Produced by Laurent Vogel and the Online Distributed
Proofreading Team at http://www.pgdp.net (This file was
produced from images generously made available by the
Bibliothèque nationale de France (BnF/Gallica) at
http://gallica.bnf.fr)
Le Chevalier Deliberé.
[Illustration]
Cy commence le chevalier deliberé compregnant la mort du duc de
borgoigne qui trespassa devant nansy en lorraine.
Ainsi que a l'arriere saison
Tant de mes jours que de l'annee
Je partis hors de ma maison
Par une soubdaine achoison
Seul a par moy plain de pensee
Qui m'acompaigna la journee
Et me vint en remembrance
Le premier temps de mon enfance
Celle qui moult estoit m'amye
Print ung propos de verité
Et me dit celuy qui s'oublye
Fuit honneur & cy l'ame nuye
Je le tiens pour desherité
Soit d'avoir ou de la santé
Du despoir de grace divine
Que chacun n'est pas d'avoir digne
Tu vois pour la saison passee
Arbres terre & tout herbage
L'un tout vert l'autre sans ramee
Fleur & odeur toute est cassee
Plus n'est fueille ne fruit n'ombrage
Tout tend a froideur & a neige
Tout est nect sans nulle vigueur
Et n'est plus seye ne chaleur
Ainsi est de toy clerement
Qui le prin temps de ton enfance
As despendu entierement
Et jeunesse pareillement
Mis tes euvres en deffaillance
Et si n'a pas telle esperance
Que ont les arbres pour reverdir
Car jamais ne peux revenir
Dois je oublyer ou que soye
Ce traicté qui tant point & mort
Que fist ayme de montgesoye
Plus riche que d'or ne de soye
Au merveilleux pas de la mort
Sçavoir fault qui est le plus fort
De toy/ accidant ou debile
Chacun d'eulx en a tué mille
Ces deux chevaliers trescrueux
En la grant forest attroppos
Tiennent le pas trop perilleux
Treshorrible tresmerveilleux
Sans avoir jour ne nuyt repos
Et continuant leur propos
De tant combatre & de ferir
Qu'ilz feront tout homme mourir
Messire accidant le terrible
Fournit les jeunes & les fors
Et debile le treshorrible
Met a fin par coups invisibles
Ceulx dont la vigueur en est hors
Ilz font du cueur tous effors
Leurs meurtres sont si a doubter
Que nul ne les peut eschapper
Scez tu pas bien que le herault
T'a pieça noncé leurs chapitres
Tu scez que poyse & que vault
Accidant t'a livré l'assault
Tu as ouy de ses epistres
Il est temps que tu te chapitres
Car tu as touché a l'emprise
Depuis ta primiere chemise
Es tu plus fort que n'est sanson
Ou a craindre que herculés
Plus saige que n'est salomon
Plus beau que le grant absalon
Plus subtil que dyomedés
N'as tu paour quant tu penses des
Que ceulx n'ont peu les coups rabatre
De ceulx qui te convient combatre
Plus vis & plus le temps approche
Qui te convient en champ entrer
Tu sens desja ung fert qui losche
Maladie sonne la closche
En lieu de trompette sonner
Qui te semond de toy armer
Et de deffendre ta querelle
Contre la bataille mortelle
Ainsi pensif si m'en hortoit
De ce que me fut necessaire
Dont la merciay bien estroit
Et luy dis puis qu'il fault qu'i soit
Je feray ce que je dois faire
Lors je prins mon harnois de guerre
Et comme ung chevalier vaillant
M'armay & montay tout errant
Mon cheval s'appelloit vouloir
Et mon harnois je fis tremper
D'eaue qu'on appelle pouoir
Mon escu fut de bon espoir
Au moins pour longuement durer
Mon glaive fut de avanturer
Fait par ung merveilleux ouvraige
Et mon espee de couraige
Ainsi j'entreprins la conqueste
De mes adversaires doubtez
Et me mis tout seulet en queste
En suyvant la matiere honneste
Des bons chevaliers trespassez
Et chevauchay deux jours passez
Avant que trouvasse advanture
Digne de mettre en escripture
Il n'est besoing que je racompte
Mes sejours & mes reposees
Mais raison est que je vous compte
Les adventures de ce compte
Telles que je les ay trouvees
Droit a la fin des deux journees
Je m'esbatoye en ung plaine
Qu'on nommoit plaisance mondaine
Je prins en ce lieu tel plaisir
Et m'a greoit tant la contree
Que je n'en pouoye partir
Mais ains que peusse despartir
J'ay adventure rencontree
Qui venoit du long d'une pree
Qui m'escria de me garder
Et qui me convenoit jouster
[Illustration]
Je luy respondis amy cher
Du moins a ma premiere jouste
Dictes moy se estes chevalier
Vostre nom & de quel quartier
Vous estes dit or escoute
A qui qu'il poise ne qui couste
J'ay nom hutin qui tout brise
Le propre filz de gourmandise
Comme dis si n'estes vous pas
Debile ou messire accidant
Qui tiennent d'attroppos le pas
Quant je vous vis venir le pas
Je le cuiday appartement
Il dit que non certainement
Mais qu'il estoit de leur mesgnie
Premier percecuteur de vie
Lors baissa sa lance ferree
D'un fert qu'on nomme peu de sens
Et fiert en ma targe doree
Tel cop & de telle boutee
Que encore certes m'en sens
Et moy acoup a luy j'entens
Couchay ma lance cy a point
Que nulz de nous ne faillit point
La furent noz lances brisees
Mais nous gardasmes les arsons
Et mismes les mains aux espees
Toutes de folies trampeez
Et donnasmes grans horions
La frappasmes sur chapperons
D'estoc de traver & de taille
Comme chevaliers en bataille
Mais hutin faisoit vaillamment
Et me livroit forte bataille
De cops d'estocz d'eschauffemens
Courir sallir refroidissemens
Par son espee qui bien taille
Et me fut advenu sans faille
Quant la vint une damoiselle
La journee m'estoit mortelle
La damoiselle qui survint
Ce fut reliques de jeunesse
Qui resceut des cops plus de vingt
Sur ung grant tergon qu'elle tint
Par sa bonté & gentillesse
Tant exploicta que fut maistresse
au tournay que je vous veulx dire
Ou je congnuz avoir du pire
Jeunesse pour nous despartir
Dit sire hutin souffrez tant
Adventurer me fait venir
Ce chevalier errant querir
Pour veoir du monde plaisant
Hutin respond je suis content
Plus loing portera son escu
Plus tost se trouvera vaincu
Mais pour memoire de sa paine
Je luy donne de ma livree
Une barrette de mygraine
Car de telle vertu est plaine
Qu'elle sera ronouvellee
Chacune lune de l'annee
Ce present hutin me laissa
Et picque cheval & s'en va
Ainsi je portay cest assault
Par ce qu'il me fit demourer
De jeunesse qui beaucop vault
Mais je la perdis en sursault
Dont je me trouvay desolé
Si me partis tout asseullé
Et prins une petite voye
Sans sçavoir en quel lieu j'aloye
Quant hutin se fut desparty
Et jeunesse s'en fut allee
Je me trouvay en tel party
Qu'a peine pouoye partir
Du champ ne de celle valee
Ne sçay ou jeunesse est allee
Mais je me trouvay le matin
En ung couvent d'un jacopin
Je cheminay le plain chemin
Ayant pensee et souvenir
