L’ xā′tg̣a xao-î′ntcꜝus. Giê′nhao l’ a′og̣a taqꜝā′dᴀs giên xagwa′-i ʟgwul
at g̣a′-iasi g̣ei lᴀ dᴀ′nnanᴀ′ñasi giên xō′-iga-i gī lᴀ gī′dagañañ
wᴀnsū′gᴀñ. Hᴀn l’ wā′gᴀñ qa′odihao qꜝenʟ̣g̣ā′g̣ada′-i ʟ̣u ʟꜝ qꜝodā′lañ
wᴀnsū′ga. Giê′nhao ʟꜝ wa′nx̣idañ wᴀnsū′ga.
Giên xo-iga′-i l’ ku′ng̣ᴀstᴀ qꜝā′wosi′ giên gī′nᴀ sqasałā′ñgᴀñasi.
Giê′nhao g̣a lᴀ qā′gasi. Gu tꜝa īg̣awa′dies. Giê′nhao la xā′x̣idesi giên
qāñ djā′g̣alᴀñ gī lᴀ isdā′si. Giên dag̣ala′-ig̣a î′sîñ ʟꜝ wā′ng̣asi giên
nᴀñ gī lᴀ ga î′sdag̣a-i gā′was gī lᴀ ga îsda′s. Xo-iga′-i xᴀ′ñgiañ lᴀ gi
kꜝᴀñx̣idai′yañ wᴀnsū′gᴀñ.
Giên î′sîñ la at lᴀ wa′ng̣ag̣as. Tꜝag̣u′n łgia′da lᴀ qē′xas. Ga-i ê′sîñ
nagi la îsda′si. Ga-i ê′sîñ wᴀ gi g̣asgidᴀ′ndixᴀn l’ ʟ̣′sgug̣eiłs. Giên
î′sîñ l’ wā′ng̣aias. Sqol łgiä′da ê′sîñ lᴀ qē′xas. Lᴀ qē′xatcꜝusi.
Kꜝiä′ł qā′g̣alᴀñ djā′g̣alᴀñ gī lᴀ isdagᴀ′ñasi.
Giên gaatxᴀ′n ʟꜝa at lᴀ wā′ng̣atcꜝī′wus. Tao xē′tg̣a kꜝiū kida′s gut lᴀ
g̣odᴀx̣uā′ l’ qā′giagᴀña′-i ʟ̣ū la g̣ᴀ′nstᴀ ga īłî′ndjida hā′na stîñ
gᴀndā′lʟꜝxas. Giê′nhao gutłg̣ᴀ′stᴀ lᴀ gi ʟꜝ gᴀ′nsgîts giên qꜝadᴀ′ñ lᴀ ʟꜝ
qa-idai′yañ wᴀnsū′gᴀñ. Giên lā′na g̣ā′g̣odia g̣ᴀ′nstᴀ ʟꜝ gᴀndā′lʟꜝxas giên
nᴀñ lā′na aog̣ā′gas na′-ig̣ei lᴀ ʟꜝ g̣ᴀ′lqatcꜝas.
Giên gu lᴀ îsugwā′ñ qa′odi hᴀn ʟꜝ sī′wus lᴀ gū′dᴀñᴀs. “Qꜝaku′n g̣a nᴀñ
sîng̣ā′g̣agᴀn gaosg̣oā′nᴀñga.” Da′-ixᴀn ʟꜝ kîl lᴀ gū′dᴀñᴀs. G̣ē′di qa′o⁺di,
“l’ qā′gᴀñ,” ʟꜝ sī′wus, “Haku kꜝiā′ñ lᴀ qagî′tx̣îsg̣ᴀ′łdag̣ᴀñdalga.” Giên
ʟꜝa atxᴀn lᴀ gi lᴀ anagoā′ñg̣agoa′g̣as. “L’ qagiagᴀñᴀ′ñ” ʟꜝ sā′was. I′lᴀ
xō′yā x̣ida′las. Agᴀ′ñ lᴀ gᴀ′ñałdagᴀñdā′las. “Xêng̣ᴀ′lsʟa” hᴀ′nhao ʟꜝ
kī′g̣adagᴀñgᴀñ. Gī′ałg̣ala′ñ hao lᴀ g̣ᴀlsʟgᴀ′ñdaalañ wᴀnsū′ga. L’
qatcꜝai′yas giên hᴀn l’ sī′wus, “Qꜝaku′n gu kungᴀn ł qꜝeitʟ′sʟgᴀn.”
