Damoiselle aincores veul de vous savoir lequel vous ameriez mieulx a
avoir de voz amours ou joye et deduit qui tantost fauldroit. ou avoir
bon espoir d'elles sans parfaittement en joyr.
La damoiselle.
Sire chevalier trop mieulx ameroie avoir de mes amours bon espoir sans
en parfaitement joyr que d'en joyr et tantost faillir. Car la couronne
d'amours est de le savoir contenir et servir.
Le chevalier.
Damoiselle je vous demande le quel de deux mieulx ameriez ou a oyr dire
moult de maulx de vostre amy et vous y trouvissiez moult de biens. ou
que vous oyssiez dire moult de biens de lui et vous y trouvissiez mal.
La damoiselle.
Sire chevalier a ceste vostre demande en est la response moult clere.
Car trop mieulx ameroie oir dire mal de mon ami par tel si que je y
trouvasse des biens que le contraire. On dist que tout noble et vaillant
cuer ne se doit arrester aux parrolles volans. mais seulement a
l'experience/ et a ce je m'en tiens.
Le chevalier.
Damoiselle puis que en vous treuve si parfaitte prudence aincoires veuil
de vous savoir se en bone amour n'eut onques fin.
La damoiselle.
Sire chevalier aincoires plus avant vous veuil bien dire que en bonne
amour n'eut onques commencement et si croy fermement que en elle jamais
n'aura fin. ains a esté et est et sera avec dieu pardevant tous les
siecles et est de present entre dieu et les hommes et si durera
pardurablement.
Le chevalier.
Damoiselle pour ce que diversement est entre les hommes parlé d'amours
l'un en le blasmant l'autre en la loant je vouldroie volentiers savoir
de vous duquel il y a plus en amours ou de bien ou de mal.
La damoiselle.
Sire chevalier quoy que l'en die d'amours trop plus y a de bien que de
mal envers ceulx qui s'en scevent entremettre. Car nul ne porroit tant
de mal endurer en la queste d'amours que un tout seul bien ne l'en
puisse guerdonner et enrichir.
Le chevalier.
Damoiselle combien que n'ayez aincoires esté mariee je vous demande se
vous amiez bien parfaitement un escuier/ duquel pareillement vous
fussiez bien amee. lequel dueil passeriez vous plus legierement/ ou se
vostre ami se marioit a une autre damoiselle ou s'il morroit.
La damoiselle.
Certainement sire chevalier se si parfaitement l'amoie comme vous dittes
mieulx ameroie qu'il morrust/ que qu'il se remariast a une autre de moy.
Car trop dure chose me seroit a porter veoir autrui joyr de cellui en
qui j'auroie du tout mis mon cuer et ma beneureté.
Le chevalier.
Damoiselle aincoires veuil de vous aprendre une chose de laquele
paraventure aincoires n'avez eu besoing. C'est que se un escuier et une
damoiselle aiment l'un l'autre parfaitement/ et il avient que un autre
escuier requist la damoiselle de son amour je vous demande se elle le
doit dire a son ami ou non.
La damoiselle.
Sire chevalier bien est vray que onques de ceste chose n'eus affaire.
mais tant vous dy que la damoiselle le doit dire a son ami voire se elle
le scet sage et discret autrement non. Car entre deux amans ne doit
nulle rien estre celee ne aussy de femme a mary.
Le chevalier.
France damoiselle se ainsi fust que tenissiez loyales amours en voz
mains je vous prie que me dittes que vous en feriez.