et lor remoustra l’ensengnement le senescal de Biauqaire. Tout s’i
acordèrent et ordonnèrent tantos cinq cens armeures de fier, bien
montés et plains de bonnes emprises, et se departirent un soir de
l’oost ou conduit dou dit senescal, et cevauchièrent toute celle nuit.
Sus le point dou jour, il vinrent assés priès de une bonne ville fremée
qui se nonme Anthenis, et estoit nouvellement rendue as Englois, et là
dedens avoit grant garnison de gens d’armes et d’archiers. Et avoient
les Englois requelliet tout le pais autour de euls, et fait venir le
bestail de tous lés, et assamblé ens ès praieries desous Antenis. Et
tout ce savoit bien li dis seneschaus, et la poissance des Englois qui
dedens estoient. Il i pooit avoir environ cent armeures de fier et cent
archiers. Si dist li seneschaus au duch de Bourbon et à mesire Jaqueme
de Bourbon, son frère, qui là estoient, et as marescaus: «Signeur,
nous trouverons la proie jà sus l’eure de prime, que chil de la ville
bouteront hors ens ès praieries; et qant nous saudrons avant, il n’est
riens si vrai que les Englois, qui sont chaut et hastieu, se bouteront
hors pour le rescourre. Si nous fault avoir avis sur che et jeuer de
l’enbusque, par quoi il soient atrapé et la ville prise. Velà un petit
bois: nous nos meterons dedens, et envoierons deus cens des nostres
lever la proie, et verons conment les Englois s’en maintenront.»
Chil signeur françois s’ordonnèrent ensi que li seneschaus parla, qui
fu uns moult vaillans homs, et envoiièrent deus cens armeures de fier,
tous bien montés. Qant la proie fu toute issue hors de la ville et
avallée ens ès praieries, [evous les François] courir celle part, et le
demorant se missent en embusqe, ensi que dit estoit. Qant chil que ces
bestes gardoient ens ès praieries, veirent ces gens d’armes venir en
une brousse, si furent tout esbahi et tournèrent en fuies, les auquns
deviers la ville; et les aultres des fuians de paour se boutoient ens
ès haies et buissons. Li hus et li cris monta tantos en la ville.
Evous ces Englois courir as armes, monter as chevaus et issir de la
ville, et euls mettre en cace apriès ces François qui enmenoient la
proie et l’avoient jà aquelliet. Qant chil qui estoient en l’enbusque
veirent le couvenant, si sallirent hors à quoite d’esporons, et se
missent entre la ville et les Englois. Or furent il enclos devant et
derrière, car [qant] chil qui la proie avoient aquelliet, veirent lors
gens venir, il retournèrent sus les Englois et les envairent. Qant les
Englois se veirent en ce parti, et ensi asalli, devant et derrière et
de droite gens d’armes, sifurent tout esbahi, et toutesfois, conme gens
de vaillance, il moustrèrent deffense très bonne; mais il ne porent
durer longement, car les François entrèrent tantos en euls et les
espardirent. Là furent il tout mort ou pris. Petit s’en sauvèrent, tant
que on les peuist veoir ne percevoir.
Et de recief les François vinrent à Anthenis et entrèrent dedens et le
conquissent, et prissent les honmes de la ville à merchi. Et i furent
un seul jour, et i ordonnèrent chapitainne de par euls et gens pour
le garder, et puis s’en departirent et enmenèrent lors prisonniers et
la proie que conquis avoient, et vinrent devant Angouloime. De ceste
emprise ensi achievée rechut li dis seneschaus de Biauqaire grant grace
et renonmée de tous ceuls de l’hoost. Et finèrent li prisonnier englois
qui pris estoient au mieuls que il porent, et il ot fait des escanges
des uns as aultres. Fₒₛ 106 vº et 107.
P. 113, l. 25: d’Aufemont.--_Mss. A 1 à 6_: d’Ouffremont. Fº 129
vº.--_Mss. A 8, 15 à 17_: d’Offemont. Fº 118.
P. 113, l. 27: Saintré.--_Mss. A 11 à 14_: Caintré. Fº 124.--_Mss. A 20
à 22_: Santé. Fº 189 vº.
