Chapitre .ix.
Ung demy ceingt qui soit noir en couleur
Aura ma dame pour son noble corps ceindre
Frere tout d’or de ducas ou meilleur
Car je congnois qu’elle est bien en valeur
Pour la servir sans fiction ou faindre
Ce demy ceingt ne doit le corps estraindre
Mais soustenir les faictz & supporter
Des misteres que dame doit porter
Ce demy ceingt donne forme & parure
Sur le bon corps & affin qu’il florisse
Il se doit veoir par sens & par mesure
Car c’est des pieces que danger nous paincture
C’est ung habit sans cuider ne malice
En le monstrant se soit sans malefice
Telle vertu comme je monstreray
Selon le nom que je luy bailleray
Le ceingt sera de magnanimité
Que l’on construit pour force de courage
Il sera noir pour monstrer fermeté
Contre les vices & leurs auctorité
Mectant peché soubz les piedz en servage
La ferrure/ l’or fin/ & l’ouvrage
Signifie la riche acoustumance
D’avoir vertus tousjours en souvenance
Comme le ceingt n’estraint le corps ne blesse
Cueur magnanime ne blesse mais conforte
Qui peult vaincre des vices la rudesse
Il passe Hector en vigueur & proesse
Par fermeté se monstra dure & forte
Panthasilee qui fut de vaillant sorte
Vaincu n’a tant a l’espee trenchant
Que ung petit cueur qui de mal se deffent
Le ceingt soustient les menus utensilles
Et les utilz dont dames sont garnies
A les servir comme femmes subtilles
Soient vieilles/ jeunes/ femmes/ ou filles
Pour estre mieulx triumphe bien fournies
Cueur magnanime prepare au corps les vies
Et fait porter a une femme tendre
Ce que ung geant n’oseroit entreprendre
Cueur magnanime ne se mue ne change
Pour parolles pour durté pour menace
Vice despite & le mect en la fange
Peché destruit comme seroit une ange
C’est des vertus la fleur & l’oultre passe
Force de cueur ne peult estre sans grace
Pource prions la vierge qu’elle imprime
En nous la grace de vertu magnanime
Magnanimes soyons en tous noz faictz
Nostre courage en vertu employons
Lasches desirs soient par nous deffaitz
Si parviendrons au loyer de biens faictz
A nostre ayde ce bon Dieu appellons
De bon vouloir le servons & louons
La gist la force d’un bon cueur qui desire
Vaincre les vices tant que vertu n’empire