Riole prise, et de fait il ni avoit nul retour, quant li bourgois
de la ville vinrent à mesire Agoth, lor chapitainne, qui point ne
s’effreoit de cose que il veist, et li dissent: «Sire, aiiés avis de
nous. Se ces Englois nous prendent de force, nous sonmes tout mort
et nostre ville courue.»--«Et quel cose volés vous que j’en face?»
respondi li chevaliers.--«Nous volons que vous faites cesser l’asaut
et que vous tretiiés à euls, par quoi nous demorons en paix, car il ne
nous apert confort de nul costé; et se ce ne volés faire, retraiiés
vous dedens le chastiel: il est fors assés, et faites vostre gerre
à par vous, car nous ferons fin à la nostre.» Qant mesires Agos les
entendi, si lor respondi et dist: «Biaus signeurs, grans merchis, vous
me presentés courtoisie, et voirement me retrairai je ou chastiel.
Je ne me voel pas encores rendre.» Adonc se departi li dis mesires
Aghos de lor compagnie, et retraii tous les compagnons de sa carge,
et li bourgois se missent en trettiet deviers le conte Derbi. Qant
li contes Derbi vei que li bourgois de la Riole trettoient, et li
chevaliers ne s’ensonnioit point de lors trettiés, si demanda: «Et où
est vostre capitainne? Pourquoi ne vient il avant en non Dieu?»--«Sire,
il est retrais dedens le chastiel, et ne voelt point estre à nostres
trettiés.»--«Voires, respondi li contes. Voelt il donc faire sa gerre
à par lui? Jamais n’en auera si bon marchié que il euist eu avoecques
vous; et puis que nous avons la ville, nous auerons le chastiel, quoi
que il doie couster.» Fº 101.
§ =230=. P. 84, l. 9: Ensi eut.--_Ms. d’Amiens_: Vous avés bien oy le
tretiet et le composition de chiaux de le Riolle et dou comte Derbi,
et coumment li ville se rendi. Quant li seigneur d’Engleterre virent
que messires Agos s’estoit retrais ou fort, si dissent bien que il
n’avoient riens fait se il laissoient le castiel derrierre, car tantost
aroit reconcquis le ville. Si eurent consseil de l’asegier et de
l’assaillir et de non partir de là, si l’aroient ou par forche ou par
amours. Si l’environnèrent de tous léz et l’assaillirent par pluisseurs
foix, mais peu y fissent, car li castiaux est fors et haux, et si siet
sus vive roche.
Endementroex que li comtez Derbi et li baron d’Engleterre et de
Gascoigne seoient devant le fort castiel de le Riolle, vint uns
honnestez anchiens homs, nés et demourans en le Riolle, à monseigneur
Gautier de Mauni, et s’aquinta de lui et li dist: «Sire, quel grace
feriés vous à celui qui vous menroit en l’eglise et ou propre lieu
où li corps de monseigneur vostre père, dont Dieux ait l’amme, gist
et fu jadis ensevellis?» Messires Gautiers leva adonc le teste et
regarda le preudomme, et li dist: «En nom Dieu, amis, je li feroie
grant prouffit.»--«Or en vennés avoecq moy, dist li preudoms, et je
vous y menray droitement, car je fui là au jour qu’il y fu mis et
vous ferai tout sceur de ce que je vous recorde.» Li sires de Mauni,
qui volentiers entendi à ces parolles, se parti de son hostel et s’en
vint avoecques ses gens et le preudomme là où il le mena: che fu en
une eglise moult anchienne qui siet dedens le Riolle; et dedens une
petitte cappelle avoit un marbre à vosure rudement tailliet. «Sire,
dist li preudoms, dessous ce marbre fu ensepvelis messires vos pèrez.
Et faittez lever le tonbel: je croy que en l’autre qui se reclot sus,
vous trouverés escript le nom de lui et le terme qu’il y fu mis.» Adonc
messires Gautiers le fist tantost par ses escuiers ouvrir, et trouva
en verité tout ce que li preudoms li avoit dit. Or vous diray pourquoy
ne coumment li chevaliers fu là ensepvelis, li pères à monseigneur de
Mauny qui estoit de Haynnau. Fₒₛ 84 vº et 85.