P. 113, l. 28 et 29: entre mil et neuf cens.--_Ms. B 6_: six vingt. Fº
279.
P. 114, l. 1 et 2: Anchenis.--_Mss. A 1 à 7, 11 à 14, 23 à 33_:
Athenis. Fº 129 vº.--_Ms. A 8_: Anchenis. Fº 118.--_Mss. A 15 à 17_:
Ancenis. Fº 131.--_Mss. A 18, 19_: Achenis. Fº 132 vº.--_Mss. A 20 à
22_: Athemes. Fº 189 vº.--_Ms. B 6_: Anthonis. Fº 279.
P. 114, l. 3: six vingt archiers.--_Ms. B 6_: six vingt lanches et
trois cens archiers. Fº 279.
P. 114, l. 7: sept cens ou huit cens.--_Mss. A 20 à 22_: sept cens. Fº
189 vº.--_Mss. A 23 à 33_: deux cens. Fº 149.
P. 114, l. 25: espardre.--_Mss. A 18, 19, 23 à 29_: espandre. Fº 132
vº.--_Mss. A 30 à 33_: espartir. Fº 178 vº.
P. 114, l. 32: Sitost qu’il furent en friente.--_Mss. A 1 à 6, 11 à
14_: Tantost qu’ilz furent ensemble mis. Fº 130.--_Mss. A 20 à 22_: Si
tost qu’ilz furent esmeuz. Fº 189 vº.--_Mss. A 8, 15 à 17 à 19_: Si
tost qu’ilz furent enfrientez. Fº 118.
P. 115, l. 5: Lussi.--_Mss. A 15 à 17, 20 à 22_: Lusy. Fº 131.
§ =245=. P. 116, l. 9: Ensi se tint.--_Ms. d’Amiens_: Enssi se tint
des seigneurs de Franche ung grant terme i sièges devant Angouloime.
Et couroient li Franchoix ens ou pays que li Englèz avoient concquis,
et y faisoient maint grant destourbier, et ramenoient souvent en leur
host des prisonniers et grans proies qu’il trouvoient. Et y acquist en
cez chevauchies li senescaux de Biauquaire grant grasce. Quant Jehans
de Norewich, cappittainne et souverain d’Angouloime, vit que li dus
n’avoit tallent de deslogier s’il n’avoit le chité à se vollenté,
et entendoit qu’il avoit reconcquis grant fuisson dez villez et des
castiaux, si comme Villefranche, Miremont, Anthenis et des autres,
et savoit que les pourveanches de layens amenrissoient et que li
bourgois et li commun de le chité se enclineroient plus vollentiers
as Franchois que as Englès, se il osoient, il s’avisa d’un malicieus
tour tel que je vous diray. Le nuit de le Purification Nostre Dame, à
l’entrée de fevrier, il vint as cretiaux de le chité tous seux, sans
descouvrir son pourpos à nullui, et fist signe de son capperon qu’il
volloit parler au ducq ou à son marescal. Li dus meysmes y vint sour
son pallefroy, car il penssoit qu’il se volloit rendre, et li demanda
s’il se volloit rendre ou non. Adonc Jehans li respondi qu’il n’en
estoit point consilliet à ses compaignons; mès il estoit là venus pour
tant que l’endemain il devoit y estre une grande feste et sollempnelle.
Se li sambloit que il appertenoit bien, pour le reverence de Nostre
Damme, cui feste il seroit, on se desportast celui jour de grever li
ungs l’autre dedens et dehors; et se on leur volloit donner trois
jours de respit, il parleroit à ses compaignons et aroient consseil de
accorder ou de laissier. Li dus de Normendie accorda assés legierement
le respit de trois jours, et le fist criier par toute l’ost. Chils
Jehans de Norewich vint l’endemain à ses compaignons et leur descouvri
son pourpos, tel que vous orés chy apriès, et leur moustra si bonnes
raisons pluisseurs qui à son pourpos faire le mouvoient, qu’il s’i
assentirent dou tout.
