Chapitre .viii.
Ung cordon fault pour ma dame lacer
De soye bleue pour mieulx lustrer l’abit
On ne le peut trop gentement tisser
Tant vault ma dame qu’on la doit agenser
De telle estoffe qu’il n’y ait contredit
Le lacet lye le corps & la unyt
Car cotte & piece entretient fermement
Ou mal iroit tout nostre habillement
Le lacet tient le corps en sa droicture
Le lacet tient la piece bien assise
Le lacet fait moult de tours par mesure
Pour mieulx servir a ce qu’il a de cure
Et tenir ferme la chose plus exquise
Le lacet veult que son service on prise
Nom de vertu luy doit estre donné
Pour estre mieulx nostre fait ordonné
Le cordon bleu sera loyaulté dicte
Fille de foy & mere de prouesse
Loyaulté est parolle sans redicte
Vouloir sans fin en verité confite
Lyen d’amour qui ne rompt & ne cesse
Ceste vertu appartient a duchesse
Car qui la pert noblesse diminue
Et ne doit plus pour noble estre tenue
Loyaulté tient honnesteté sans tache
Loyaulté tient chasteté en son estre
Bonne pensee en loyaulté s’atache
Loyaulté est le crochet & l’atache
Ou vertu veult avoir repos & estre
C’est le vray scel l’escripture la lettre
D’honneur/ de sens bonté & preudhommie
Qui n’est loyal honneur l’excommunie
Soyons loyaulx faulceté soit chassee
Qui n’est loyal il n’est digne de vivre
Par loyaulté amour est confermee
Loyaulté tient deux cuers en assemblee
Sans departir & union ensuyvre
Loyaulté est le tesmoing & le livre
Enquoy amours escript les amoureux
Qui sont esleuz du nombre des eureux
Se le lacet fait maint tours en laceant
Pour emploier l’effect de son service
Loyaulté tient des chemins plus de cent
A bien servir au lieu ou son cueur tend
Franc diligent & ne se montre nice
Loyaulté est une vertu propice
Pour gaigner cueurs & en bien rappeller
Ung fourvoyé pour seurement aller