--_Ms. de Rome_: Chils trettiés se passa, et orent les Englois la
ville de la Riole, et puis asegièrent le chastiel, liquels est biaus
et fors, et mesire Agot des Baus dedens, et tous ses compagnons qui
estoient Prouvenciel. Et fu li sièges lons et grans, car li chastiaus
pour lors estoit de bonne garde et belle deffense, et si i avoit dedens
chevaliers d’onnour et de vaillance. Or vous recorderai de une aventure
que il avint là à mesire Gautier de Mauni, entrues que il seoient
devant le chastiel de la Riole. Fº 101 vº.
§ =231=. P. 85, l. 18: Il y eut.--_Ms. d’Amiens_: Jadis il y eut
un evesque à Cambray, qui fu gascons et de chiaux de Mirepois en
Gascoingne. Or avint que de son tamps il y eut un très grant behours
et tournoy dehors le chité de Cambray. Là par usage il se font et
feroient, se ungs en y avoit. A che tournoy eut bien cinq cens
chevaliers tournians. Et là y eut li evesquez de Cambray un sien
nepveult, jone chevalier tourniant, richement armés et montés. Chilx
s’adrecha à monseigneur le Borgne de Mauni, père à monseigneur Gautier
et à ses frèrez, qui estoit fors chevaliers, rades et bien tournyans,
et mania tellement le chevalier de Mirepois que oncques depuis n’eut
santé, mès morut: dont li evesques et tous ses linaigez furent
grandement courouchiéz, car il estoit haux homs et gentilz et riches
homs durement. Ceste cose passa; amendisses n’en furent oncques faittez
ne requisez, pour ce que en esbatement de tournoy et de telz fais
d’armes la cose estoit avenue.
Avint un grant tamps apriès que il vint en devotion à monseigneur le
Borgne de Mauni que d’aller en pellerinage à Saint Jaqueme de Galisse.
Si se parti de Haynnau en celle entente; sen allée fu sceue, et li
linages de Mirepoix emfourmés que chilx qui avoit ochis leur cousin,
passoit parmy leur pays. Dont bastirent il et ordonnèrent pluisseurs
aghais sour lui, et le trouvèrent un jour assés priès de le Riolle. Si
l’asaillirent et ochirent et navrèrent mout vilainnement ses varléz,
de quoy li doi en morurent. Apriès che qu’il fu mors, chil de le
Riolle l’alèrent querre et prissent ses chevaux et sen aroy et fissent
de tout argent; et l’ensepvelirent en sainte terre, pour tant qu’il
estoit chevaliers et pellerins, et li fissent son obsèque. Depuis ceste
cose demoura, car si enffant estoient jone au jour qu’il fu ochis.
Si s’avanchièrent depuis par armes et vinrent en eage d’omme, et par
especial messires Gautiers, enssi que vous avés oy comment il s’est fès
et avanchiés. De quoy, quant il fu venus en Gascoingne avoecq le comte
Derbi, bien li souvint de chiaux de Mirepoix qui avoient ochis son
père, dont il le contrevenga assés bien; car il leur ardi touttez leurs
terrez et en mist pluisseurs à fin, ne oncques n’en veult nul prendre à
raenchon, ne à le bataille de Bregerach, ne d’Auberoche, ne d’ailleurs.
Quant li sirez de Mauni eut congnut clerement que li preudoms li avoit
dit verité, se li fist tantost donner cent escus et deffouir les os de
son père et enbausoummer et mettre en un bel sarqu, et puis cargier sus
un sonmier. Et prist deus frères meneurs et leur fist delivrer or et
argent, et fist ces [os] raporter à Vallenchiennes à Saint Franchois,
c’on dist as Cordeliers; et là de rechief il les fist mettre et
ensepvelir en une cappelle assés priès dou coer. Fº 85.
--_Ms. de Rome_: Il i eut jadis un evesque à Cambrai qui fu Gascons,
dou linage de ceuls de Beu et de Mirepois. Avint que dou temps cesti
evesque uns très grans tournois se fist devant Cambrai, et i furent
bien cinq cens chevaliers tournoians. Et là ot li dis evesques un
sien neveut, jone chevalier tourniant, ricement armé et monté. Chils
s’adreça à mesire le Borgne de Mauni, père à mesire Gautier et à ses
frères, liquels fu en son temps chevaliers durs, fors, rades et bien
tournoians. Et fu li jones chevaliers gascons tellement menés et
batus que onques depuis il not santé, mais morut. Li sires de Mauni,
qui riens n’i pensoit, ne au penser apertenoit selonch l’estat et
l’ordenance d’armes et l’usage des tournois, ne sai qans ans apriès,
il li prist devotion d’aler ou voiage de Saint Jaqueme en Galise, et i
ala et prist un aultre cemin au retour que il n’euist alé. Et entendi
que li contes de Valois, frères jadis au biau roi Phelippe et pères à
madame de Valois qui fenme fu au conte Guillaume de Hainnau, tenoit
son siège devant la Riole, car pour ces jours elle estoit englesce; et
faisoit guerre li biaus rois Phelippes as Anglois en Giane pour auqunes
disentions de terres, les quelles estoient en debat des deus rois
ensamble.
