Dyo forme need is: hweerso en kynd jongh is finsen ende fitered
noerd wr hef, jefta (sud) wr birgh. Soe moet die moder her kindes
eerwe setta ende sella ende her kynd lesa ende des lives bihelpa.
Dioe oder need is: jef da jere diore wirdat, ende di heta honger wr
dat land faert, ende dat kynd honger stere wil, so moet dio moder
her kindes eerwe setta ende sella ende capia her bern ky ende ey ende
coern deerma da kinde des lives mede helpe.
Dyo tredde need is: Als dat kind is al stocnaken, jefta huus laes,
ende dan di tiuestera nevil ende calde winter oen comt sa faert
allermanick oen syn hof ende oen sin huis ende an waranne gaten, ende
da wiilda dier seket diin holla baem ende der birgha hlii, aldeer
hit siin liif oen bihalda mey. Soe weinet ende scryt dat onieriga
kind ende wyst dan syn nakena lyae ende syn huuslaes, ende syn fader
deer him reda schuld, to ienst dyn honger ende winter nevil cald, dat
hi so diepe ende dimme mitta fiower neylen is onder eke ende onder
da eerda bisloten ende bitacbt, so moet dio moder her kindes eerwe
setta ende sella omdat hio da bihield habbe ende biwaer also lang so
hit onierich is, dat hit oen forste ner oen honger naet forfare.