de France et d’Engleterre, euist [esté] fait ne tenu ens ou roiaulme de
France, et fait la grignour plenté d’apertisses d’armes. Et dura moult
longement de l’entrée de march jusques en la fin dou mois d’aoust;
et furent devant bien soissante mille honmes. Considerés les grans
coustages qui en nasqirent. Il me fu dit et recordé, et ce fait assés
à croire, que on euist fait, fondé et ordonné sus noient deus milleurs
chastiaus plus biaus et plus fors que Agillon n’est, des deniers qui
despendu, en tenant les saudoiiers, i furent. Qant li signeur de l’oost
veirent que, par ces assaus que il faisoient, il ne pourfitoient riens,
si en furent tous abus et esmervelliet. Bien savoient que par dedens
estoient droite flours de gens d’armes, et bien le moustroient, car il
ne s’esbahissoient de nulles nouvelletés que on lor fesist. Et orent
li signeur un aultre consel, car il envoiièrent querre à Thoulouse,
huit les plus grans enghiens qui i fuissent. Et encores en fissent il
faire et carpenter quatre plus grans assés, et fissent, sans cesser,
ces douse enghiens jetter nuit et jour par dedens la forterèche. Mais
chil dou chastiel estoient si bien garitté et par si bonne ordenance
que onques pière d’enghien ne les greva, fors à tois des manandies.
Et avoient chil dou chastiel bons enghiens qui debrisoient tous ceuls
de dehors, et sus huit jours il en rompirent et brisièrent jusques à
siis, dont chil de l’oost furent très courouchiet, et avisoient toutdis
nouvelles soutilletés par grant art et avis, conment il les peuissent
le plus adamagier. Fº 108.
P. 123, l. 1 et 2: jusques à le nuit.--_Mss. A 1 à 6, 8 à 17_: jusques
à mienuit. Fº 132.
P. 123, l. 19 et 20: fors as thois des manandies.--_Ms. A 7_: fors aus
tours des manandies. Fº 126 vº.--_Mss. A 1 à 6, 11 à 14, 18, 19_: fors
aus tours des manantises. Fº 132.--_Mss. A 8, 15 à 17_: fors ès tois
des maisons. Fº 120.--_Mss. A 23 à 33_: fors aux tours des manoirs. Fº
151 vº.--_Mss. A 20 à 22_: fors qu’ilz effondroient les combles des
tours. Fº 192 vº.
§ =250=. P. 123, l. 25: Ensi estoit.--_Ms. d’Amiens_: Ensi estoit li
castiaux de Aguillon et chil qui dedens estoient, ouniement assailli
et par pluisseurs mannierrez; car priès que touttez les sepmainnez,
on y trouvoit et avisoit aucune cose de nouviel, et chil dou castiel
ossi pour yaux deffendre. Che siège durant, il avint par pluisseurs
foix que messires Gautiers de Mauni s’en yssoit à tout cent ou deux
cens compagnons, et en alloient par oultre le rivierre de lor costet
fourer, et ramenoient, veant chiaux de l’host, souvent grant proie,
dont li Franchois avoient grant annoy. Et avint ung jour que messires
Carlez de Montmorenssi, marescal des Franchois, chevauchoit et alloit,
bien cinq cens compaignons tous à cheval avoecq lui, et amenoient grant
proie en leur ost. Si encontra monseigneur Gautier de Mauni, liquelz
se feri entre eux à ce qu’il avoit de gens. Là eut bon hustin et fort,
mès briefment li Englès en ewissent eu dou pieur, se n’ewist estet li
comtez de Penebruc qui vint au secours à bien trois cens compaignons.
Lors y eut bataille durement forte, et moult de blechiéz de l’un lés
et de l’autre. Finaublement, li Franchois wuidièrent le place. Et fu
li sirez de Montmorensi mout dur navréz et à grant meschief sauvés.
Et concquissent li Englèz le proie, et le amenèrent en leur castiel
et ossi pluisseurs prisonniers. Enssi et touttez lez sepmainez deux
fois ou trois y avoit des rencontres, des hustins, des assaux et des
meslées. Fº 88.
--_Ms. de Rome_: Ensi que je vous recorde, estoit li chastiaus
d’Agillon et chil qui le deffendoient, asalli par pluisseurs manières
et ordenances, car priès toutes les septmainnes on i trouvoit et
avisoit auqune cose de nouviel. Et aussi chil dou chastiel, pour
euls garder et deffendre, contrepensoient à l’encontre tous jours.
