerre
Et alla debile requerre
Car jeune matiere vouloit
Ces deux l'ont mys en tel destroit
Par maladie decrepite
Qu'ilz en ont fait le monde [quitte]
Edouart le bel roy angloys
Chevallereux & renommé
Qui fut estimé des francoys
En crainte tint les escossois
En son royaulme redoubté
Accident l'a a mort bouté
Subit d'une fievre soudaine
Comme du traict d'une dardaine
Phebus jeune roy de navarre
Qui chascun si fort estimoit
Accident qui trop voult conquerre
A rompu comme ung petit voyrre
Sa vie qui tant florissoit
L'un deffait & l'autre deçoit
Et a le dard si tres a dextre
Que nul n'en sceut oncques seur estre
Michiel de berghuez tant vaillant
En jeunes jours plain de prudence
De cent ans ne cent devant
Tel chevallier n'eut en brebant
Pour garde vertu & vaillance
Accident a rompu sa chance
L'an de sa vie vingt & six
En combatant pour son pays
Ainsy memoire m'entretient
De motz saiges & a planté
Et me fist comptes plus de vingt
Qui valoient qui bien en souvint
Et que chascun soit bien noté
Subit trouvasmes son hosté
Ou nous fusmes bien recueilliz
Logez a souhait & serviz
Memoire promptement manda
Le bon hermite souverain
Entendement qui ne tarda
Mais fist ce qu'elle commanda
Et vint comme prompt & soudain
Avant le jour le lendemain
C'est cil ou l'en peult conseil prendre
De tout ce que l'en veult comprendre
Dont me fut donné par conseil
Entendement que moult j'aymay
Jamais je ne veiz son pareil
Pour donner de confort resveil
Plus prudent nulle part ne sçay
Et au grant affaire que j'ay
Je croy que dieu si le m'envoye
Pour le reconfort de ma joye
Comment entendement enseigne l'acteur a se conduire en fait d'armes Et
comment il se doit armer & parer
Et commence la cinquiesme & derniere partie de ce livre.
[Illustration]
La s'assist sur une chayere
Le preudhomme devant mon lyt
Son parler sa belle maniere
Je l'eu tant agreable & chiere
Que je n'euz oncque tel delit
Entendement commence & lyt
Leçon ou l'en peult moult apprendre
Qui le veult ouyr et entendre
Amys qui veult en lice entrer
Qui est bataille perilleuse
Tout premier il doit bien penser
S'il a corps pour le fait porter
Contre sa partie hayneuse
C'est une esprouve tresdoubteuse
Tempter dieu/ est deffendu
Par le saint canon de vertu
Bien est vray qui est assailly
Et de son droit fort oppressé
L'on tiendroit celluy pour failly
Lasche recreu & deffailly
Si le gaige n'estoit levé
S'aultrement il n'estoit prouvé
Sur ce moult belle usance tint
Le saige roy charles le quint
Mais ton fait c'est ung aultre chose
C'est une batalle commune
A la fois fait en lice close
Ou selon qu'atropos propose
En plain champ sans closture aucune
Soit en plain jour ou a la lune
Riens n'y vault respit ny attente
Payer fault a la mort sa rente
Puis que c'est ung faire le fault
Et que le jour brief tu attens
Pour doubte qu'il ny ait deffault
Preparer & armer te fault
Sans prendre jour ne nuyt ne temps
D'estre bien armé tu pretens
Il te fault avoir repentir
L'armurier de divin desir
Pieces si souldees te fera
De tel art & de tel trempeur
Que vice n'y attachera
Ne jamais peché n'y prendra
Pour faire sur ton corps greveure
Ung harnois te fault de mesure
Fait d'assier de ferme propos
D'aymer dieu pour vivre a repos
De force pren tes brasselletz
Que l'on dit magnanimité
Et pour estre pompt en telz faitz
Avoir te convient gantelz
De charitable voulenté
D'un bassinet soyez armé
Fait des mains de dame attrempance
Qui vault plus que l'homme ne pense
Cuissotz & braconnier de malla
Te fault de chasteté parfaicte