Qu'il me fist d'armes pelerin
Sans vouloir partir au butin
Des peines qu'i me fault souffir
Et droit au point du jour faillir
J'aperceuz de loing ung hermite
A l'huys de sa maison petite
[Illustration]
Si me tiray droit celle part
Et luy dis se dieu vous dont joye
Pource qu'il est meshuy bien tard
Me ferez vous de voz biens part
Ainsi que pour vous je feroye
Il me dit que bien venu soye
Et traicta moy & mon cheval
Comme ung amy especial
Luy mesmes cy me desarma
Et me logea en son hostel
Et d'un grant mantel m'affeubla
Que pourveance luy donna
Qui fut de soye riche & bel
Oncques mais je n'euz hoste tel
Car chere me fist de hait
Que je fuz logié a souhait
Sy fit a toute diligence
De l'eaue necte apporter
Par ung jeune filz d'apparence
Que on appelloit bonne enfance
Ainsi le ouys je nommer
Puis me voult mon hoste mener
En une petite chappelle
Moult devote plaisant & belle
La je fis ma devocion
Devant l'autel qui fut paré
D'un drap de satisfaction
Armoyé de contriction
Penitence l'avoit ouvré
L'ermite ma cecy monstré
Par ung gracieulx exemplaire
Car sans ce je ne puis bien faire
Il me pria que j'abregeasse
Mais oraysons pour celle foys
Puis me mena en une place
Ou il luy pleut que je soupasse
Avecques luy comme courtois
Il y avoit du lard & des poys
Et d'autres biens cy largement
Que je devoye estre content
Souvent mes yeulx en regettoye
Vers mon hoste pour veoir la geste
Et certes plus le regardoye
Tant plus voulentiers le veoye
Car son maintien estoit honneste
Blanche fut sa barbe & sa teste
Homme de bel & grant corsaige
Et ressembloit bien estre saige
Je ne me peuz oncques tenir
Que son nom ne luy demandasse
Luy priant par son bon plaisir
Mais qu'il n'en eust point desplaisir
Que son nom de luy emportasse
Il le m'accorda de sa grace
Disant je vous congnois assez
Et veulx bien que me congnoissez
J'ay travaillé moult longuement
Chevalier errant par le monde
Et suis nommé entendement
Mon nom est congneu plainement
Des meilleurs de la table ronde
Mais veant que ce n'est que une unde
De mer de la vie incertaine
J'ay fait de ce lieu mon demaine
Mon pain est moulu de sobresse
Mon vin trampé de bonne vie
Mon repas se fait en liesse
Suffisance est ma maistresse
J'ay repos sans melencolie
Ceans ne peut entrer envie
Et s'appelle ceste maison
La demourance de raison
Droit cy veulx je vivre & morir
Droit cy veulx je mes jours passer
Querir dieu le monde fuyr
Servir l'ame & le corps suyr
Qui m'a fait trop plaisir aymer
Riens ne m'est que peché amer
Sy prie la vierge d'excellence
Qu'elle me donne pascience
La chevalerie ne desprise
Ton nom ton cas & ton emprinse
Riens ne voult que l'on se desguise
Je voy & sçay tout que je y vise
J'ay par memoire lotz en marche
Ou que l'on tire ne ou que l'on marche
Ou fortune douleur & raige
Ont entreprins de faire raige
Or t'ay de ton nom devisé
ce que en veult maintenant dire
Et sçay que tu as proposé
Com hardy vaillant & osé
De livrer ton corps a martire
Devant ceulx que nulz de nature
Ne peult en nulz aages passez
Mais ont tous murtris & cassez
Accidant est tousjours surbout
Tout prest a cheval & armé
Pour tuer & affoler tout
Et debile tient l'autre bout
Cruel sans mercy ne pitié
Mais pour ung qui aura passé
La ou debile prent sa rente
Accidant en a tué trente
Je t'ay declairé ton affaire
Ton nom ton vouloir & ton cas
Riens ny vault fouyr ne retraire
Il te fault ton emprinse faire
Va te presenter a ce pas
Assez d'honneur tu conquerras
Et feras oultrageusement
Se tu vainq messire accidant
Et affin que soyes plus digne
De soustenir ceste adventure
Toy donner ung dun je m'encline
D'un glaive frere de regime
En lieu de la lance rompue
De ce pousse fier frappe & rue
Car par ce tu rebouteras
Accidant la ou tu vouldras
Pource dois a ton reveillier
Toy signer de la bonne main
Priant a dieu vouloir veiller
A ton bon ange travailler
Pour toy en ce voyage humain
Dont je prie le roy souverain
Et luy rens grace de bon cueur
Des biens dont il nous est donneur
[Ainsi nous levasmes de table]
Aprés graces a grant loysir
Et trouvay mon hoste notable
A son propos tant agreable
Que g'y prenoye grant plaisir
Il me dit vous yrés dormir
Et demain je vous monstreray
Toutes les reliques que j'ay
Lors me mena pour moy loger
En ung lieu paré a propos
Sy gentement que a souhayter
Il me fil couvrir & coucher
Sur ung materat de repos
Oncques mais si bon logis n'os
Ne lieu de plus plaisant sesjour
Sy m'en dormis jusques au jour
Grant heure fut quant m'esveillay
Et ouys sonner la clochette
Pour quoy a haste me levay
Me vestis & mes mains lavay
Honteux par negligence faicte
La messe trouvay toute preste
Q'un cordelier de l'observance
Chanta qu'on nomme obedience
L'aube dont il eut revesture
Estoit de bonne voulenté
L'amyt fut tissu par mesure
Le saint fut de chasteté pure
L'estolle fut de charité
Le manipule de loyaulté
Et le chasuble par maistrie
Fut pourtraicté de preudommie
L'autel fut de bonne & vraye foy
Et le calice de creance
Les chauetes de bonne foy
Et la lumiere quant a soy
Fut de grace signifiance
Le benoistier fut attrempance
La cloche fut entendement
Toute de bon enhortement
Toutes les nappes des autelz
Se monstroient par grant richesse
Oncques n'en avoys veuz de telz
De verité sont ouvragez
Le messel estoit de prouesse
Oncquesmais ne vis tel noblesse
Ne lieu ou dieu fust mieulx servy
Je le louay quant je le vy
La paix fut faicte d'union
Les chandeliers tous de concorde
Le marbre de perfection
Aussi de bonne intention
Les verrieres quant le recorde
Si furent de misericorde
Par tout tresrichement paree
La saincte chappelle sacree
Apres la messe celebree
Mon hoste qui eut adoré
Devotement la matinee
Me donna la bonne journee
Et me enquist doulx & privé
Comme j'auoye reposé
Je luy dis bien & me louoye
Du logis que par luy j'avoye
Lors me dit il fault que je tienne
Promesse d'ouvrir mon tresor
Il m'est force que je tienne
Et que des pieces me souvienne
Qui ne sont ne d'argent ne d'or
L'huys ouvryt qui fut de remort
La clef fut desir de sçavoir
Et la sarrure d'un miroir
Ce lieu fut ung cloistre longuet
Paré d'estranges pourtraictures
Or pensez se je fis bon guet
Pour sçavoir de ce lieu que c'est
Et mieulx congnoistre les figures
Entendement fist ces droictures
Et me dist entens et appliques
Et tu congnoistras mes reliques
Comment l'hermite entendement monstre ses reliques a l'acteur. Et luy
devise des oeuvres de messire accidant & de son pouoir.
