_Cómo pierde home el señorio de los pavones, et de los faysanes, et de
las palomas et de las otras aves semejantes._
Pavones, et faysanes, et gallinas de India, et palomas, et gruas, et
ánsares et las otras aves semejantes dellas que son salvages segunt
natura, costumbran los homes á las vegadas á amansar et criar en sus
casas. Et por ende decimos que en quanto costumbran estas aves atales
de ir et tornar á casa daquel que las cria, que ha el señorio dellas
por do quier que anden: mas luego que ellas por sí se dexan de la
costumbre que usaban de ir et de tornar, que pierde el señorio dellas
el que lo habie, et gánalo quien quier que las prenda. Eso mesmo
decimos de los ciervos, et de los gamos, [1233] et de las encebras, et
de las otras bestias salvages que los homes amansan et crian en sus
casas; ca luego que se tornan á la selva et non usan de venir á la casa
ó al logar do su dueño las tenie, pierde el señorio dellas.