_Del señorio que han los homes en las gallinas, et en los capones, et
en las ánsares et en las otras aves que crian en sus casas._
Gallinas, et capones et las ánsares que nascen et se crian en las casas
de los homes, non son de natura salvage: et por ende decimos que maguer
vuelen et se vayan de casa de aquellos que las crian por espanto ó
en otra manera, et non tornen hi, que por eso non pierden el señorio
dellas aquellos cuyas son, ante decimos que quien quier que las prenda
con entencion de las facer perder á su señor, que gelas puede demandar
por furto, bien asi como las otras cosas que toviese en su casa et
gelas furtasen.