Chils sires de Mauni vint veoir le conte de Valois qui li fist bonne
chière. Au departement, il li demanda se il voloit riens mander
ne escrire en Hainnau à sa fille. Li contes de Valois dist oil et
escripsi. Li sires de Mauni, nonmé le Borgne, prist congiet et se
departi. En cel estat que il fu là et sejourna un jour, il fu avisés
dou linage de ceuls de Mirepois et de Beu et dou jone chevalier qui
mors avoit esté, ensi que on disoit, par sa coupe; et l’atendirent au
dehors des logeis et l’asallirent et ocirent: dont li contes de Valois
fu trop durement courouchiés et en calenga tout le linage et mist en
termes que il l’avoient mourdrit. Et en furent en grant dangier de lors
corps tout chil qui fait l’avoient, et encores euissent il esté en plus
grant, se li enfant les euissent poursieuvis par parlement de Paris,
quoi il mesissent en termes que il l’avoient fait de bonne gerre; mais,
pour lors, messires Gautiers de Mauni et si frère estoient jone, et
aussi vous savés que, qant il vinrent en congnisance d’onme, la guerre
s’esmeut entre France et Hainnau, et depuis entre France et Engleterre,
par quoi li enfant dou dit Borgne de Mauni n’eurent nulle action de
proceder en plait à l’encontre des Gascons, fors à l’espée, car il
tinrent l’opinion le roi d’Engleterre.
Au retourner au pourpos de la matère desus dite, li contes de Valois,
pour l’amour de gentillèce, fist ensepvelir le dit Borgne de Mauni en
une eglise, au dehors de la ville de la Riole, et li fist faire son
obsèque. Trop bien savoit tout ce messires Gautiers de Mauni, que il
estoit mis et ensepvelis en terre sainte en la Riole ou là priès, mais
il couvenoit que il fesist enqueste à ceuls dou pais, où on l’avoit
mis. Si le fist et tant en enquist que li anciien homme, qui avoient
esté de ce temps, li ensengnièrent et le menèrent droit sus le lieu
où il avoit esté ensepvelis. Se le fist deffouir et prendre les os et
mettre en un sarqu et aporter en l’eglise des Cordeliers, que on dist
Saint François, à Valenchiennes, et de rechief là ensepvelir moult
reveranment, et encores en voit on les ensengnes. Fₒₛ 101 et 102.
P. 85, l. 19: de Beu.--_Mss. A 20 à 22_: du Beu. Fº 179.
P. 86, l. 10: englesce.--_Ms. B 6_: mais les Franchois le conquirent,
quant il y eulrent bien sis ung an. Fº 265.
P. 86, l. 15: ses lettres.--_Mss. A 20 à 22_: comment il estoit au dit
conte, car le conte de Vallois estoit là comme roy de France. Fº 179.
P. 86, l. 22: retet.--_Mss. A 1 à 7, 11 à 14, 18 à 33_: soupeçonnez. Fº
122 vº.--_Ms. A 8_: encoulpez. Fº 111 vº.--_Mss. A 15 à 17_: arrestez.
Fº 124.
P. 86, l. 32: avant.--_Les mss. A 1 à 6, 11 à 14, 18, 19 ajoutent_: et
si certainement. Fº 122 vº.
P. 87, l. 17: ensepelir.--_Ms. B 6_: delés madame sa femme, en l’eglise
des Cordeliers. Fº 265.
§ =232=. P. 87, l. 22: Or revenrons.--_Ms. d’Amiens_: Or vous
recorderai dou castiel de la Riolle qui se tint un grant temps contre
les Englès. Et trop bien le deffendi messires Agos des Baux as Englès,
et se tint depuis cinq sepmainnez que la ville eut estet rendue.
