‘Than syr Launcelot rose vp or day/& tolde the heremyte/It were wel
done sayd the heremyte that ye made you redy/& that ye dyshobeye
not the auysyon/Than syr Launcelot toke his vii felowes with hym/&
on fote they yede from glastynburye to almysburye the whyche is
lytel more than xxx myle/& thyder they came within two dayes for
they were wayke and feble to goo/& whan syr Launcelot was come to
almysburye within the Nunerye quene gweneuer deyed but halfe an
oure afore/and the ladyes tolde syr Launcelot that quene Gueneuer
tolde hem al or she passyd/that syr Launcelot had been preest nere
a twelue monthe/& hyder he cometh as faste as he may to fetch my
cors/& besyde my lord kyng Arthur he shal berye me/’