Le siège durant devant Agillon, il avint par pluisseurs fois que
messires Gautiers de Mauni s’en issi hors à tout cent ou siis vins
compagnons, et en aloient par oultre la rivière de lor costé fourer,
et ramenoient, voiant ceuls de l’oost, souvent grant proie, dont li
François avoient grant anoi. Et avint un jour que mesires Carles de
Montmorensi et li sires de Saint Venant cevauçoient, et avoient en lor
route bien cinq cens compagnons, et ramenoient grant proie en l’oost,
laquelle il avoient requelliet sus le pais, pour avitallier l’oost. Si
se encontrèrent les François et les Englois desous Agillon. Messires
Gautiers ne volt pas refuser, conment que il euist le mains de gens;
et se ferirent ils et li sien en ces François, et li François entre
euls. Là ot dur hustin et fort, et maint honme reversé, blechiet et
mort, et fait pluisseurs grans apertisses d’armes. Toutesfois li
Englois n’en avoient pas la millour pareçon et euissent perdu, mais
cils rencontres avint si priès dou chastiel que li contes de Pennebruq
et mesires Jehans de Lille et li compagnon qui ou chastiel estoient,
les veirent; si salirent hors et vinrent tout à temps à la meslée.
Et trop à point fu secourus messires Gautiers de Mauni, car il le
trouvèrent enclos entre ses ennemis, et entendoient moult fort à lui
prendre, qant chil Englois, fresc et nouviel, se boutèrent dedens euls
et les requièrent moult avant, en sus de mesire Gautier de Mauni et
le remontèrent. Entrues que ces François et Englois se combatoient
et entendoient à conquerir par armes l’un sus l’autre, la proie que
li François menoient fu tous jours cachie des gros varlès avant, et
missent à sauveté au pourfit des François. Les Englois n’orent aultre
cose que l’esbatement des armes, et se departirent les Englois et les
François casquns l’un de l’autre. Messires Gautiers, dit de Mauni,
et li compagnon d’Agillon rentrèrent en la garnison, et li François
retournèrent en l’oost. Et ne savoient chil qui parloient de ce
rencontre à qui donner l’onnour de la journée, ou as François ou as
Englois. Fº 108 vº.
§ =251=. P. 125, l. 8: De telz rencontres.--_Ms. d’Amiens_: Encorres
avoecq tout che, chil seigneur de France fissent ung jour armer tous
chiaux de l’host, et coummandèrent que chil de Toulouse, chil de
Charchasonne, chil de Biauquaire et tout chil de leur senescaudie
assausissent dou matin jusquez à miedi; et chilx de Chaours, de
Roerghe, de Aghinois, à leur retrète jusquez au viespre; et chilz qui
premiers poroit gaegnier le premier pont dou castiel, on li donroit
tantost cent escus. Li dus de Normendie, pour mieux furnir cel assault,
fist assambler grant plenté de nefz et de chalans. Li aucun entrèrent
ens pour passer le dite rivierre, et li aucun passèrent au pont.
Chil dou castel, qui virent l’ordonnance de l’assault, furent tout
appareilliet de eux deffendre. Lors coummencha uns plus fors assaux
qu’il n’avoient encorres eut. Qui donc veist gens abandonner vie et
corps, et aprochier le pont pour gaegnier les cent escus et presser
l’un sour l’autre si comme par envie, et qui regardast chiaux du
castiel ossi yaux deffendre vassaument, il se pewist bien esmervillier.
Finablement, au fort de le besoingne, aucun se missent par une nacelle
en l’iauwe par desoubz le pont, et jettèrent grant kros de havés au
pont leveis, et puis tirèrent si fort qu’il rompirent lez chainez
qui le pont tenoient, et le abaissièrent jus par forche jusquez au
droit pont. Qui adonc veist gens lanchier sus ce pont et trebuchier
li ungs sus l’autre dix ou douze en ung mont, et veist chiaux de le
porte d’amont jetter grandes pières, pos de cauch et grans mairiens,
bien pewist veir grant fuisson de gens mehaignier et morir et jus del
pont trebuchier, qui oncques puis ne se relevèrent. Touttesvoies fu li
pons gaegniés par forche au darains jusques à le maistre porte, mès il
cousta grandement de leurs gens assés plus qu’il ne vaulsist. Quant li
pons fu gaegniés, chil de l’host eurent plus affaire que devant, car il
ne peurent aviser voie coumment il peuissent gaegnier le porte. Si se
retraissent à lors logeis, car il estoit tart et priès de le nuit. Si
avoient besoing de reposer. Quant il furent retret, chil dou castiel
yssirent hors et refissent le pont plus fort que devant. Fº 88.