Or vous diray qu’il fist. L’endemain de le Candeler, enssi que on
seoit au disner en l’ost et en le chité, il fist tous ses compaignons,
gens d’armes, saudoiiers et archiers, appareillier, et tout sen harnas
et tout ce qu’il avoient ossi, sans le sceu de chiaux de le cité; puis
fist le porte ouvrir, et yssi hors à toutte se compaignie. Quant chil
de l’ost le virent yssir, il se coummenchièrent à estourmir, che ne fu
mies merveillez; si se coururent armer. Li dis Jehans de Norwich leur
fist savoir que c’estoit sans raisson qu’il s’armoient, car il avoient
acordet bon respit qui encorres duroit, et ne leur volloient nul mal.
Atant se rapaisa li hos, et li dis Jehans s’en passa oultre avoecq
toutte se routte, et s’en alla par deviers Aguillon, où il fu bien
venus et recheus à grant joie, quant il eut comptet sen aventure et les
raissons pour quoy il avoit enssi laissiés le chité d’Angouloime. On
racorda au duc coumment Jehans de Norvich s’en alloit et se compaignie
sus le respit qu’il leur avoit donnet. «En nom Dieu, dist li dus, il
m’a bareté. Che n’est pas li premiers, ossi ne sera ce li darrains, se
je vis longement.» Fº 87.
--_Ms. de Rome_: Ensi se tint li sièges des signeurs de France, un
grant temps, devant la chité d’Angouloime, et cevauçoient ou pais
que li Englois avoient conquis les saisons devant, et le metoient en
grant tribulation. Qant la chapitainne d’Angouloime, qui se nonmoit
Jehans de Nordvich, vei et considera que li dus de Normendie n’avoit
nulle volenté de li deslogier, et sentoit que les pourveances de là
dedens afoiblissoient, et que li contes Derbi ne faisoit nul apparant
de lever le siège, et si veoit, d’aultre part, que chil de la ville
s’enclinoient trop fort à estre françois, et plaindoient lors biens
que il avoient sus le plat pais que il veoient perdus et ou dangier
des François; si se avisa que à toutes ces coses il pourveroit si se
avisa: de une grande soutilleté, et avint la nuit de la Purification
Nostre Dame. Il vint sus les crestiaus de la ville, et fist signe de
son caperon que il voloit parler et trettier de auqunes besongnes.
Sitos que on vei ce signe, on envoia deviers li sçavoir que il voloit.
Il dist que il parleroit volentiers au duc de Normendie, se il li
plaisoit. On li demanda qui il estoit, qui voloit parler au duc. Il
respondi que il estoit Jehans de Nordvich, capitainne de Angouloime de
par le conte Derbi. «Bien, respondirent chil qui là estoient, on le
dira à monsigneur.» On le dist au duch. Li dus fu consilliés de soi
meismes que il monta à cheval et vint jusques à là, et fist dire à ce
Jehan que il venist parler à lui as barrières. Jehans descendi des
murs et vint as barrières et trouva le duch. Li dus li demanda: «Que
voes tu dire?»--«Sire, dist il, je vous demande, moi et les miens,
trieuves meshui et demain pour la reverense et solempnité dou jour
Nostre Dame.»--«Et ne voes tu autre cose?» dist li dus.--«Mès Dieus!
non.»--«Et je le te acorde meshui et demain, et encores le tierch jour
apriès.» Li dus retourna; Jehans de Nordvich demora.
Qant ce vint le jour de la Purification, Jehans de Nordvich s’arma et
fist armer tous ses compagnons englois qui en la garnison estoient,
et monter as chevaus, et puis fist ouvrir la porte. Il sallirent
tout hors, et dist au departement à ceuls de Angouloime: «Faites dou
mieuls que vous poés et savés, car je m’en vois sans retourner.» Qant
chil de l’oost veirent venir les Englois ensi sus euls, si quidièrent
de conmencement que il venissent là pour euls envaïr. Si criièrent
alarme, et s’estournoi li hoos, et s’armèrent et vinrent contre ces
Englois. Jehans de Nordvich ne fu de riens effraés, mais vint contre
euls et dist tout quoi: «Signeur, nous avons trieuwes meshui tout le
jour, et demain aussi, de l’acort et parole vostre signeur le duch de
Normendie.» Li François auquns qui là estoient savoient bien que il
estoit ensi; si se astinrent et les laissièrent passer pasieuvlement.
