_Por qué razones puede defender el juez al abogado por todo tiempo que
non razone por otri en juicio._
Seyendo probado contra algunt judgador que en los pleytos que oïe et
libraba ficiera á sabiendas alguna cosa contra derecho como non debie,
ó que dexara de facer lo que segunt derecho debiera facer, defendemos
que dende adelante non pueda seer abogado en ningunt pleyto: et esto
porque se da á entender que pues que erró á sabiendas en judgar que non
serie leal en razonar los pleytos. Otrosi decimos que si el judgador
diere sentencia contra algunt abogado como contra home de mala fama, ó
por alguna otra razon derecha defendiéndole que de alli adelante non
abogue, si el abogado non se alzare de su juicio dende adelante non
puede abogar por otri sinon por aquellas personas que desuso deximos,
fueras ende si el rey le ficiese merced otorgandol que lo pueda facer.