. . . . . . . . . . . . . .
. . . . . . . . . . . . . .
¿A dincad pay ti yan daguidi dungngó?
aoanen ta inca met inmadayó
ngem nupay casta dica ipato
á lipatanca ingganat caano.
Ta isipem cad no maiparbeng
á iti sabung á taptapayaen
ta maregreg quet manasánasen
quet ti linnaaona ti sitataeng
Liolioa ti aramatec á manglingay
ta ananuen cad I... nasdemanac ti liday
nupay ni patay caniac ti siuray
ibilangconto á ragsacco á siuauayuay.
Ata pinatuloymo la ti isisinam.
ta ania cadi quet dica met magauidan
ngem mapasamacmonto á liolioam
no gapu quenca ti innac pacatacayan.
Daytoy Vigan, á nagayayamam
pudno á inca pinanaoan
iti laguipmo dicanto idian
iti uray no adinno á pagnaedam .
Ngem ¡oh pusoc! ¿ania á sennaay
ti sumquen quenca á liday?...
¡Oh I...! ¡ay! asiacpay
ti impaaymo caniac á impabaclay.
Ta ania la unay á limdó
ti nagladingitan caniac ti naquemmo
ta pimmanaoca á immadayo
quet inranám pay unay iti caaoanco.
Quet idinto ta saoenda quet innac nangeg
diay Sto. Domingo ti ilalabasyo á saquitec
dagus la á diac nacatimec
ta luluac ti dumalines.
Alá isunan quet ingaac
daytoy innac panagsurat
ta luluac ti manacanac
no sica ti maipalaguip caniac.
Aoatem toy naricut quenca á yabrasac.
ta barucongmo ta pinagtalaonac,
pinanaoánnac ta pinagtalaonac,
ti sumangcangrona á pinagayat
Adios I...! nupay no insinanac
daoatco á dicanto caniac malipat,
iti racsac oenno leddaang aoagannac
ta madadaanacto met quenca á umarayat.
Ngem amangan piman nagrigat
ti sumina ti cayan-ayat
ti arig á magudas
ti cacaisuna unay á biag.