--_Ms. de Rome_: De tels rencontres et de tels hustins i avenoient
souvent, le siège tenant, sans les assaus et les escarmuces qui
estoient priès que tous les jours à chiauls dou chastiel. Et ce estoit
grandement en la desplaisance le duch de Normendie et des signeurs
de France. Et seoient là plus par erredrie que pour cose que li
chastiaus vausist quatre fois, ne toutes les signouries qui au chastiel
apendoient, mais tous les jours il le quidoient avoir à volenté et
ceuls qui dedens estoient. Ce estoit la cause pour quoi tant il s’i
tenoient, ne point il ne s’en voloient partir ne aler avant, non que
li chastiaus de Agillon demourast derrière à lor contraire; car avis
lor estoit, se il le laissoient derrière, et elle lor fust ennemie,
elle lor torroit lors pourveances par terre et par aige. Pour ce et
pour lor honnour, rendoient ils grant painne à l’avoir. Et de ce se
arguoit durement li dus de Normendie que tant se tenoient, et que si
vaillanment les Englois, qui dedens estoient, se portoient. Et avoit
juret li dus de Normendie que le siège d’Agillon ne leveroit par nulle
condition que ce fust, se li rois, son père, ne le remandoit, si
aueroit les Englois, qui dedens Agillon estoient enclos, à sa volenté.
Or avisèrent li François une autre manière d’asaut, et fist on armer
un jour tous ceuls de l’hoost; et qant il furent armé, li signeur
ordonnèrent que chil de Toulouse, de Carcasonne, de Biauqaire et tout
li honme des senescaudies desus dictes qui là estoient, fesissent
assaut dou matin jusques à midi, et chil de Bighorre, de Roergue, de
Qersi et d’Aginois, à lor retraitte, jusques à viespres, et chils qui
premierement poroit conquester le pont aueroit cent esqus.
Li dus de Normendie, pour mieuls furnir cel assaut, fist venir et
asambler sus la rivière grant plenté de nefs et de calans. Li pluisseur
entrèrent dedens pour passer la ditte rivière, et li auqun passèrent au
pont que il avoient fait. Qant chil dou chastiel veirent l’ordenance
de l’assaut, si furent tantos tout apparilliet pour deffendre. Lors
conmença uns trop plus fiers assaus que il n’i euist encores eu. Qui
veist là gens abandonner vies et corps, et aprocier le pont pour la
convoitise de cent esqus gaegnier, et presser l’un sus l’autre ensi
que par envie, et qui veist aussi cheuls dou chastiel euls deffendre
vassaument, de toutes ces coses il se peuist grandement esmervillier.
Finablement, au fort de la besongne, auqun appert compagnon se missent
en un batiel desus la rivière, et vinrent desous le pont et jettèrent
grans gros cros et havés de fier au dit pont leveis, et puis tirèrent
si fort que de force il rompirent les chainnes que le pont portoient et
tenoient, et l’avalèrent jus par force. Et qui adonc veist gens lancier
sus ce pont et tresbuchier l’un sus l’autre, diis ou douse en un mont,
et qui veist ceuls de la porte d’amont, as deffenses, jetter pières et
blechier honmes, il peuist de toutes ces coses avoir grant mervelle, et
moult en i ot de trebusciés en l’aige. Toutes fois li pons fu conquis
par force, mais il cousta grandement des François plus que il ne
vausist. Qant li pons fu gaegniés, chil de l’hoost eurent plus à faire
que devant, car il ne porent aviser voie conment il peuissent gaegnier
la porte. Si se retraissent à lors logeis, car jà estoit tart, et
avoient li plus bien mestier de reposer. Qant il furent retrait, chil
dou chastiel issirent hors, et tantos il entendirent au pont refaire,
et le refissent plus fort que devant. Fₒₛ 108 vº et 109.