Les nouvelles vinrent au duch, conment les Englois s’en aloient. Dist
li dus: «Il ne pooient plus demorer. Et se il m’euissent requis: nous
en volons aler salve nostres cors et le nostre, je lor euisse bien fait
celle grace et legierement; car ce sont cas d’armes que on doit faire
l’un à l’autre à ceuls qui tiennent garnisons sus les frontières.» Fₒₛ
106 et 107 vº.
P. 116, l. 17: Norvich.--_Mss. A 8, 9_: Marvich. Fº 118 vº.
§ =246=. P. 118, l. 29: Quant ce vint.--_Ms. d’Amiens_: Quant chil de
le chité d’Anghouloime se virent sans cappittainne et sans ayde fors
de yaux meysmes, si n’eurent mies vollenté d’iaux tenir plus longement
contre le duc; ainschois se rendirent assés tost apriès. Et y envoya li
dus ses marescaux qui prissent le saisinne de le cité; et y ordonnèrent
nouvellez gardez, et missent bons saudoiiers pour tenir et deffendre le
chité contre lez Englès, s’il besongnoit. Puis se desloga li dus et se
traist deviers le castiel de Damasen et y loga quinze jours par devant,
ainschois qu’il le pewist avoir, et ne fu oncquez jours qu’il n’y ewist
assault. Si fu concquis par force, et tout chil qui dedens estoient,
Gascon et Englès, mors. Quant li François eurent pris Damassen, il le
missent en milleur point que oncques mais n’avoit estet; et le donna li
dus de Normendie à ung escuier de Biausse que on appelloit le Borgne de
Milli, et y laissa avoec lui cent saudoiiers pour le garder. Apriès il
s’en vinrent devant Thonis, qui siet sour le rivierre de Garonne. Si le
trouvèrent bien pourveue de Gascons et d’Englès, qui le deffendirent
vassaument ung grant tamps, et y avoit tous les jours assault. Tant y
fu li dus que la ville se rendi, sauve leurs biens et leurs corps; et
s’en partirent li Englèz et li Gascon, mais riens n’en portèrent ne
n’en menèrent, fors tant seullement leurs chevaux. Li dus de Normendie
et toutte sen host se tinrent en Thonis ou environ jusquez apriès
le jour de Pasques, qu’il se traissent tout devant Aguillon; mais
ainschois qu’il y parvenissent, il trouvèrent à une lieuwe prièz, sus
le rivierre, une petitte bonne villette fremmée qui estoit as Englèz,
que on clamoit le Port Sainte Marie, et y avoit dedens bien deux cens
saudoiiers gascons et englèz. Si l’assaillirent li Franchois vistement
et ne l’eurent mies si aise, ainschois y fissent pluisseurs assaulx.
Finalement, elle fu concquise de force, courue et robée, et tous li
saudoiiers ocis, qui dedens estoient, et remparée de nouvel et regarnie
de gens d’armes et de pourveanchez. Et puis s’en vinrent devant
Aguillon. Fº 87.
--_Ms. de Rome_: Les Englois partis et mis au cemin par la manière
que je vous di, li dus de Normendie envoia ses mareschaus parler et
tretiier à ceuls d’Angouloime, pour sçavoir quel cose il voloient
dire et faire. Les bourgois de la chité et toute la conmunauté, qui
avoient assés affection as François, se rendirent incontinent; et i
entrèrent li signeur ce meisme jour, et i soupèrent à grant joie. Ensi
orent il Angouloime et se rafresqirent là je ne sçai qans jours, et
puis jettèrent lor visée que il iroient devant le chastiel d’Agillon
et metteroient là le siège. Si se ordonnèrent pour che faire, et se
departirent de la chité d’Angouloime en grant estat et arroi; et
ceminèrent viers Agillon, et tant fissent que il i parvinrent. Fº 107
vº.
