‘Thenne syre Launcelot rose vp or day. And tolde the heremyte. It
were well doon sayd the heremyte/that ye made ye redy/and that ye
dysobeye not the aduysyon. Thenē syr Launcelot toke his .vij.
felowes w^t hym/& on fote they yede from Glastynbury to Almesbury.
the whyche is lytyl more than .xxx. myle. And thyder they came
wythin two dayes for they were weyke & feble to go. And whan syr
Launcelot was come to Almesbury wythin the Nunnery/quene Gweneuer
deyed but halfe an houre afore/And the ladyes tolde syr
Launcelot/that quene Gweneuer tolde them all or she passyd/that syr
Launcelot had be preest nere a twelue month and hither he cometh as
fast as he may/to fetche my corps. And besyde my lorde kyng
Arthur/he shal bury me.’