§ =252=. P. 126, l. 25: A l’endemain.--_Ms. d’Amiens_: A l’endemain,
vinrent doy maistre enghigneour au ducq et as seigneurs de son consseil
et dissent, se on les volloit croire et livrer bois et ouvriers à
fuison, il feroient quatre grans cas, fors et haulx, sour quatre
grandes fortes nefs que on menroit jusques as murs dou castel, et
seroient si hault qu’il sourmonteroient lez murs, par quoy chil qui
dedens lez cas seroient, se combateroient main à main à ciaux qui
seroient sour les murs. Li dus y entendi vollentiers, et coummanda que
chil quatre cat fuissent fait, quoy qu’il dewissent couster, et que on
mesist en oeuvre tous les carpentiers dou pays, et que on leur payast
largement leur journée, par quoy il ouvraissent plus apertement et plus
vollentiers. Chil quatre chat furent fait à le devise et ordonnanche
dez deux maistrez en quatre fortez nefs, mès on y mist longement, et
coustèrent grans deniers. Quant il fu parfait et les gens d’armes
dedens entré, qui à chiaux dou castiel devoient combattre, et il eurent
passet le moitiet de le rivierre, chil dou castiel fissent desclichier
quatre martinéz que il avoient nouvellement fait faire pour remediier
contre lez quatre cas dessus diz. Chil quatre martinet jettèrent si
grosses pièrez et si souvent sus ces cas, qu’i[l] furent bientost [si]
debrissiet, que lez gens d’armez et chil qui les conduisoient, ne se
peurent dedens garantir. Si les couvint retraire arrière, ainschois
qu’il fuissent oultre le rivierre. Et en fu li uns effondrés el fons de
l’aige, et le plus grant partie de chiaux qui dedens estoient, noiiet:
dont che fu pitéz et dammaiges, car il y avoit des bons chevaliers et
escuiers. Fº 88.
--_Ms. de Rome_: A l’endemain vinrent doi mestre des enghiens que
li dus de Normandie avoit mandés et fait venir de moult lonc à grans
coustages. Et dissent au duch et as signeurs: «Faites nous delivrer
bois et ouvriers, et nous ferons et ordonnerons quatre enghiens que
on nomme kas, et les ferons hauls et fors et bien batilliés, et sus
quatre fortes nefs, que on menra jusques as murs dou chastiel; et
seront si très hault que il sourmonteront les murs. Et auera, en ces
kas, estages où gens d’armes se meteront, et se combateront, main à
main, à ceuls de dedens, et par cel assaut, se jamais il doivent estre
conquis, il le seront.» A ces paroles entendirent li dus de Normendie
et li signeur volentiers, et leur sembla raisonnable. Et furent tantos
ouvriers mis en oevre, bos amenés et achariiés, et estoient bien deus
cens carpentiers ouvrans. Et furent fait chil enghien, nonmés kas,
sus quatre grosses nefs, à la devise et ordenance des deus mestres
enghienneours, qui menoient les ouvriers. Qant chil enghien nonmés
kas furent parfait, et les gens d’armes dedens entré qui à ceuls dou
chastiel devoient combattre, et il orent passet la moitiet de la
rivière, chil dou chastiel fissent descliqier quatre martinés que il
avoient nouvellement fait faire, pour remediier contre les quatre kas
desus dis. Chil quatre martinet jettèrent grosses pières et si souvent
sus ces kas que il furent bientos tous confroissiés et debrisiés, que
les gens d’armes, qui dedens estoient et chil qui les conduisoient,
ne se peurent garandir. Si les couvint retraire arrière, avant que il
fuissent oultre la rivière. Et en fu li uns effondrés au fons de
l’aige, et la plus grant partie de ceuls qui dedens estoient, noiiet:
dont ce fu pités et damages, car il i avoit de bons chevaliers et
esquiers, qui grant desir avoient de lors corps, pour leur honnour,
avanchier. Fº 109 vº.
§ =253=. P. 127, l. 28: Quant li dus.--_Ms. d’Amiens_: Quant li dus de
Normendie et li signeur de France virent le grant mescief, et que par
ce il ne pooient venir à leur entente, il furent mout courouchiet; et
fissent les autres trois nefs et les chas cesser et retraire, et yssir
hors tous chiaux qui dedens estoient. Si ne pooient li seigneur plus
aviser voie, mannierre ne enghien coumment il pewissent le fort castiel
de Aguillon concquerre, et se n’y avoit duc, ne comte, tant fust grans
sirez, ne prochains de linage au ducq de Normendie, qui osast parler
dou deslogier; car li dis ducs en avoit parlet moult avant qu’il ne
s’en partiroit, si aroit le castiel à se vollenté et chiaux qui dedens
estoient, non se li roys ses pèrez ne le remandoit. Si avisèrent li
seigneur que li comtez de Blois, li comtes de Ghinnez, connestablez
de Franche, li comtez de Tancarville se partiroient dou siège et s’en
repairoient en Franche pour compter au roy le mannierre dou siège et
quel cose li roys volroit que li dus sez filz en ordonnast. Si se
partirent chil troi seigneur dessus nommet, et aucun chevalier de
Franche ossi, par le bon congiet dou ducq, et s’en revinrent à Paris
deviers le roy de Franche, et lui recordèrent toutte l’ordonnance dou
siège d’Aguillon et le couvent de chiaulx de l’host et ossi de cheux
dou castiel. Si en fu li roys moult esmervilliéz coumment tant se
pooient tenir, et ne remanda mies adonc le duc son fil, mès s’acorda
bien à ce que il tenist le siège et que il les conquesist par afammer,
puisque par assault ne les pooit avoir. Or vous lairons à parler dou
siège d’Aguillon, et parlerons dou roy englès et coumment il ariva en
Normendie, en l’ille de Coustentin, en celle meysme saison, sus l’enort
de monseigneur Godeffroy de Halcourt. Fº 88 vº.