[Illustration]
Voyez sy le soc d'une charue
Dont accidant abel occist
Par cayn tout de sa main nue
Et par une envie advenue
Celluy premier la terre ouvrit
Dont il fist mal & si meffist
Car il meurdrit chacun le juge
L'un des bons avant le deluge
Ce pillier d'extre grosseur
Est celluy que sanson ploya
Dont il abatist par virgueur
Le grant palays & sa haulteur
Pour sa femme qu'on maria
Il s'occist et moult en tua
Ce fut accidant le terrible
prouvé au teste de la bible
Voyez cy chemise enfumee
Dont dyamus si n'en peult mais
Cuydant aymer & estre aymee
Occist & brusla en la pree
Le preux & vaillant hercules
Accidant fist ses entremetz
Lyre le pourrez en mains lieux
En la nativité des dieux
En cest estuy trouverez mys
Les greffez de quoy fut tué
Cesar par esperés amys
Qui l'ont en leur senat occis:
Par marveilleuse cruaulté
Accidant a ce coup heurté
Ces choses si nous sont certaines
Selon les hystoires rommaines
Ceste bouette te veulx monstrer
Sans y advenir ou toucher
Antipater la fist ouvrer
A tenir poisons & porter
Pour alixandre despeschier
Accidant ouvra du mestier
Et fut mort et empoisonné
Du monde le plus ronommé
Ce grant fust affin qu'on le voye
C'est la lance dont archillés
Tua le preux hector de troye
Le plus a craindre dont on oye
Le plus vaillant qui fut jamais
Telz sont d'accidant les droitz metz
De ce fait plaine mencion
De troye la destruction
De cest arc & traict bien aguz
Fut occis & mys a la mort
Achilles par ung grant mesuz
Au devot temple de venus
Par paris qui fist cest effort
Accidant y besongna fort
Et fist finer par sa rudesse
Le plus vaillant qui fust de grece
Celle espee qui la fait giste
C'est celle dont mourut pompee
Par le desloyal roy d'egypte
Qui l'occist en lieu de merite
Et luy a la teste couppee
Accidant fut a celle armee
Qui desfist le pillier & l'homme
Soustenant du pillier de romme
Voyez la l'aneau envenimé
Ou print hanibal de cartaige
Le fort venim dessaisonné
Dont mesmes c'est emprisonné
Avant qu'il eust tiers ne quart aage
Accidant mesla ce bruvaige
Dont mourut l'un des vaillans princes
Qui oncques gouvernast provinces
Voyes aprés le glaive tresfort
Dont le roy marc de cornouaille
Navra lachement a la mort
Tristan dont il eut villain tort
Et fut deshonneste bataille
Accidant ne fist pas la faille
D'occire l'ystoire le fonde
L'un des bons chevalliers du monde
De cest espieu trenchant & bon
Fist occire comme traistresse
Jadis le roy agamenon
La femme du mauvais renon
De son paillart par subtillesse
Ce roy conduisoit hors de grece
Et sa femme traistreusement
Le fist mourir par accident
De ce branc desir inhumain
Occist mordrech remply de mal
Le roy artus son souverain
Et aussy messire gauvain
Nompas comme ung hardy vassal
Mais par ung aguet desloyal
Dont accident fut conducteur
Sur deux princes de grant valeur
De badelere la bonté
Fut ja oloferne le grant
Par judich a la mort bouté
Dont elle sauva la cité
Et de l'arme & du tyrant
Accident heurta bien avant
Quant par la main d'une pucelle
Mist amours en euvre mortelle
De ce clou & de ce martel
Occist jabel la femme honneste
zizaran le tyrant cruel
Ce coup fut divin & moult bel
Quant ce clou luy mist en la teste
Le peuple de dieu en fist feste
Accident faisoit telz deluges
Prouvez par livre des juges
De ces deux glaves par excés
Ce sont deux freres entre occis
Pour ce que ja ethioclés
Ne voulut rendre a polmicés
Le regne qui luy eut promys
Accident s'est au debat mys
Les escriptures en sont plaines
Es fais de thebes & d'athenes
De cest aultre espieu remondin
Tua son bon oncle fremont
Cuidant ferir par le serin
Ung sanglier qui livroit hutin
En l'espés du boys & parfont
Cest accident regreta moult
Lyre le peulx je le t'assigne
En l'advenement melusine
Ce sanglier mist a la mort seure
Le bel adous en sa jeunesse
Qui de chasser print si grant cure
Qu'il mist son corps a l'adventure
Contre le conseil de la deesse
La fist accident grant rudesse
Car il deffit les amourettes
Des dames selon les poetes
De celle grant dague affilee
Navra jacob & par embas
Amazin en une accollee
Dont il a la vie finee
Ce fust bien le baiser judas
La fist ung ort et villain cas
Accident faisoit telz desroys
Comme on lyt au livre des roys
Ce cailleau celle fronde a latz
Sont ceulx dont david par couraige
Occist le geant goleas
Qui de mal faire ne fut las
Ne a luy ne a son lignaige
Accident acheva ce gaige
Qui se fiert par divers moyens
Sur catholicques & payens
De ce chevestre fut pendu
Aman tant riche tant puissant
Pour ce qu'il avoit pretendu
A faire destruit & perdu
Le peuple juif paravant
Dont hester qui vertu eut tant
Le fist d'accidant estrangler
Et mardocheus honnorer
Je n'eu pas vesité le quart
De celluy qui fist a noter
Que l'on nous dist qu'il estoit tart
Si feismes de ce lieu depart
Et me voult mon hoste emmener
Entendement me fist muser
Es reliques qu'il me monstra
Ou ung tresmerveilleux monstre a
Ainsi nous partismes tous deux
Hors du cloistre de souvenance
Ou je prins plaisir douloureus
Ung appre soulas angoisseux
Et ung delit en desplaisance
C'est ung doubter en asseurance
C'est une seurté incertaine
Dont je ne fuz pas sans grant peine
Touteffois moult marry je fuz
Et beaucoup je le regretoye
Que je ne veiz tout le surplus
Et oultre je m'esbahys plus
De ce que riens veu je n'avoye
En ce cloistre dont je venoye
Des fais de debile le fier
Ce cas me faisoit merveillier
Mais entendement me saoulla
Me disant si a moy reviens
Le surplus te demonstrera
Et de debile on te dira
Dont il fiert ne de quelz engins
Ses bastons ne sont terriens
Mais fait de foiblesse massue
Dont mesmes le porteur se tue
Ainsy ce propos nous laissasmes
Sy prins mes armes & m'armay
Des biens de leans desjunasmes
Dismes a dieu nous embrassasmes
Sa grant bonté luy merciay
Promettre me fist & fait l'ay
Que par la refferoy passaige
Se je reschappe du voyage
Lors j'ay ma lance demandee
Aprés que je fus a cheval
Que le preudomme m'eut donnee
De regime bien ordonné
Contre la force de tout mal
Sy prins mon chemin par ung val
Qui se tiroit en une lande
Qui me sembloit estre bien grande
Ceste lande que j'ay nommee
Rappelloit en vulgal le temps
Combien qu'elle fust grande & lee
Si est elle tantost passee
Quant plaisir y est sur les rens
On y court comme font les vens
La j'aperceu pour abregier
Que temps se passe de legier
Mon cheval qu'on nomme vouloir
Tiroit en ce lieu tant au frain