Finablement li chevaliers perchut bien que li comtez Derbi ne se
partiroit point si aroit le castiel à se vollenté, et d’autre part
il ne veoit nul secours appairant. Si se laissa encheoir en tretiet
parmy tant que il s’en pooit aller et tout le sien, et pooient porter
et mener tout ce qui leur estoit. Li comtez Derbi leur acorda; il
se partirent ensi que je vous compte et rendirent le castel: dont
li Englèz eurent grant joie, car il estoient tout tannet de tant là
sejourner. Et quant li comtes Derbi l’eut, si le fist remparer, garnir
et repourveir, et y mist bon castellain, un chevalier d’Engleterre qui
s’appielloit messire Richart de Lantonne. Fº 85.
--_Ms. de Rome_: Tant tint li contes Derbi son siège devant le
chastiel de la Riole, que messires Agos des Baus falli à ses ententes,
car il quidoit que poissance de par le roi de France deuist là
venir pour lever le siège, mais non fist; car ensi que je vous ai
jà dit, li orgoels et la negligense estoient si grandes en l’ostel
dou roi Phelippe, pour ce temps, que on ne faisoit compte de tels
coses, ne de l’aler, ne de l’envoiier. Et pour le temps d’adonc, li
saudoiier estoient si mal paiiet en France que nuls estrangiers ne s’y
traioit volentiers pour demander saudées, ne ossi parellement chil
dou roiaulme. Encores estoient li peril si grant, pour les nobles
dou roiaulme qui de la gerre se ensonnioient, que, qant il avoient
l’aventure de perdre une journée à l’encontre de lors ennemis, renonmée
publique parmi le roiaume de France couroit sur euls, que il estoient
traite, et que par traison il avoient perdu la journée. Et mieuls lor
valoit à morir sus la place que estre pris ne retourner; car qant il
retournoient, il estoient pendu conme traite. Et par tels violenses et
amises de traisons avinrent depuis moult de mesciés ens ou roiaulme de
France et par tous ses menbres, ainsi que vous orés recorder avant en
l’istore.
Qant messires Agos des Baus vei que nuls secours ne li venroit de
France, et si amenrissoient grandement ses pourveances, il traitta
deviers ces signeurs d’Engleterre. Trettiés se porta que ils et li sien
se departirent sauvement, et en pooient porter ce qui lour estoit,
voires seullement devant euls et non autrement; si se departirent
et se traissent viers Toulouse. Et de là mesires Agos s’en retourna
en Prouvence et n’osa venir en France, tant doubta il les crueuses
justices que on i faisoit à petite oqison. Si se tint en Prouvence et
sus le sien, et bien vei et senti que les envies dou roiaulme de France
estoient trop grandes et que il n’i faisoit nul. Fº 102.
P. 87, l. 26: tour.--_Mss. A 1 à 6, 23 à 33_: court. Fº 122 vº.
P. 87, l. 27: chaingles.--_Mss. A 20 à 22_: sangles. Fº 180.
P. 88, l. 1: Agos.--_Mss. A 15 à 17_: Ragot. Fº 124 vº.
P. 88, l. 1: des Baus.--_Mss. A 8, 18 à 22_: des Vauls. Fº 112.--_Mss.
A 23 à 33_: des Bans. Fº 140 vº.
P. 88, l. 24: parler au conte Derbi.--_Ms. B 6_: Sy entra en traitiet
devers les chevaliers du conte tels que messire Richart de Stampfort et
messire Gautier de Mauny: le traitiet se fist par le moien de messire
Alixandre de Caumont. Fº 266.
P. 90, l. 28: le Riolle.--_Ms. B 6_: Ensy fut la Roille pour che tamps
englesse, et le demora depuis plus de vingt sept ans. Fº 266.