Et affin que l'homme mieulx vaille
Avoir te fault & n'y fay faille
Grenes de tresbon labeur faite
Et pour faire chemin & traicte
Solerez te fault une paire
De diligence de bien faire
Tu te doibs couvrir & parer
De tes armes escartellees
Qui vallent qu'on les doit porter
Celles sont a les blasonner
De foy & de bonnes pensees
Et si doivent estre drappees
Pour monstrer seigneurie acquise
Du saint baptesme de l'eglise
Or es tu armé & paré
Comme a champion apartient
Mais pour plus estre redoubté
Il te fault estre embastonné
Ainsi te fault & le convient
Il ne pert pas temps qui retient
Les bastons te pense bailler
Dont tu as le plus grant mestier
Entendre te fault & savoir
Que qui combat de bon couraige
Il a faculté & pouoir
D'estre a pié ou cheval avoir
Chascun selon son avantaige
Mais pour commun droit & usaige
Combatre a pié est plus honneste
Que soy fier en une beste
Et si peult telz bastons porter
Chascun comme il a de plaisir
Gysarmes ou marteaulx de fer
Haches & lances pour bouter
Ou de guet lancer ou ferir
Ainsi te peult a choiz garnir
Si prens bastons de tel valeur
Que mieulx en vaille ton honneur
Celle franchise signifie
Et se doit en ce point noter
Que dieu par bonté infinie
Nous a donné avec la vie
Le franc arbitre de regner
Et pouons venir & aller
Par la voye de sauvement
Ou le sentier de dampnement
Quant a ce que conseil je donne
En cheval ne prendre asseurance
Il s'entend que nulle personne
Soit d'aulcun bien fait ou aulmosne
Ne doyt prendre en aultruy fiance
Chascun pour soy si songe & panse
Esperant que les heritiers
L'oublieront assez voulentiers
Tu peulx demander advoué
Pour tenir pour toy lieu place
C'est le saint baptesme voué
Qui ne soit pas desavoué
Pour quelque chose que l'en face
C'est cil qui esbahit la face
De l'ennemy entierement
En faisant vivre seurement
Et puis pour tes armes fournir
Tu prendras lances pour getter
Ferrees de devot desir
Le fust sera de souvenir
De la mort que dieu veult porter
Et si fais une dague ouvrer
Tel qu'el morde bien & picque
De la saincte foy catholique
Or as la lance en la main dextre
Pour injure a l'ennemy faire
Targer te fault en la senestre
Pour plus seur de ta personne estre
Qui sera de bon exemplaire
Et fault & est necessaire
L'espee trenchant de justice
Celle te sera moult propice
Or n'a plus qu'attendre a targer
Au temps pour faire les apprestes
Repentir sera l'armeurier
Fais luy diligemment forgier
Tes pieces pour estre plus prestes
N'espargne avoir contant ne debtes
Prens en soing ce n'est pour moy
Car nul ne combatra pour toy
En ce point me sollicitoit
Entendement par la raison
Et mes apprestres conseilloit
Comme celluy qui moult doubtoit
De perdre le temps & saison
Et me dist par comparaison
Le surplus a le double entendre
Car il fault s'armer & deffendre
Je luy demanday plus avant
Or sont mes pieces ordonnees
Mon harnois & mon parement
Tout se fait ordonnement
Mes besongnes sont preparees
A quoy convient temps & journees
Car tout n'est forgé a ung jour
Que dois je plus faire en ce jour
Entendement me respondit
Amys tu fais demande bonne
Ce n'est pas tout que de l'abit
Il fault labourer a prouffit
Pour la santé de ta personne
Si te conseille & le t'ordonne
Que tu rendes travail & peine
D'estre legier & en alaine
Tu te dois le matin lever
Et estouper & nez & bouche
Courir montaiges & ramper
Pour menger & beaucoup jusner
Peu dormir sur luy & fut couche
Estre chaste ce point te touche
Fouyr venimeuse pensee
Et avoir la langue attrempee