Que je n'euz de tenir pouoir
Que subit ne fusse pour voir
Droit au milieu de beau plain
La subit je voys tout plain
Ung chevallier qui m'attendoit
Et que combatre me failloit
Il estoit armer de travail
Et son cheval s'appelloit peine
Son escu paroit au ciel
Paint de veiller & de sommeil
Si caduc qu'on le veit a peine
Sa cotte fut de souffrir peine
Et sembloit a le voir sans faille
Qu'il venist d'une grant bataille
J'eusse voulentiers regardé
La contance de partie
Mais possible ne m'a esté
Semblant que fusse destinee
D'esprouver sa chevallerie
Je couchay il ne faillyt mye
Et telz heurtasme noz escuz
Que tous deux fusmes abatuz
Et luy qui fut bon chevallier
Saillyt sus sans faire demeure
Si feiz je de l'autre quartier
Il empoigne son branc d'assier
Pour moy fierement courrir seure
Ma lance que je congneuz seure
De regime qu'on me fist prendre
Mis en mes mains pour me deffendre
Aprés son escu prent & joint
Pour moy assommer & confondre
Je le reboute par tel point
Deux ou trois foys sy bien appoint
Qu'il trouva bien a qui respondre
Vaillamment me savoit respondre
Et de ma part me defendoye
Le mieulx que faire lo pouoye
Mais il me rassailloit tousjours
Et me donnoit de son espee
Qui fut faicte de trop de jours
De si grans coups & de si lours
Que j'en eu la teste estonnee
Ma lance si fut tronçonnee
Par la force de moy deffendre
Et convint mon espee prendre
Tant fut cest assault combatu
Que nul de nous n'eust la pel seine
Froissasmes haubert & escu
Se l'un fiert l'autre l'a randu
Chascun a vaincre met sa peine
Dont pour reprendre nostre halaine
Nous retirasmes d'un accord
Et le vouloit bien le plus fort
Quant j'euz mon halaine reprinse
Je regarday mon adversaire
Que je crains beaucoup & le prise
Sy me mys ung peu en devise
Disant vassal de grant affaire
Je vous prie que vueillés tant faire
Pour moy de vostre nom me dire
Et je vous emprie beau sire
Sy me dist d'asseuree voix
Doulcement & de bon visaige
Noble & suis yssu des roys
Avant perceval le galloys
Congneu par mon grant vasselage
Sachez que nommé suis aage
De renconter prest & commun
Au milieu du tamps de chacun
Nul ne peult le temps trespasser
Qu'il ne passe par mes destroitz
Tel ne scet l'aage nommer
Qu'il ne me vouldroit pas trouver.
Mais il abuse ses explois
Par moy fault passer une foys
Tel est le chemin des euurex
Ou mourir jeune douleureux
Et puis que tu es en mes mains
Savoir te fault que je sçay faire
Prisonnier te rendras du moins
Je te deffye & ne te crains
Deffens toy il t'est necessaire
Il saulx avant sans moy retraire
Et recommença nostre estour
Le plus felon de tout le jour
Cy se combat l'acteur a l'encontre de aage Et quant l'acteur se rendit
prisonnier.
[Illustration]
Mainteffois le glayve qu'il eut
Me porta ce jour mains contraire
Et puis regime rompu fut
Qui mortellement me deceut
Et me greva en cest affaire
Car pour moy oultrer & deffaire
Espour dont fut fait mon escu
Me fut lors des poings abatu
Quant aage me eut desarmé
De mon bon escu d'esperance
Il s'est du tout abandonné
Pour ce qu'il me sentoit foulé
Et affoibly en ma puissance
Et ne voys autre recouvrance
Pour eschapper de ce dangier
Que de me rendre prisonnier
Lors me rendiz rescoux ou non
A aage par son grant vouloir
Et luy promys foy & prison
Asseurant de payer rançon
De son desir a mon pouoir
Doulcement me voult recevoir
En prenant mon gantellet dextre
Comme mon vaincueur & mon maistre
Puis me dist qu'il me traicteroit
En prison moult courtoisement
Mais tenir foy me convenoit
Et faire ce qu'il me diroit
Sur peine de parjurement
En commandant estroictement
Plusieurs choses dont il me charge
Qui ne m'est pas petite charge
Premier en la terre amoureuse
Ne te mesle point somme toute
La est plaisance doloreuse
Doulce savveur trop venimeuse
Et n'a pas sens qui n'y fait doubte
On m'y hait je n'y ayme goute
Aage n'est plus en amour chier
Pour ce te deffens ce quartier
Et puis au val de mariage
Ne vueille point que tu traverse
C'est ung tresperilleux passaige
Mal y sont venus gens de aage
C'est terre pour toy trop diverse
aussy ne veult que tu converse
Plus es dances ny es carolles
Dont tient oysance les escolles
Aussy je te deffens les cours
Des princes et des grant seigneurs
La sont perilz & mains faulx tours
Jeunes gens ilz quierent le cours
Pour querir proffitz & honneurs
Mais il en revient plusieurs
Par la sente de mal vueillance
Povres d'amys & de chevance
En la forest de temps perdu
Ne va plus mettre tes desduys
Tu as trop longuement vescu
Pour plus chasser a l'espardu
En partes de jour & de nuyt
Le lieu me desplaist & je y nuys
a mettre a proffit ton temps veille
En ce point aage te conseille
Joustes/ tournoys/ jeu de traveil
Te sont d'eux mesmes deffendus
Tous les matins a ton resveil
Penses & fais ton appareil
affin que soient combatus
Ceulx qui tant d'autre ont vaincus
Ton corps pour avanturer en ce lieu
Et garde l'ame pour ton dieu
Or t'ay ordonné les limites
Que je ne veulx point que tu passes
A me croire beacoup proffites
Du rebours tu te desherites
Et pers de vertu la grace
Si dis ne doubte que je face
Riens contre ce que j'ay juré
Mais tiendray foy & verité
Puis me dit qui m'eslargissoit
Affin de tenir ma promesse
Et me conseilla et vouloit
Que je prinse ma voye droite
Parmy le desert de vieillesse
C'est le chemin la seure adresse
Selon la raison de nature
Pour attandre mon adventure
Chevaulx & armes me rendit
De sa liberalle franchise
Et en prenant congié me dit
Je te donne pour ton proffit
Ce gorgerin fait de tel guise
Qui est meslé de barbe grise
Faicte de nature si franche
Que plus vivras plus sera blanche
Doncques aage me donna
Le present de barbe meslee
Je partis & il demoura
A garder ce don charge a
C'est le temps en celle contree
Ainsi j'ay la face tournee
Vers viellesse qu'on veult fuyr
Et si la devroit on querir
Ainsi la montaigne montay
Que l'on peult le my temps comprendre
Mais certes la je desvallay
Beacoup plus tost que je ne l'ay
Plus poise monter que descendre
Et me fallut tirer & tendre
Contre vieillesse le desert
Que chacun destruit & desert
Mais je n'euz gaires cheminé
Que droit a ung chemin croysé
Me suis ainsi que oublié
Hors de la voye destourné
[Que aage m'avoit enseigné]
Le santier que l'on nomme abus
Si prins comme mal conseillé
Ou plusieurs se tiennent abus
Le chemin me sembla tout vert
Et si estoit saison faillie