P. 119, l. 11: Villers.--_Mss. A 1 à 6, 15 à 19, 23 à 29_: Villiers. Fº
131.
P. 119, l. 15: Damassen.--_Mss. A 30 à 33_: Damassien. Fº 179.
P. 119, l. 21: Milli.--_Mss. A 1 à 6_: Mulli. Fº 131.--_Mss. A 15 à 17,
20 à 33_: Milly. Fº 132 vº.--_Mss. A 18, 19_: Nulli. Fº 134.
P. 119, l. 23: Thonins.--_Mss. A 1 à 6_: Thenis. Fº 131 vº.--_Mss. A 7
à 14, 18 à 33_: Thonis. Fº 125 vº.--_Mss. A 15 à 17_: Chonis. Fº 132 vº.
P. 119, l. 23: Garone.--_Ms. B 6_: Geronde. Fº 282.
§ =247=. P. 120, l. 12: Tant esploitièrent.--_Ms. d’Amiens_: Or sont
chil seigneur de Franche venut à host devant Aguillon, et logiet
contreval ces biaux prés seloncq le rivierre qui porte grant navie,
cescuns sires entre ses gens, chacune connestablie par lui, si comme
ordonné estoit par les marescaux de l’host. Et devés savoir que par
devant le fort castel de Aguillon eut le plus bel host et le plus bel
siège que on avoit, grant tamps avoit, veut ou royaumme de Franche ne
ailleurs; et dura parmy cel estet tout jusques à le Saint Remy. Et y
avoit bien cent mil hommes armez portans, à cheval et à piet. Et si
ne poroit on raconter par nulle histoire à siège fait tant de biaux
fais d’armes et de grandes appertisses qu’il avinrent là de une part
et d’autre; car oncques gens assegiés ne souffrirent tant, ne ne se
deffendirent si vassaument comme cil qui furent dedens Aguillon, si
comme vous oréz chy apriès. Car tous les jours les couvenoit combattre
deus fois ou trois à chiaux de l’host, et le plus souvent dou matin
jusques à le nuit sans cesser, car toudis leur sourvenoient nouvellez
gens, geneuois et autrez, qui ne les laissoient reposer. Les mannierrez
et les assaux, coumment et de quoy, je les vous voeil declairier et
plainnement deviser. Fº 87 vº.
P. 120, l. 14: d’Aguillon.--_Ms. B 6_: qui est une moult belle plache
et seant en la pointe de deux rivières, dont est l’une le rivière de
Lot et chiet en Geronde qui porte grant navire pour aller par tout le
monde. Fº 283.
P. 120, l. 17: connestablie.--_Mss. A 8 à 14, 18 à 22_: connestable. Fº
119 vº.
P. 120, l. 17: par lui.--_Mss. A 1 à 6_: par elle. Fº 131 vº.--_Mss. A
23 à 33_: à par lui. Fº 150 vº.
P. 120, l. 23: cent mille.--_Mss. A 1 à 6, 11 à 14, 18 à 22_: cinq
mille. Fº 131 vº.
§ =248=. P. 121, l. 9: Quant li signeur.--_Ms. d’Amiens_: Quant li
seigneur de Franche furent venut devant Aguillon, il regardèrent
premierement que il ne pooient parvenir jusquez à le forterèche, se
il ne passoient le rivierre. Or leur couvenoit faire ung pont pour
le passer. Si coummanda li dus que li pons fust fais, quoy que il
coustast. Si y vinrent pour le ouvrer plus de trois cens carpentiers,
qui y ouvroient jour et nuit. Quant chil de dedens Aguillon veirent
que il estoit oultre le moitié de le rivierre, il fissent appareillier
trois navez et entrèrent ens, et chacièrent tous ces ouvriers en
voiez et les gardes ossi, et deffissent tout ce que il avoient fait
et carpenté ung grant temps. Quant li signeur de Franche virent ce,
il furent durement courouchiéz, et fissent appareillier aultrez navez
à l’encontre d’eux; et missent ens grant fuisson de gens d’armes, de
Geneuois et bidaus arbalestriers, et coummandèrent les ouvriers à
ouvrer sour le fianche de leurs gardes. Quant li ouvrier eurent ouvré
ung jour jusques à miedi, messires Gautiers de Mauny et aucun de ses
compaignons entrèrent ens leurs nefs, et coururent sus ces ouvriers et
les gardez. Et fu tout deffait quanque fait avoient, et y laissièrent
dez mors et des noiiés grant plenté. Chils debas et ceste rihote
recoummenchoit chacun jour. Au pardarrain, li seigneur de Franche y
furent si estoffeement et si bien gardèrent leurs ouvriers que li pons
fu fais bons et fors.