Giê′nhao lnagā′-i g̣a nᴀñ ē′ʟꜝxagidagasi hᴀn sā′wañ wᴀnsū′gᴀñ “Nᴀñ
djā′ada dalᴀ′ñ î′stᴀgᴀn dalᴀ′ñ gi qꜝᴀ′ngᴀñgîn gī łᴀ xᴀ′ñgiañ gī′dag̣ao.”
Giên gañā′xᴀn lnagā′-i xā′-idᴀg̣a-i wa′ʟ̣uxᴀn lᴀ gi gatā′ isdā′si. Xā′gu
łkia′da qadjî′l xō′ya tā′ga at g̣ān ʟꜝ tā′ga ga′-ihao ʟꜝ tā′na î′sîñ
wᴀnsū′ga. Gā′-ihao nᴀñ dj′ā′das gī ʟꜝ gī′daiyañ wᴀnsū′ga.
Ḷꜝa at lᴀ wā′ng̣aiyas gū′hao l’ gaosg̣oā′nañañ wᴀnsū′ga. L’ xā′tg̣a gᴀm
ʟgui′ l’ ta-ig̣aga′-i g̣ᴀn u′nsᴀtgā′ñañ wᴀnsū′ga. Sîñg̣ᴀ′lg̣ada xadᴀ′ñ
nā′g̣a qꜝe-u′ gi ʟg̣ao sū′ug̣a lᴀ qꜝa′o-ułai′yañ wᴀnsū′ga. Giên qā′g̣alᴀñ
gī gataga′-i lᴀ îsda′asi. Tꜝē′djî at lᴀ giä′dag̣awañ wᴀnsū′gᴀñ.
Sqa′og̣ahao l’ xā′tg̣a ī′ʟꜝxagidag̣ea′lañ wᴀnsū′gᴀñ.
Giê′nhao xō′ya lanā′g̣a gu ki′łgu lᴀ gūdā′ñag̣ᴀn xadᴀ′ñ gi lᴀ
nīdjā′ñag̣ᴀn. “Ha′da-i. Na-iku′n gu hao kun ʟ̣g̣ō′diañ wᴀnsū′ga. Nᴀñ
sî′ng̣ag̣aiya′g̣ᴀn hao l’ qꜝeitʟsʟai′yag̣ᴀn. G̣a ła qa′-it, ha′da-i.”
Giê′nhao g̣a lᴀ qā′-idañ wᴀnsū′gᴀñ. Yan kuna′-i wᴀ gu ʟ̣′g̣odiasi. Gᴀm l’
ʟ′gusi wᴀ stᴀ ga′o-ug̣ᴀñᴀs. L’ ū′na gī′nᴀ sg̣u′nxᴀn sqasqꜝā′x̣unᴀñagᴀs.
Giê′nhao lᴀ la qꜝa′-itx̣idañ wᴀnsū′ga.
Giên l’ ū′na lᴀ qꜝa-itʟ̣′sʟas giên l’ g̣ā′xag̣îłs. Giên gu lᴀ
qasqꜝā′gidasi giên g̣a agᴀ′ñ lᴀ sîłu′ng̣alᴀñesi. L’ dagwī′g̣asʟas. Giên
stᴀ lᴀ qā′-idesi giên lnagā′-i xā′-idᴀg̣a-i gī la g̣ᴀ′nstᴀ lᴀ sā′wañ
wᴀnsū′gᴀñ. Giên lnagā′-i xā′-idᴀg̣a-i wa′ʟ̣uxᴀn l’ qꜝe′itg̣aasi.
Ga-iʟ̣ū′hao lᴀ ʟꜝ ha′-iludayañ wᴀnsū′gᴀñ.
Hao ʟan l’ g̣e′ida.