Le pays bel & descouvert
Fueilles & fleurs tout y appert
Abus est restaurant de vie
La je rentray en fantasie
Des haulx plaisirs de mon jouvent
Et oubliay le demourant
Lors me ressaillit souvenance
De tout mon jeune temps perdu
Vieiliesse fut en oubliance
Prison serment obligence
Plus n'en fut en riens souvenu
Il fut tout nouvel revenu
Du temps certes que je cuidoye
Avoir ce que je souhaitoye
Armes/ armures/ chiens/ oyseaulx
Tout fut submis a mon plaisir
La fis en espaigne chasteaulx
Et de chardons souvent chappeaulx
Tout conquis sans riens retenir
Abus me faisoit reverdir
Et croire de moy l'impossible
Par sa devoyance nuysible
Je ne tins puis bride ne frain
Mon cheval s'en alloit sa voye
Plus ne vis montaigne ne plain
Je fut du cuyder si tresplain
Que je ne me recongnoissoye
Ou je alloye je ne savoye
Abus me macha celle oublye
Ainsi chemine qui s'oublye
Tant ay cheminé & arré
Par la sente peu de prouffit
Sans congnoistre que j'ay arré
Que subit me suis embarré
Ou plus bel lieu qu'oncques dieu fit
La ung palais eut fait & fit
Le plus bel qu'on pourroit choisir
Et sembloit lieu pour non morir
Les carneaux estoint d'or fin
Flambans contre le soleil
Les murs sont d'argent metallin
Les fenestres de cristallin
Et le comble dont m'esmerveil
Fut couvert d'un ambre vermeil
Qui rendoit clarté & lueur
Si grant qu'on ne soit la valeur
Les fenestres furent parees
De dames et damoyselles
Si tresrichement aornees
Qu'oncquesmais ne furent trouvees
En banquet ne festes plus belles
Et pour entretenir icelles
Mains gorgias & bien en point
En ce lieu ne failloient point
Trompettes menestriers sonnoient
Sy hault que tout redondissoit
L'un chantoit les autres dansoient
En plusieurs lieux se deduisoient
chascun du mieulx qui peut faisoit
abus en ce lieu me tenoit
Qui me sembloit se estre pouoye
Que bonne adventure y auroye
Si m'adressay vers le portier
Que l'on nommoit abusion
Et luy diz tresdoulx amy chier
De palays si grant & si chier
Qui n'a point de comparaison
Vueillez moy nommer la maison
Si me respondit a motz cours
Que c'estoit le palays d'amours
Comment l'acteur c'est forvoyé et est venu devant le palays d'amours/ ou
desir vouloit qu'il entrast. Mais souvenir l'en destourna. Et de ses
adventures.
[Illustration]
Lors me retire ung peu arriere
Car d'amour je fus rebouté
Mais desir vint a la barriere
Qui me faisoit perdre maniere
Et moy d'aller moult fort tempté
Souvenir si m'a deschanter
Qui m'escria que je faisoye
Et si parjurer me vouloye
Et me bouta devant mes yeulx
Le mirouer des choses passees
Ou je veiz aage le vieulx
Qui me poursuyvoit en tous lieux
Par la foy que luy eu juree
Et si veiz toute figuree
Ma barbe paincte de meslure
Qui m'esbahyt a desmesure
Desir si me print par la bride
Me voult en amours remettre
Mais souvenir si me dist ridez
Fuiz ce lieu vieillart plain de ridez
Il te fault une aultre commettre
Jamais n'estudie tel lettre
Cul & con te fault renoncier
Car plus ne vaulx pour le mestier
Quant j'euz bien pensé a mon cas
Combien que me temptast desir
Pour le mieux je ne le creu pas
Mais luy dis tu m'excuseras
Et me feras ung grant plaisir
Si l'on me vouloit poursuyvir
Pour estre d'amours retenu
Si diz que tu ne m'as pas veu
Et combien que desir mist peine
De me rebouter en la nasse
D'amours souvenir bien a peine
Me revint en voye plus saine
En m'eslongnant de celle place
Abuz je laissay & sa trasse
Et prins la sante bon advis
Qui tost m'a en mon chemin mis
Si diz a dieu amours & celle
A qui mon service donnay
Qui vouldra que je la decelle
Des belles du monde est la belle
Tant de vertuz ailleurs veu n'ay
Elle valoit & je l'aymay
Dieu scet a quelle fin tendoye
Le celler point ne le pourroye
En ce point je tournay le dos
A amours & a sa sequelle
Rentrant a mon premier propos
Pour ce qu'en tout tenir luy volz
Ma foy & sonner ma sequelle
Et fut mon aventure telle
Qu'en viellesse je me trouvay
Trop plus tost que je ne cuiday
Le chemin y estoit tremblant
Et plain de parfondes ruelles
L'eau fut bruyneuse & suyvant
Rendant flair infect & puant
La ne croist fruit que de misere
La terre ne prouffitte guere
Les rentes par toutes valeur
Ne se payent que de langueurs
Les arbres y sont tous steriles
Et ne portent ne fleurs ne fruyt
Les fueilles sont seiches & viles
Les arbres y sont inutiles
En ce que medicine instrir
Brief c'est ung pays si destruyt
Qu'il n'est vivre qu'on y congnoisse
Fors seullement poires d'angoisse
La sont fontaines d'amertumes
Et ruisseaulx courans de souffrettes
La ne rend point clarté la lune
Le soleil n'y luyst ne alume
La sont les tenebres apertes
Regretz de biens & dures pertes
Sont les piteux plains & les chants
Qu'on y oyt par bois & et par champs
Vieillesse est travaillant demaine
Plus y siet on/ mains on repose
En vieillesse n'a heure saine
Maladie l'a en son regne
Santé en est du tout forclose
Lyesse la ne vient ne ose
Par la dure melancolie
Qui regne sur celle partie
Pres de la en voye petite
Si est une isle d'enfermeté
Que l'en dit le lieu decrepite
C'est une demeure mauldicte
Plaine de grant adversité
Je n'y ay pas encor esté
Mais bien pres me voy de sentir
L'air du lieu qui me fait fermir
On ne va pas en decrepite
Faire seulement demurance
Car elle vient & si habite
Dont le corps jusques en est quitte
De l'ame qui vit en souffrance
Vieillesse revient en enfance
Par la douleur de ce martir
Qu'on ne peult nombrer ne escripre
J'entens bien que moult est a craindre
De decrepite la demure
Mais qu'il peult a ce attaindre
Le grant purgatoire ce est maindre
Se paciance la demeure
Je prie a dieu ains que je meure
Que la je face penitance
Qui me soit a l'ame allegance
Quand je me veiz en celle nasse
De vieillesse la ou j'estoye
Je ne choisy trou ne place
Pour m'eslongner de celle trace
S'en decrepite je n'entroy
En ce point je m'entretenoye
Le moins mal qui me fut possible
En vieillesse tres terrible
La congneuz des gens une mer
Faire diverses mommeries
L'un veult ses ans dissimuler
Par soy de mistions laver
Et raire ses barbes fleuries
Autres faisoient par tromperies
Taindre leurs cheveulx & parrucques
Par aage blanches & caduques
Mais vieillesse ne peult mentir
Ne mesconter a son pouoir
Nature ne peult reverdir
Tel meshain ne se peult guerir
La ne vault charme ne savoir
Et si n'est riens plus lait a veoir
Que l'yssue de telz mysteres
A remplir tous les cymiteres
Or nous tairons de ce propos
