De middel om de Pocken tot Argiers ſonder Chirurgijn te gheneſen.
Myn Patroon Alli Pegelin hadde onder ſijne Slaven eenen ghenaemt Ian
Motoſa, de welcke ſchandelijck geraeckt was van het Napelſe quaet, ſoo
datmen oordeelde dat hy niet bequaem was in qualiteyt van een Slaef
eenighen arbeyt te doen. Het voor-Iaer quam aen, ende de Galeyen ſouden
in Zee gaen. Men commandeerde Ian Motoſa ſich te inbarqueren om te
roeyen. Deſe ordre behaeghde hem gants niet, want hy dachte dat een
ſtoove bequamer voor hem ſoude zijn als den arbeyt vande Galeye. Hy
gaet na ſijn Patroon, ende ſeyde hem, uwe Signorie heeft gecommandeert
dat ick my ſoude imbarqueren inde Galeyen, tot welcken arbeydt ick
gants onbequaem ben, ende ick ben altoos geexcuſeert gheweeſt, door
dien ick niet geſont ben. Pegelin vraeghde hem wat gebreck hy hadde. Hy
antwoorde ront uyt, de Pocken. De Pocken ſeyde Pegelin al lachende,
imbarqueert u inde Galeyen, dat ſal u gheſonder zijn als in Spaignen te
ſweeten. Het welcke Pegelin ſeyde, waren Arreſten in ’t Parlement
gearreſteert ſonder appel. Ian Motoſa imbarqueerde ſich, men doet een
Keten aen zijn Voeten ghelijck aen d’ andere Slaven die roeyden, ende
men dede hem arbeyden gelijck de andere. Sijn daghelijckſe koſt was out
ende droogh Biſcuyt, zijn drincken klaer Water. ’t Eynde van 40. daghen
(ick hebbe het met mijn Oogen gheſien) was Ian Motoſa ’t eenemael
gheneſen, de reden daer van is, om dat hy door den grooten arbeydt uyt
der maten ſeer geſweet hadde, ende daerenboven drooge Koſt gegeten.
Die ghenen welcken de Pocken hebben, mogen deſe remedie gebruycken ſo
het haer belieft, om geneſen te worden.