_Con quáles escribanos deben facer las pesquisas los pesquiridores._
Guarda deben tomar en sí mesmos los pesquiridores quando pesquisas
hobieren de facer, que non las fagan con otros escribanos sinon con
estos que aqui diremos; ca si de otra guisa lo ficiesen podrien caer
en yerro de que serien [1178] sospechosos, et por aventura embargase
hie que non podrien saber verdat de aquello sobre que quisiesen facer
la pesquisa [1179] descobriéndoles aquello que ellos querien tener en
poridat. Et por ende decimos que quando el rey enviare á algunos de su
casa para facer pesquisa, que non la deben facer con otros escribanos
sinon con los de la corte del rey; pero que non sean naturales nin
moradores de aquellos logares do la hobieren á facer. Mas si enviare
carta á alguno que la faga, él debe tomar tal escribano que le ayude
porque bien et lealmente la puede facer: et los que la ficieren por
mandado del merino mayor ó de alguno de los otros que han poder de
la mandar facer, deben tomar tales escribanos con que la fagan como
dixiemos en el título de los testigos.