C'est langaige melancolique
Je ne trouve sentiers ne trotz
A mon yssir car je ne potz
La me faillyt ma rethorique
Je leuz en la leçons antique
Vieillesse m'a print a souffrir
Douleur qui ne pourroit guerir
Si fais comme l'oysel qui chante
Enclos en sa petite caige
Combien que le cueur se lamente
Pour la prison qui le tourmente
Dont il quiert yssue & passaige
Toutesfois il se ressouaige
Et chante par le souvenir
Qu'il a de son passé plaisir
Aussy je me resjouyssoye
En ma vieillesse ou je me vey
Et en mes faitz passez pensoye
L'un me fist dueil & l'autre joye
Le temps ne fut pas tout uny
A corps recreu & cueur failly
Je visite celle contree
Ou j'ay grant merveille trouvee
Car en telle place sterile
J'ay trouvé ung quartier de terre
Le plus riche le plus fertile
Le meillieur & le plus utile
Qui soit d'icy en angleterre
Plus plaisant lieu nul n'eust sceu querre
La eut ung manoir en closture
Qu'on appelloit bonne aventure
Et peut a plusieurs gens sembler
Qu'en vieillesse n'a point de joye
Si a je le veulx bien monstrer
Mais il fault en l'estude entrer
Et apprendre par toute voye
Comme se mourir ne devoye
Et telle vie maintenir
Que l'en veult selon dieu mourir
Telle est la leçon de sagesse
Tel est l'effect des vertueux
Ce sont les moyens que viellesse
Demande pour puor lyesse
Ce sert aux jeunes & aux vieulx
Rien n'est tant melancolieux
Que faiz de peché & de blasme
A cil qu'il approuche la lame
Les murs de ce manoir petit
Dont moult m'agreoit l'apparence
Furent massonnes par delit
Et qui moult ce lieu embellit
Le portal fut plain de plaisance
Les fossez pour plus d'asseurance
Furent taillez parfondement
De la main de bon pancement
Le comble fut d'estudier
Le fenestraige d'acquerir
Et le pont fut de labourer
La porte fut de souvenir
Au dessus pour mieulx resplandir
Et grans banieres de plaisir
Qui faisoient a chacun entendre
Que ce lieu fut fait pour aprandre
Oyseuse si en fut bannye
Labeur si ce nommoit portier
La ne peut entrer villennye
Mais on y veult bien jalousie
Pour mieulx le temps emploier
Le passe temps pour abreger
De ce lieu se le veulx sçavoir
N'est que d'aprendre & sçavoir
Se euz desir de la entrer
Et de congnoistre le demeure
Il ne le fault pas demander
Je laissay cheval pasturer
Et vins au portier sans demeure
Disant amy en la bonne heure
Donnez moy ceans entree
Pour congnoistre ceste contree
Le portier me fut ung peu rude
Et me dit ayés pascience
Ce n'est pas icy une begude
C'est le lieu qui s'appelle estude
Le droit ennemy d'ignorance
Sy est le tresor de science
C'est la richesse de la terre
Autre avoir ne deveroit on querre
Ce lieu garde une princesse
La plus belle que on peut veoir
Dieu la fit par telle noblesse
Que jamais ne perdra jeunesse
Sans amaindrir ne main ne soir
Mouvoir ne peut ne n'a point hoir
Son nom est a chacun notoire
Et appelle on franche memoire
C'est tout le plaisir & soulas
Qu'en vieillesse trouver se peut
D'elle on ne peut estre las
Qui ne la quiert il en dit las
Et m'esmerveille se on la veult
Celle la vouldra qu'elle ne veult
Memoire c'est par adventure
L'un des secretz de creature
Vray est que nature le coffre
Donne ou memoire se trouve
Par l'ame qui vie acoffre
Par porcion & se encoffre
Pour quoy memoire naist & euvre
C'est doncques l'ame qui requeuvre
Qui dit fy ou nature cesse
doncques dieu a fait ma maistresse
Puisque ma maistresse est faicte
De dieu le maistre des ouvraiges
Sy digne chose cy parfaicte
Doit estre acquise & atraie
Et honoree par les saiges
Et doit toucher en ces langaiges
Homme qu'en vieillesse se treuve
Quant de memoire y la requevre
Et quoy qu'elle se tient muree
C'est moy labeur qui l'ay trouvee
Par l'estude que j'ay hantee
J'en ay les clefz je l'ay gardee
Nul sans vertu ne la verra
Qui memoire veoir vouldra
Apprendre fault & retenir
Et ruminer le souvenir
Mais affin que tu te conforte
En la viellesse ou je te voy
Qui est demeure dure & forte
Ouvrir je te veulx ceste porte
Va a ma dame je l'ottroy
Labeur qui a pitié de moy
M'a mis en ce noble chastel
Qui valloit ung riche chastel
Fresche memoire promptement
M'a bonté & doulceur monstree
Car elle me vint au devant
Et me receut benignement
Par bonne façon asseuree
Elle c'estoit ce jour paree
D'un drap figuré a penser
Moult merveilleux a regarder
Je vis au drap qui fut bien beau
Entrelassé d'or & de soye
Du vieulx testament & nouveau
Et sur son chef eut ung chappeau
Qui me plaisoit quant le veoye
Une odeur que je sentoye
Qu'il appelloit ramentevoir
La se tient l'oyr & sçavoir
Je luy priay par courtoysie
Veoir ces livres de valeur
Mais pourtant ne le fist il mye
Et me dit que qui estudie
Leans il soit duyt & asseur
D'apprendre sa leçon par cueur
Car memoire n'a autre livre
Que tel qui souvent luy livre
Peu proffite l'estudier
A ceulx qui en vieillesse sont
Mais se doyvent enseigner
Penser et rememorer
Ce qu'ilz ont aprins & veu ont
Ces choses au cueur joye font
Pource dis moy qu'il te plaira
Et memoire te servira
Quant j'ouyz la dame parler
Si doulcement & par tel guise
Je me prins a reconforter
Disant je vous dois honnorer
Quant par vous puis avoir aprise
Pour parvenir a mon emprise
Savoir ne veulx aultre science
Car ou le grief gist le cueur pense
Je cours je vois je m'achemine
Contre la forest d'atropos
Ce souvenir me print & myne
Car il me fault ains que je fine
Combatre pour abregier motz
Contre deux chevaliers de l'ostz
L'un d'eulx est messire accident
L'autre debile le tirant
Je demanday si par hystoires
Par legendes ou par croniques
Par escriptures ou memoires
Ou par souvenirs transitoires
Par subtilité ou practiques
Est il rien mys en faitz antiques
Des deux chevalliers si dessus
S'ilz ont jamais esté vaincus
Doncques nul ny prent avantaige
Tant fust il de grant renommee
J'ay en moy desir & couraige
Que je feray mon personnaige
Si bien a icelle meslee
Que j'auray part a la journee
Et que l'honneur m'en demourra
Ou la charonne y demourra
Quant fresche memoire entendit
A quel fin tendre je vouloye
Moult doulcement me respondit
J'ay ouy ce que tu m'as dit
Ou voulentiers conseil donroye
De parler je t'abuseroye
Mais a l'oeul je te monstreray
Ce que j'entens & que j'en sçay
Cy monstre fresche memoire a l'acteur les sepultures des anciens
trespassez. Et par les escriptures voit ceulx qui ont esté desconfitz
par debile ou par accident. Et commence la tierce partie de ce livre.