§ =233=. P. 91, l. 1: Apriès che.--_Ms. d’Amiens_: Apriès ce que li
comtez Derbi eut se volenté et fu venus à sen entente de le Riolle,
de le ville et dou castiel, il se parti et toutte sen host, et
chevaucha vers Montpesas, ossi un très fort et biel castiel. Si le
concquist par assaut et par eschiellement, mès mout li cousta de ses
archiers, ainchois qu’il l’ewist. Si y laissa dedens de ses gens et
le rafreschi de pourveanches, puis s’en parti et se traist deviers le
ville et le fort castiel de Mauron. Et quant il furent là venu, il
l’assaillirent fortement, mais il ne le peurent avoir par leur assault;
si le gaegnièrent l’endemain par enghien et par le sens d’un gentil
homme dou pays de Gascoingne, que on clamoit Alixandrez, seigneur de
Chaumont. Car li coens Derbi se desloga et fist samblant d’aller autre
part, et se parti de là à tout sen grant host, et laissa un petit de
gens devant le ville avoecq le conte de Kenfort. Quant chil de la
ville et li saudoier virent si peu de leurs ennemis devant le ville,
il lez quidièrent tantost desconfire et prendre; si yssirent hors
pour combattre à ces Englèz. Quant li Englès les virent venir, il se
traissent arrière et fissent samblant de fuir, et chils lez chachièrent
loing enssus de leur ville. Qant li comtes Derbi vit che, qui estoit
embusciés assés priès de là, il sailli avant et se mist entre lez
saudoiiers et le ville, et y entra par force. Et furent li plus de
chiaux qui dehors estoient, tous ochis.
Ensi par cel enghien fu li fors castiaux et la ville de Mauron gaegnie,
et li bourgois de le ville pris et ranchonnet. Apriès fu prise ossi
par enghien et soutilité le grosse ville que on clainme Villefranche,
et fu toutte courue et robée. Depuis le fist li dis comtez remparer
et regarnir et pourveir de tout chou qu’il y besongnoit, et y laissa
un bon chevalier englès que on clammoit monseigneur Thomas Kok. Ensi
chevauchoit li comtes Derbi le pays d’un lés et d’autre, et n’estoit
nulx qui se mesist au devant. Et conqueroient ses gens villes et
castiaux et prendoient gens et lez rançonnoient, et n’y avoit si petit
en leur host qui ne fuist tous cargiés d’or et d’argent. Fº 85.
--_Ms. de Rome_: Ensi eut li contes Derbi la ville et le chastiel de
la Riole et le pourvei et rafresci de gens d’armes et d’archiers et
de pourveances, et i laissa messire Jehan de la Souce à chapitainne.
Et puis s’en departirent les Englois et ceminèrent deviers Montpesas.
Elle n’estoit fremée que de pallis. Si considerèrent chil qui dedens
estoient, la poissance des Englois, et conment il avoient pris plus
fortes villes que la lour ne fust vint fois. Si envoiièrent tretier
deviers le conte Derbi, avant que il parvenist à la ville, et se
rendirent, salves lors corps et lors biens. Et puis passèrent oultre,
et vinrent devant Villefrance en Agenois; elle se rendi tantos. Fº 102.
P. 91, l. 23: Baucestre.--_Mss. A 1 à 6_: Lancastre. Fº 124.--_Mss. A
7, 11 à 14, 18 à 33_: Lancestre. Fº 118 vº.
P. 91, l. 25: Mauron.--_Mss. A 1 à 6, 30 à 33_: Manron. Fº 124.--_Ms. A
8_: Marcion. Fº 112 vº.--_Mss. A 15 à 17_: Martron. Fº 125 vº.--_Mss. A
18, 19_: Mauion. Fº 126 vº.--_Ms. B 6_: Manton. Fº 267.
P. 92, l. 25: quatre cens.--_Ms. B 6_: cinq cens. Fº 268.
P. 93, l. 20: cent.--_Ms. B 6_: soixante. Fº 268.
§ =234=. P. 93, l. 29: Quant li contes.--_Ms. d’Amiens_: Apriès ce
que li comtez Derbi eut fait se vollenté de Villefrance, il s’en ralla
vers Miremont, en raprochant le chité de Bourdiaux, qui est ungs très
fors castiaux et bien seant; si y fu trois jours devant; au quatrimme
il se rendi. Si le prist li comtez et le donna à un sien escuier que
on clammoit Jehan de Bristo. Apriès il prist le castiel que on claimme
Thonis, et apriès le fort castiel de Damassen, et puis se traist
deviers le chité d’Anghouloime et l’asega, mès elle fu assés tost
rendue; si y mist dedens grant fuisson de gens d’armes et d’archiers,
pour le garder, avoecq les bourgois. Quant li comtez eut ordonné de
le chité d’Anghouloime che que bon l’en sambla, il se traist par
devant Blaves qui est une très forte ville et où la rivière de Garonne
l’enclot par derière. Si y basti et mist le siège par devant. Et y sist
un grant temps et y fist livrer tamaint assault, mès peu y concquist;
car la ville estoit forte et bien garnie et pourveue de bonnes gens
d’armez. Et par especial, il y avoit deux chevaliers de Poito, vaillans
hommez durement, que li roys de Franche y avoit envoiiés, monseigneur
Guichart d’Angle et monseigneur Bouchikau, qui le gardèrent et
deffendirent si bien avoecq leurs compaignons que il n’y prissent nul
dammaige. Fº 85 vº.
