Je congneus ung seigneur de Varembon moult recommandé chevalier en
honneur & vaillance. Lequel me compta une advanture a luy mesmes advenue
au propos de la vertu de loyaulté. La premiere femme d’icelluy seigneur
de Varembon fut fille du conte de Villars Cessay/ celle dame se
surnommoit de Villars moult noble loyalle & vertueuse dame. Cestuy
seigneur son mary/ fut homme amoureux & querant sa plaisance & ne
gardoit pas lors si bien la loyaulté qu’il devoit a sa femme touchant
mariage comme il deust bien faire Et vray qu’il avoit en sa terre une
povre jeune femme nommee Jehanne Ramee Laquelle demoura jeune veufve &
sans mary Le seigneur la vit belle s’acointa d’elle moitié amour &
moitié crainte pource qu’il estoit son seigneur & tant qu’il en fist a
sa voulenté & l’ayma fort tant que en celle povre maison de la Ramee il
venoit souvent coucher avec elle en une chambre bien mal paree &
estoffee d’ung povre lit bien dur comme ung marteras en linseux de
grosse toille & souvent mal buez & blanchis Et par folle amour le
chevalier se contentoit avec la Ramee. Comme il advient que par espace
de temps les adventures sont sceues par rapors ou autrement la noble
dame de Varembon fut advertye que son seigneur hantoit la Ramee Elle
comme vertueuse ne blessa & n’oublia point sa loyaulté mais
vertueusement & par discretion manda ceste povre femme & par belle &
doulce parolles luy fist congnoistre son peché dequoy elle ne fut par
icelle dame mauvaisement traicté mais luy enquist comment elle traictoit
& couchoit son seigneur & mary/ quel lit/ & quel acoustrement de
linseulx & de couverture elle avoit La femme lui dist sa povreté dont
elle estoit honteuse pource que si hault homme que son seigneur elle ne
povoyt mieulx loger & recepvoir La noble dame consola la povre creature
en monstrant parfaicte lealle vertu Luy fist bailler ung bon lit de
duvet coissin & oreiller de mesmes fins linseux & bonne couverture Et
luy dist m’amye je vous baille provision pour mieulx & plus honnestement
loger monseigneur que vous n’avez peu faire vous recommandant sa santé &
sa personne La povre femme print le present & ne demoura pas gramment
que le seigneur de Varenbon vint bien tart a l’hostel de la Ramee trouva
sa chambre trop mieulx estoffee qu’elle ne souloit dont il s’esmerveilla
& luy demanda ou elle estoyt si bien meublee La povre femme luy compta
comment ma dame sa compaigne l’avoit interroguee & luy fist le conte des
demandes & responces & que advertie estoit de sa povreté/ elle luy avoit
donné l’estoffe de son lict doubtant qu’il ne fust mal traicté en povre
logis dont la santé de sa personne peust de pis valoir En conclusion le
chevalier fut honteulx & repentant de son peché congneut la bonté &
loyaulté de la noble dame sa femme maria la Ramee & l’abandonna & depuis
garda plusgrant loyaulté a sa femme qu’il n’avoit fait & ainsi l’une
loyaulté rappelle l’autre Qui doit estre a toutes femmes patron &
exemple.