[Illustration]
Lors ouvre ung huys & va devant
Et nous mist en une champaigne
Qui fut a sa maison tenant
Le plus plain pays & le plus grant
Qui soit de paris en espaigne
La n'avoit roche ne montaigne
Chascun y peult choisir a l'ueil
Du toutes pars & a son vueil
Ce plain qui fut chose infinie
Estoit paré de sepultures
Chascune faicte & en tablie
Diversement & par mestrie
Tant d'ymages que d'escriptures
Pour congnoistre les creatures
Qu'accident avoit desconfiz
Et par debile les occiz
Lors me dist voy quelz drapperies
Et note le pas de atropos
Cy sont les charongnes pourries
Des grans honnorez en leurs vies
Consumez par chair & par os
Sçavoir le nombre je ne potz
Par art par sens ou retentive
Car c'est chose trop excessive
Au cimetere de memoire
Trouveras & ne l'oublie mie
Enfouyz par le territoire
Ceulx dont la bible fait hystoire
Exceptez enoc & helye
Qui de la puissance infinie
Et pour fournir ce qu'il doit estre
Sont mys en paradis terrestre
Les gens de quoy escript omere
Sont posez en ce cymitere
Tous ceulx dont recite valere
Et de qui tulles rend mistere
Et dont oroze fait matere
Tous sont pourriz les corps en biere
Tous en la terre transgloutiz
Et prins comme a elle lotiz
Accident fiert debile assomme
Atropos leur livre la place
Ilz n'espargnent femme ne homme
Tous mettent affin c'est la somme
La mort tousjours prent & enlace
Et qui par nature se passe
Et luy dessire son habit
Dont elle a douleur & despit
Ceulx qui firent ja les grans faitz
En babilonne la cité
Les clercs d'athenes tant parfaitz
Les troyans dont on fait les laitz
Et dont on a tant recité
Chascun d'eulx a la mort cité
Et les amazones armees
Sont toutes a la mort livrrees
Et tout l'ancien testament
Peulx cy savoir voy cy le livre
Mais pour goutter plus fermement
Veez cy ou ceulx du temps present
Sont mys pour les premiers ensuyvre
Lys & retiens & si te mire
Cy sont ceulx que mort oppressa
Depuis l'an trentecinq en ça
Lors me mist ainsi qu'a costiere
Et veiz bien par les sepulcres
Qui furent de neufve matiere
D'aultre façon d'aultre mistere
Les armoyries les figures
Par les habitz & escriptures
Que les mors ou je me trouvoye
Furent du temps que je vivoye
La eut epitaphes sans nombre
Dont oncques n'en congneuz les corps
Si m'en tais pour fuyr encombre
Puis l'ame assista & fist umbre
Et me monstra de plusieurs mors
Les tumbes dont j'ay par recors
Fresche memoire plus que assez
De ceulx de mon temps mors & trespassez
Ainsi entray en celle forge
Dont atropos menoit l'ouvraige
La veiz ung seigneur de saint george
Que debile print par la gorge
Et vinquit par son vaisselage
Il fut tenu & grant & saige
Entre tous ceulx de son quartier
Mais il est mort pour abregier
Je mys l'ueil sur ung empereur
Filz de puissant roy de bahaigne
Sigismond prince de valeur
Hardy & vaillant deffenseur
Du grant empire d'alemaigne
Debile qui maint en meshaine
La mort a batu & maté
Maulgré empere & royaulté
La je veiz de ligny le conte
Que de luxembourg se nommoit
Des vaillans fut dont on racompte
D'accident oncques ne tint compte
Et tousjours a luy combatoit
Mais debile qui l'ettendoit
Au pas pour en prendre vengence
L'occist a petite deffence
La gisoit ung portinglois
Duc de conymbre filz de roy
De grans vertuz en tous endroitz
Prince vaillant saige & courtoys
Plus renommé de luy ne voy
Mais au milieu de son arroy
Accident par mortelle envie
L'occist & luy osta la vie
Tout subit si gettay mon oeil
Sur ung cercueil de pierre dure
Ou gisoit mort loys du bueil
Qui bien valoit qu'on en fist dueil
Et qu'il fust plainst oultre mesure
Accident par malle aventure
Faisant armes le fist mourir
Ou plus bel de son adventure
Deux papes dessoubz ung tombel
Je veiz la felix & eugene
Ceulx firent ung cisme nouvel
Chascun pour faire son plus bel
Voult estre pape & avoir regne
L'eglise en douleur & peine
Mais debile les mist en terre
Et fist la fin de telle guerre
La veiz deux anglois capitaines
Estre pourriz & consumez
En france ont eu bruyt & grant regnes
En guerre firent de grans peine
Et furent doubtez & aymez
Thaleboth & scalles oultrez
Furent par accident tous deux
Et furent ilz cent foys plus preux
La fut que je regretay fort
Par ces epitaphes escriptz
Mis gilles de bre[taigne mort]
Par accident qui luy fist tort
Et pres de luy haultement veiz
Par debile mort & occis
Le duc arthus plain de vaillance
Qui fut connestable de france
La fut ung jacques de bourbon
Roy de naples moult a priser
Le monde ne luy sembla bon
Si voua la religion
Et fut observant cordelier
Mais debile pour le monstrer
Pour par royalle dignité
Ne l'a de la mort respité
Soubz une tombe de laton
Trouvay ensevelliz deux corps
Dont fut honneste l'edicion
Cevely furent hyre & pothon
Des bons guerroyers du temps lors
Des mains de debile sont mors
Maulgré leur bonne renommee
Qui leur est aumoins demouree
Ung sepulchre assez noble & riche
Je trouvay sur ung allemant
Ce fut le duc aubert d'ostriche
Celluy ne fut aver ne chiche
Mais prince treslarge & vaillant
Accident luy vint au devant
Qui l'occist par son vaisselage
Se que l'en tint a grant dommaige
En ce lieu cy ne failloit mye
D'estre bien mengé de vermine
Le roy lancelot de hongrie
L'un des grans de la germanie
D'estre ung empereur bon & digne
Accident le print en haine
Et l'occist par piteux exploitz
Au grant diffame des pergois
J'aperceuz ung chevallier bon
Qui ja fut oultré par debile
C'est le seigneur de varembon