--_Ms. de Rome_: Et puis s’en vinrent devant la ville de Blaves,
laquelle pour lors estoit françoise, et sciet à sept lieuves l’aige
de la Geronde de la cité priès de Bourdiaus, il n’i a que la rivière
entre deus. Si bastirent là les Englois lor siège, et dissent que
point ne s’en partiroient si l’auroient à lor volenté, se poisance de
roi de France ne venoit si grande que il ne peuissent contrester à
l’encontre. Tant furent les Englois devant Blaves que chil qui dedens
estoient, se tanèrent, car il estoient asegiet par terre et par la
rivière de la Geronde, laquelle bat et fiert as murs de la ville; si
se tourna englesce, et se missent en l’obeisance dou roi d’Engleterre.
Ensi eurent les Englois Blaves, dont il furent moult resjoy, car elle
lor avoit porté moult de contraire et portoit encores tous les jours,
jusques à tant que elle fu pour euls. Si i ordonna li contes Derbi,
avant que il s’en partesist, bon chapitainne, gens d’armes et archiers
pour le garder. Et puis ils et ses gens, petit à petit, rapasèrent
as barges et à bastiaus la rivière de la Geronde et retournèrent à
Bourdiaus, et là se tinrent et s’i rafresqirent. Et lor fu avis que,
pour celle saison, il avoient assés fait, et se tenroient là, jusques
à tant que il oroient aultres nouvelles. Si envoia li contes Derbi ses
honmes par les garnisons, tant pour entendre as lieus remparer, que
pour garder les frontières, et que nuls mauvais trettiés ne se fesist
des villes et des castiaus que conquis avoient as François. Nous nos
soufferons un petit à parler de euls, et parlerons d’aultres avenues
qui avinrent en France et en Flandre. Fº 102 vº.
P. 93, l. 30: Miremont.--_Mss. A 15 à 17_: Miraumont. Fº 126.
P. 94, l. 4: Bristo.--_Mss. A 7_: Brisco. Fº 119.--_Mss. A 15 à 17_:
Briston. Fº 126.
P. 94, l. 5: Garone.--_Ms. B 6_: Geronde. Fº 269.
P. 94, l. 6: Thonins.--_Mss. A 1 à 9, 18 à 33_: Thonis. Fº 124
vº.--_Mss. A 11 à 14_: Thours. Fº 119.--_Mss. A 15 à 17_: Channis. Fº
126.
P. 94, l. 6 et 7: Damasen.--_Mss. A 1 à 6, 11 à 14, 18, 19_: Damensi.
Fº 124 vº.--_Mss. A 20 à 22_: Damancy. Fº 182.--_Ms. B 6_: Damasson en
Angolesmois. Fº 269.
P. 94, l. 9: d’Angouloime.--Ms. B 6: Et ensy concqueroit le conte Derby
en la basse Gascongne chités, villes et chastieaulx, et faisoit rendre
à luy et mettre en l’obeysanche du roy d’Engleterre son signeur. Et se
ne ly alloit nul au devant; car, ensy que vous savés, l’anée precedente
tous les barons de Gascongne franchois avoient esté mort ou pris devant
Auberoche: pour coy nulle recouveranche ne se povoit mettre sus ou pais
des gentilz hommes, car encore estoient le plus prisonniers as Englès
qui ne se povoient armer. Fº 269.
P. 94, l. 16: vingt quatre.--_Ms. B 6_: douze. Fº 270.
P. 94, l. 27: Blaives.--_Mss. A 1 à 6, 20 à 29_: Blanes, Blaines. Fº
124 vº.--_Mss. A 7 à 14_: Blaves. Fº 119.--_Mss. A 18, 19_: Bleves. Fº
127.--_Mss. A 15 à 17_: Blaives. Fº 126.
P. 94, l. 29: Guichart.--_Mss. A 20 à 22_: Richart. Fº 182 vº.
P. 94, l. 29: d’Angle.--_Ms. A 8_: d’Engle. Fº 119.
P. 95, l. 1: Rochewart.--_Mss. A 1 à 6_: Rouchechouart. Fº 124
vº.--_Ms. A 7_: Rochouart. Fº 119.--_Ms. A 8_: Richechouart. Fº 113
vº.--_Mss. A 11 à 33_: Rochechouart. Fº 119 vº.