Quant li pons dessus le rivierre fu parfais, toute li hos passa
oultre, armet et ordounnet par mannierre de bataille; et assaillirent
le castiel de Aguillon durement et fortement, sans yaux espargnier ne
chiaux de dedens. Et chil dedens se deffendirent si vassaument que
riens n’y perdirent, et dura chilx assaux ung jour tout jour. Au soir,
chil de l’host se repairièrent et vinrent à leurs logeis. Chil dou
castiel avoient ossi avoecq eux plenté d’ouvriers. Si remissent de nuit
à point ce que brisiet et froissiet avoit esté par jour. Fº 87 vº.
--_Ms. de Rome_: Qant li signeur et li grant baron de France, qui en
la compagnie dou duc de Normendie estoient, furent venu devant Agillon,
il regardèrent premierement et considerèrent que il ne pooient parvenir
à la forterèce, se il ne passoient la rivière, qui est large, longe et
parfonde, et lor couvenoit faire un pont pour le passer. Si ordonna et
conmanda li dus que li pons fust fais, quoi que il coustast. Et vinrent
pour ce pont ouvrer grant fuisson de carpentiers, et i ouvroient nuit
et jour. Qant li chevalier qui dedens Agillon estoient, veirent que
chils pons estoit fais et carpentés et menés jusques à la moiienné de
la rivière, il fissent armer et apparillier trois naves, et entrèrent
dedens à fuisson d’archiers, et cachièrent ces ouvriers en voies et
les gardes aussi, et desfissent tantos et sans delai tout ce que fait
avoient et carpenté à grant painne et mis un lonch temps. Qant li
signeur de France veirent ce, si furent durement courouchié, et fissent
apparillier aultres naves et batiaus, et amener sus la rivière à
l’encontre de ceuls, et missent dedens grant fuisson de gens d’armes et
d’arbalestriers. Et conmandèrent li signeur, les carpentiers à ouvrer
sus la fiance de lors gardes. Qant li ouvrier orent ouvré un jour,
messires Gautiers de Mauni, sus l’eure de nonne, entrèrent, ils et ses
compagnons, en lors nefs, et coururent sus ces ouvriers et lors gardes,
et en i ot des mors et des bleciés, et couvint de rechief les ouvriers
laissier oevre et retourner arrière. Et fu adonc tout deffait qanqque
fait avoient. Ces debas et ces rihotes reconmençoient casqun jour.
Qant li signeur de France veirent ce, si en orent grant virgongne,
et i vinrent en la parfin si estofeement, et si bien gardèrent les
ouvriers, que li pons fu fais, biaus et fors. Si passèrent adonc
li signeur et toute l’oost oultre, armé et ordonné par manière de
bataille; et asallirent à ce donc le chastiel d’Agillon fortement, sans
euls espargnier. Et i ot ce jour maint honme blechiet, car chil qui
dedens estoient, se deffendirent si vassaument que mervelles seroit
à recorder. Et dura chils assaus un jour tout entier, mais riens n’i
conquissent que painne et travel, cops et horions; et retournèrent au
soir à lors logeis pour euls reposer et aisier, car il avoient bien de
qoi. Fₒₛ 107 vº et 108.