--_Ms. de Rome_: Qant li dus de Normendie et li signeur de France
veirent le grant mescief, et que par ce il ne pooient venir à lors
ententes, il furent moult courouchiet, et fissent les aultres trois
nefs et les kas cesser et retraire, et issir hors tous ceuls qui dedens
estoient. Si ne pooient li signeur plus aviser voie, manière ne enghien
conment il peuissent le chastiel de Agillon avoir et destruire. Et se
n’i avoit prince ne baron, tant fust grans sires ne proçains de linage
au duc de Normendie, qui osast parler dou deslogier, ne aler d’aultre
part entendre, car li dus en avoit parlé moult avant que point de là ne
se departiroit, si aueroit le castiel à sa volenté et ceuls qui dedens
estoient, con longement que il i deuist mettre, non se li rois son
père ne le remandoit. Si avisèrent li signeur que li contes de Ghines,
connestables de France, et li contes de Tanqarville se departiroient
dou siège et s’en retourneroient en France, pour remoustrer au roi
l’estat de son fil, le duch de Normendie, et dou siège qui tant avoit
cousté et coustoit encores tous les jours. Si se departirent de l’oost
chil doi conte desus nonmé, assés par le gré et congiet dou dit duch,
et cevauchièrent tant par lors journées que il vinrent à Paris, et
trouvèrent le roi et la roine et la duçoise de Normendie et les dames.
Si furent chil signeur conjoi et requelliet liement dou roi et de la
roine, de tous et de toutes; et demandèrent de l’estat dou duch et dou
siège. Il lor en comptèrent assés. Si demora la cose ensi et li sièges
devant Agillon. Nous nos soufferons à parler dou duc de Normendie, et
parlerons dou roi d’Engleterre. Fº 109 vº.
§ =254=. P. 128, l. 29: Bien avoit.--_Ms. d’Amiens_: Vous avés bien
chy dessus oy coumment messires Ghodeffroix de Halcourt, qui estoit
li uns dez plus grans barons de Normendie, escei en le indination et
malivolensce dou roy Phelippe de Franche, et ossi coumment il vint en
Engleterre, où li roys englès le rechupt liement et le retint de son
hostel et de son consseil, et le assigna de terre et de pencion grande
et rice pour lui et pour son estat. Chilx messires Godeffroix avoit
pris en grant anoy et despit le courouch dou roy de Franche, et mettoit
et rendoit toutte le painne qu’il pooit, que li roys englèz volsist
ariver en Normendie. Et bien li disoit que Normendie estoit ungs dez
gras pays de tout le monde et dez plentiveux de tous biens, et que trop
grandement il y feroit le prouffit de lui et de ses gens. Tant consilla
et enhorta le roy englès que il eut affection et desir de y venir et
de faire une chevauchie en Franche plus grande que oncque n’avoit
fait; si fist tout cel estet son apparreil très grant et très gros de
touttes coses. Et entroes qu’il s’appareilloit, pluisseurs lettrez li
vinrent de Gascoingne dou comte Derbi, son cousin, qui se tenoit à
Bourdiaux, et li segnefioit à quel puissance li dus de Normendie seoit
devant Aguillon et avoit ou dit castiel asegiet ses gens. Si eut li
roys pluisseurs pourpolx, et touttesfoix celli où il s’enclinoit le
plus, estoit de aller lever le siège devant Aguillon et combattre lez
Franchois.
