‘Than syr Launcelot rose vp or it was day, and tolde the heremyte
therof. It were well done sayd the heremyte that ye made you redy,
and that ye dysobeye not thys aduysyon. The[=n]e syr Launcelot toke
his .vii felawes with hym, & on foote they yede from Glastynbury to
Almesbury, the whyche is lytyl more than xxx myle. And thyder they
came wythin two dayes for they were weyke and feble to go. And whan
syr Launcelot was come to Almesbury wythin the Nonnery, quene
Gweneuer deyed but halfe an houre afore. And the ladyes tolde syre
Launcelot that quene Gueneuer tolde them all or she passyd, that
syr Launcelot had been preest nere a twelue moneth, and hither he
cometh as faste as he may for to fetche my corps. And besyde my
lorde kynge Arthur he shal burye me.’