Et pres ung homme de renom
Qu'accident meurdrist entre mille
Ce fut le seigneur d'esmavile
Devot vertueux & vaillant
Son nom fut jacques de chaillant
La gisoit soubz sepulchre hault
Ung chevallier mort en ce plain
Natif du pais de henault
Dont le los retint qui moult vault
C'est messire jacques de lalain
Vingt & deux fois tout de sa main
Arme ains trente ans acompliz
Et l'a accident a mort mys
Accident qui de vaincre soigne
Avoit fait pourrir en ce pré
Ung que je dois mettre en besoigne
Cornille bastart de bourgoigne
Chevallier preux & asseuré
A son escu qui fut barré
Parmy lyons & fleurs de lys
Congneuz le chevallier de pris
Boexe seigneur de la varenne
Grant seneschal de normendie
Gisoit mort en celle garenne
Plat ou sablon & en l'arenne
Comme la commune mesgnie
La fut sa vaillance affoiblie
Son sans & son plaisant parler
Car accident le fist finer
Je congneuz deux ducz de millan
L'un fut philippes maria
Mort & infect a son grant dam
L'escripvain n'y eut pas mys l'an
Et pres couchoit & reposa
Celluy duc qui millan gaigna
Le duc franusque duc d'escosse
Debile les occist par force
La veiz thibault de neuf chastel
Ja de bourgoigne mareschal
Son nom & tiltre furent bel
Pieça n'eurent bourgoignons tel
Car il estoit hardy vassal
Chevallier fut preux & loyal
Debile en fist la place nette
Par la mort qui emporte sa debte
De faulbourg le conte la gut
Et trois freres de tholongon
Chascun d'eulx homme vaillant fut
Mais debile si les deceut
Et les desconfist sans rançon
Ceruant le chevallier de non
En sens & proesse acomply
Gisoit la mort ensevely
Je rencontray en mon chemin
Ung cercueil de grant artifice
Ou fut le chancellier Rolin
Son tiltre qui fut en latin
Le monstroit parfait en justice
Sumptueulx fut en edifice
Hospitaulx & moustiers fonda
Et puis par debile fina
Ung grant prince devenu riens
La gisant si non cendres & pouldres
C'est le duc charles d'orliens
Ou tant eut de bonté & de biens
Qu'on ne le peut nombrer ne souldre
Et aprés que dieu vueille absouldre
Fut de dunoys le bon seigneur
Des deux fut debile occiseur
Croy conte de poursuan
Mort ou les aultres ne trouvay
Du bon duc fut du chamblan
Son frere l'alloit poursuyvant
Jehan jadis conte de chauvay
Vertueux furent je le sçay
Et chevaliers renommez
Mais debile les a tuez
Ung corps qui fut grant de haultesse
Je congneuz la soudainement
Le roy Alphons plain de proesse
De grant estat & de largesse
Et vault le ramantement
Maulgré son ost & sa grant gent
Debile prinst sur luy sa reste
Ou plus fort de sa grant conqueste
Je trouvay sautez charny
Et mains de l'ordre de thoison
Habourdin la vire crequi
Molembaix bruneau & aussi
De la lain messire symon
Roys ducz contes a foison
Tous mors sont en champ & en ville
Par accident ou par debile
La furent en la terre mys
Deux hommes de grant apparence
L'ung fut cosme de menicis
Et jaques cueur ceulx ont acquis
Et mys ensemble grant finance
Mais n'y vault ne or ne chevance
Debile qui tout vainc & tue
Les assomma de sa massue
Je mys l'ueul sur deux connestables
Sainct pol & alvre de la lune
Puissans furent & redoubtables
Chevalleureux & honnorables
Chascun eut part de sa fortune
Accident leur monstra rancune
Et les fit mourir et finer
Au plus hault point de leur regner
Valerain seigneur de morueil
Gisoit par les lames piteuses
Mort estandu en son cercueil
Et auprés que oublier je ne vueil
Touchoit le seigneur de saveuses
Pour leurs oeuvres chevalleureuses
Debile le tresgrant ouvrier
Ne les voulut de mort espargnier
Varonic qui tant eut de puissance
Ja congneuz a la rouge croix
Se feiz je le duc de clarence
Accident les mist en oultrance
Et occist deux nobles anglois
Plus bas gisoit ung escossois
Contre de glatz en pourriture
Despeschié par telle adventure
Vergy couches & brederodes
Veiz gisans dessoubz les sentiers
La congneuz a l'abit & modes
Des grans du prince de rodes
Mains bons & vaillans chevaliers
De caleraues & de templiers
Mont trouvay mors par accident
Et par debile qui tout fent
La gent des marches de turquie
Ung bon chevallier de grant fait
C'est le blanc de la volaquie
Sur les turcs fist mainte saillye
Moult de proesses y a fait
Debile l'a du tout desfait
Et abatu sans relever
Celluy qu'on doit bien honnorer
Charles duc de bourbon je veiz
Par debile mort & maté
Et pres de luy deux de ses filz
Furent d'accident mors & pris
Dont dommaige fut & pitié
L'un fut de beau Jeu herité
L'autre jacques qui fut puisné
Chevallier de moult grant beaulté
La veiz le prince d'antioche
Qui eut des chippres l'eritiere
Contre accident il ne tint coche
Mais l'enfouyt tout d'une approche
Au milieu de telle maniere
Debile par aultre maniere
Eut la mort de mortelle prince
Loys qui fut d'orenge prince
La gisoit mort sur ung pesac
Ung grant prince ou j'allay le cours
Si fut le conte d'armegnac
Grant mal me fist a l'estomac
Et me fist rendre plains & plours
Aussi le bon duc de nemours
Trouvay par accident finé
Et en ce cymitere enterré
La fut de sicile le roy
D'onneur le droit fruyt & vray arbre
Debile l'occist par derroy
Et si veiz mort en ce terroy
Gisans soubz ung tumbeau de marbre
Deux de ses filz ducz de calabre
Moult vertueux & renommez
Par accident mors & tuez
La gisoit ung roy d'angleterre
Henry qui fut plain de simplesse
Son escript monstroit a l'enquerre
Qu'il ne fut pas homme de guerre
Ne prince de grant hardiesse
Il fut de tresroyal haultesse
Mais accident qui tout desrune
Luy donna trop malle fortune