Sire chevalier aincores convient que me dittes une chose pour la
conclusion de mes demandes c'est que me dittes lequel vous aimeriez
mieulx ou que vostre dame en amours fust belle par raison et sage
oultreement. ou sage par raison et belle oultreement.
Le chevalier.
Damoiselle je vous respons que mieulx ameroie qu'elle fust sage
outreement et belle raisonnablement. Car combien que beauté soit une
chose moult prisie et moult desiree en amours si le surmonte la vertu de
senz autant que fait le soleil la clerté de la lune.
La damoiselle.
Sire chevalier aincoires vous demande lequel vit en plusgrant malaise ou
cellui qui est fins jaloux de s'amie et si en joyst ou cellui qui vit en
priant merci sans nul ottroy d'amours et sans jalousie.
Le chevalier.
Damoiselle cellui qui est jaloux de s'amie et si en joyst. car jalousie
si est le plus mauvais vice et plus grieve aux amans qui soit entre tous
autres.
La damoiselle.
Sire chevalier affin de non plus vous traveillier je metteray fin a mes
demandes vous remerciant de tout mon possible de voz honnestes et
gracieuses responses par lesquelles j'ay entencion d'orres en avant me
mieulx et plussagement conduire ens ou pelerimage d'amours ouquel je
suis en chemin pelerine que je n'eusse sceu faire sans vostre debonnaire
conseil. Et outre plus se en moy est aucun passetemps de demandes
affreans a damoiselle honneste et dignes de responses. je vostre humble
disciple et chamberiere me submés et offre de mon possible sans riens
vous en celler sans toutesfois touchier a l'onneur des dames tant soit
pou. Car je suis icy pour garder leur honneur en tant que en moy en est.
et aussy sire chevalier je vous sçay si prudent et si discret que a ce
ne vouldriez touchier/ comme assez l'ay desja esprouvé et congneu.
Le chevalier.
Damoiselle trop me donnez de voz loenges et gracieuses parolles mal en
moy merités. Car chose ne vous ay apris ne monstré que sauve vostre
grace ne sceussiez aussy bien et trop mieulx que moy ains que les vous
deisse. mais ce que vous en ay respondu a esté et est du tout a vostre
noble correction. Et de ce que m'en portez en vostre honneur moult me
plaist et telement que m'en constraingniez estre a perpetuité vostre
loyal chevalier en amours. Or damoiselle mais qu'il ne vous ennoye et
que point ne vous donne de traveil attendu aussy que avons aincoires
temps assez et lieu couvenable de deviser en maniere de passetemps. Et
aussy que moult me peseroit le departement d'entre nous je vous requiers
que me veuilliez satisfaire par voz gracieuses responses a aucunes
secretes demandes appartenans aux dames et dont entre nous hommes ne
povons cognoistre se n'est de par vous protestant toutesvoies que ceste
chose ne fay par arrogance ou presumption ne pour autre male foy ou
deception fors seulement pour nous entretenir en parrolles joieuses et
honnestes. ensuivant celles dont m'avez nagaires fait les demandes
La damoiselle.
Sire chevalier trop seroie a blasmer de desdaing et d'ingratitude se
ceste vostre requeste vous escondissoie mais d'une chose vous suplie/
c'est que prenez en gré mon petit sens femenin et des responses que vous
feray n'y adjouster grant substance ains le mettés et imputez a mon
tendre et jone eage. et sur ceste protestacion commenciez quant il vous
plaira.
Le chevalier.
Damoiselle donques pour mieulx me conduire en amours s'il vous plaist
vous me direz lequel de deux mieulz vauldroit a dame ou damoiselle ou
qu'elle ottroiast son desir et amour a un escuier de bonne condicion de
qui elle seroit loyaument amee/ ou qu'elle l'escondist sans y jamais
povoir recouvrer.
La damoiselle.
Sire chevalier mieulx lui voulroit ottroier son amour que s'escondire.
car on ne doit trop eslongier un bon ami quant on l'a. combien que nous
disons qu'ilz sont difficiles a trouver
Le chevalier.
Damoiselle je vous conjure par la poissance du dieu d'amours que me
dittes se oncques vous feistes la sourde oreille quant aucun escuier
vous requeroit de vostre amour pour doubte que ne mesprissiez en vostre
response.
La damoiselle.
Sire chevalier espoir que oyl. Car la honte que j'avoye et paour de non
adressier a homme secret et loyal me faisoit l'oreille sourde et la
bouche mue.
Le chevalier.
Damoiselle je vous demande le quel entre vous dames vous prisiez le plus
ou homme attrempé sage et non gaires bel. ou cellui qui est cointes
jolis euvoisiez et plaisans et non gaires prudent
La damoiselle.
Sire chevalier trop plus est a prisier l'escuier attrempé sage et a
mesure que le bel non prudent. Car jamais n'a lieu vice devant vertu.
Le chevalier.
Damoiselle je vous demande laquelle femme aime le mieulx ou celle qui
prent ou celle qui donne.
La damoiselle.
Sire chevalier je croy que ce soit celle qui donne. Car nul sage escuier
ne doit avoir fiance en amour de femme. ne par contraire damoiselle en
amour d'homme qui tend a avoir prouffit de la personne qu'il aime et
mesmes est un vice moult reprochable et deshonneste.