Et messires Godeffrois de Halcourt, d’autre part, le reconssilloit
de ariver en Normendie, si comme vous avés chy dessus oy, si ques
li roys englès, sus cel estat, fist ung grant appareil de naves et
de vaissiaux, grans et petis, et de touttes pourveanches qui à gens
d’armes appertiennent, et les fist touttez aroutter et appointier ou
havene de Hantonne; et fist un especial et grant mandement de tous
ses hommes dont il se pooit aidier, à estre à Londres ou environ,
le vegille monseigneur Saint Jehan Baptistre. Tout y furent au jour
denommet, pourveu et garni pour passer le mer avoecq lui. Assés tost
apriès le jour Saint Jehan, li roys parti et prist congiet à le roynne
sa femme, et le recoummanda en le garde dou comte de Kent son cousin,
dou seigneur de Perssi et dou seigneur de Noefville, et son royaumme
en le garde de ces seigneurs et de quatre prelas, l’archevesque de
Chantorbie, l’arcevesque d’Iorche, l’evesque de Lincolle et l’evesque
de Durem; et n’eswuida mies son royaume tellement que il n’y demorast
assés de bonne gent pour le garder et deffendre, se mestiers faisoit.
Li rois englès s’en vint à Hantonne, et là entra en mer et touttes ses
gens ossi, dont il y avoit belle carge. Et pooient y estre quatre mil
hommez d’armes et dix mil archiers, sans les Galès et aucuns Irois qui
sieuwoient son host tout à piet. Or vous nommeray aucuns seigneurs qui
estoient avoecq le roy: premiers li prinches de Galles ses filx, qui
lors estoit en l’eage de treize ans ou environ, li comtez de Herfort,
li comtez de Norrenton, li comtez de Cornuaille, li comtes de Warvich,
li comtez de Sufforch, li comtez d’Arrondiel, le comtez de le Marche,
li comtez de Hostidonne, messires Renaux de Gobehen, messires Jehans
de Biaucamp, messires Loeys de Biaucamp, messires Rogiers de Biaucamp,
li sirez de Ros, li sirez de le Ware, li sirez de Felleton, messires
Guillaummes Filx Warine, li sires de Willebi, messires Guillaumme de
Windesore, li sires de Brasseton, li sirez de Multon et pluisseur autre
banereth et chevalier. Et se missent en mer et singlèrent che premier
jour à l’ordonnance dou vent et dez maronniers au léz deviers l’ille de
Grenesie. Et fist li roys patron de se nave monseigneur Godeffroy de
Halcourt, en qui il avoit grant fiance. Fº 88 vº.
--_Ms. de Rome_: Bien avoit li rois d’Engleterre oy recorder que li
François tenoient les camps en Gascongne, et que li dus de Normendie,
à poissance de gens d’armes, seoit devant Agillon. Et tout l’estat
dou pais, ses cousins, li contes Derbi, li avoit escript, et que sur
ce il euist avis et consel, car ensi que li pais avoit esté gaegniés,
il se perderoit, se on n’i pourveoit. Et se il estoit perdus, ce ne
seroit point à recouvrer en grant temps ou espoir jamais, car les
villes se fortifieroient et garniroient aultrement et plus fort que il
n’euissent esté en devant. Et aussi li chevalier dou pais qui tourné
françois estoient, jamais ne retourneroient en l’obeissance dou roi
d’Engleterre; et tout li aultre, qui espoir poroient venir à celle
volenté, n’i prenderoient point bon exemple. Toutes ces coses considera
bien li rois d’Engleterre. Si eut avis et volenté que, à poissance de
gens d’armes et d’archiers, il passeroit la mer, et s’en iroit prendre
terre à Bourdiaus sus la Geronde et lever le siège de devant Agillon;
à tout le mains, il en feroit son acquit. Si fist un mandement et
semonse de gens d’armes à estre à Londres as octaves de la Saint Jehan
Baptiste. Tout i furent, chil qui mandé et escript estoient. Et se
departi li dis rois dou chastiel de Windesore, et vint à Cènes, et de
là à Eltem, et toutdis estoit la roine en sa compagnie. Qant li rois
d’Engleterre ot tout son estat ordonné, et ses pourveances furent
prestes, et sa navie toute ordonnée, tant à Wesmude, à Pleumude et à
Dardemude, il fist traire ses gens petit à petit de celle part, et
cargier la navie, et puis prist congiet à la roine, et le reconmanda en
la garde des Londriiens. Et puis se departi et enmena avoecques lui,
son fil, le prince de Galles, Edouwart, l’ainnet de tous ses enfans, et
pooit avoir pour lors environ quinse ans.