§ =249=. P. 122, l. 24: Quant ce vint.--_Ms. d’Amiens_: Quant che vint
à l’endemain, cil seigneur de France s’asamblèrent et regardèrent et
advisèrent coumment il poroient le mieux et le plus apertement grever
chiaux dou castiel. Si ordonnèrent, pour plus travillier leurs anemis,
que il partiroient leur host en quatre parties, desquellez li première
assauroit dou matin jusquez à prisme, la seconde, de primme jusquez à
miedi, la tierce, de miedy jusques à vespres, et li quarte, de vespres
jusques à le nuit; car bien penssoient que li deffendant ne poroient
tant durer. Si le fissent enssi par grant avis, et assaillirent par
tel ordonnanche cinq jours ou six; mès ce ne leur valli riens, ains
y perdirent grossement de leurs gens, car chil dou castiel ne furent
oncques si recreant, coumment que il fuissent travilliet oultre
mesure, qu’il ne se habandonnaissent au deffendre si vassaument que
oncquez chil de l’ost pewissent gaegnier le pont qui estoit dehors le
porte dou castel. Et quant il virent que ce ne leur valloit riens,
si en furent tout confus, car lor sires, li dus de Normendie avoit
dit et juret qu’il ne se partiroit dou siège jusques à tant qu’il
aroit concquis le ville et le castiel. Si eurent autre conseil, et
envoiièrent à Thoulouse querre les huit plus grans enghienz de le
chité, et en fissent faire quatre plus grans assés, et les fissent,
sans cesser, jetter nuit et jour toudis dedens le castiel; mais chil
dou castiel estoient si bien garitet que oncques pierres ne leur greva,
fors as toix des manandises. Et avoient chil dou castiel bons enghiens
qui debrisoient tous les enghiens de dehors, et en peu de tamps en
debrisièrent jusques à six, dont chil de l’ost furent mout courouchiet,
et toudis avisèrent comment ils lez poroient le mieux grever. Fₒₛ 87 vº
et 88.
--_Ms. de Rome_: Qant ce vint à l’endemain, chil signeur de France
se remissent ensamble pour avoir consel conment, ne par quel art ne
manière, il poroient le mieuls esploiter pour grever lors ennemis.
Et avisèrent que il departiroient lor hoost en quatre parties, des
quelles la première partie assaudroit dou matin jusques à prime, la
seconde de prime jusques à midi, la tierce de miedi jusques à vespres,
et la quarte de vespres jusques à la nuit; car il pensoient que li
deffendant ne poroient porter si grant faix que pour soustenir la
painne toute jour ajournée, et pour estre en armes sans reposer, boire
ne mangier, ne euls rafresqir. Au voir dire, li avis fu moult soubtieus
pour donner as Englois moult à faire et grant contraire. Et furent
ordonné ou premier assaut, dou matin jusques à prime, les Espagnols et
les Geneuois, les Prouvenchiaus et les Savoiiens et Bourgignons; et
estoient de celle route, parmi les signeurs et lors honmes qui s’en
ensonnioient et s’i boutoient, bien huit mille de prime. Sitos que
chil cessoient, entroient en l’asaut chil de Nerbonne, de Montpellier,
de Besiers, de Montroial, de Fougans, de Limous, de Cabestain, de
Saint Ubert, de Olimpi et de Carchasonne. De miedi jusques à vespres,
rentroient en l’asaut chil de Toulouse, de Roerghe, de Qersi, d’Agenois
et de Bigorre. De viespres jusques à la nuit, tous frès et tous
nouviaux entroient en l’asaut li Limosin, chil de Villai, de Cevaudem,
d’Auvergne, de Poito et de Saintonge. Et s’aquitoient toutes gens
très loiaument. Et continuèrent ces assaus par siis jours, mais riens
n’i gaegnièrent fors que de lors gens mors et bleciés grant fuisson;
car chil dou chastiel ne furent onques si las, quoi que il fuissent
travilliet oultre mesure, que il ne s’abandonnassent au deffendre si
vaillanment que li signeur de l’oost meismement s’en esmervilloient
conment il pooient souffrir et porter celle painne. Et les reputoient
pour vaillans gens, quoi que ce fuissent lor ennemi; ne il ne porent
onques pour tous ces assaus parvenir jusques au conquès dou pont, qui
estoit devant le chastiel, tant estoit il bien gardés, deffendus et
soustenus. Qant li signeur de l’oost veirent ce, il se cessèrent et
entendirent à mettre à point les navrés et les bleciés.