P. 95, l. 3: Entrues.--_Ms. B 6_: Le siège pendant devant Blaves, le
conte de Kenfort à tout deux cens lances s’en vint devant Mirabiel et
courut le pays environ Ausnay et entra en Saintonge, et puis retourna
en l’ost et amena grant proie. Fº 271.
P. 95, l. 9: Mirabiel.--_Mss. A 1 à 6_: Mirebel. Fº 124 vº.--_Mss. A 7
à 33_: Mirabel. Fº 119 vº.
P. 95, l. 10: Ausnay.--_Mss. A 15 à 17_: Aunoy. Fº 126 vº.--_Mss. A 20
à 22_: Aulnay. Fº 182 vº.--_Mss. A 23 à 29_: Ansny. Fº 143.--_Mss. A 30
à 33_: Ausny. Fº 175.
§ =235=. P. 95, l. 13: Ce siège pendant.--_Ms. d’Amiens_: Quant li
seigneur d’Engleterre eurent là sis un grant tamps, et que li yviers
les aprochoit, et que riens à Blaves ne faisoient, il se deslogièrent
et vinrent devant un castel que on claimme Bourch desoubs Blaves,
et l’assegièrent et y fissent pluisseurs assaux. En le fin tant
l’assaillirent que il le prissent et le rappareillièrent bien et fort,
et y missent dedens deux cens archiers pour le garder. Et en fissent
castiellain un bon escuier que on apelloit Jen Dancastre. Et puis
rappassèrent la Garone et s’en revinrent à Bourdiaux, che fu environ le
Saint Michiel l’an mil trois cens quarante cinq.
Au voir dire, moult furent honnerables et pourfitables ces deux saisons
pour le comte Derbi et ses gens. Et tant y gaegnièrent en pluisseurs
mannierrez que li plus povre en furent riche. Et ne faisoient compte
li varlet ne d’or ne d’argent, tant en estoient rempli. Yaux revenu à
Bourdiaux, il se departirent, et en alla chacuns en se garnison. Et li
comtez Derbi et messires Gautiers de Mauni se tinrent à Bourdiaux. Fº
85 vº.
P. 95, l. 18: obligiet.--_Les mss. A 1 à 6, 11 à 14, 18 à 22 ajoutent_:
au roy d’Angleterre. Fº 125.
P. 95, l. 27: Norvich.--_Mss. A 8, 9_: Morvich. Fº 113 vº.--_Mss. A 20
à 22_: Norwich. Fº 183.
P. 96, l. _16 à 23_: Or... devant.--_Cet alinéa manque dans les mss. A
23 à 33._ Fº 143.
P. 96, l. _21 à 23_: en celle... devant.--_Mss. A 1 à 6_: en celle
mesme saison et année. Fº 125.--_Ms. A 8_: en celle meisme saison et
année de devant. Fº 114.--_Mss. A 11 à 14_: en celle mesme année. Fº
119 vº.--_Mss. A 7, 18 à 22_: en celle meisme anée et la saison devant.
Fº 119 vº.
P. 95 et 96: Ce siège... devant.--_Le_ § 235 _manque dans les mss. A 15
à 17_. Fº 126 vº.
§ =236=. P. 96, l. 24: En ce tamps.--_Ms. d’Amiens_: En celle saison
eschei en le indination et haynne trop grandement dou roy Phelippe de
Franche ungs grans banerès de Normendie et de grant linage, messire
Ghodefroit de Harcourt. Et le couvint soudainnement wuidier et partir
hors dou royaumme de Franche; car se li roys l’ewist tenut, il n’en
ewist nient fait mains qu’il fist faire dou seigneur de Clichon et des
autrez qui furent decollet à Paris. Si se parti messires Godeffroix
au plus tost qu’il peult, et s’en vint en Braibant où il avoit belle
revenue; et si estoit li dus Jehans, ses cousins. Se le festia et le
tint ung tamps dallés lui. En le fin, il se parti et s’en alla en
Engleterre deviers le roy, qui le vit vollentiers et le retint tantost
à une grant cantitet de gens et de chevaux, et li donna belle terre et
bonne pour son estat et le fist de son consseil. Fº 86.