_Cómo aquel que lidiare con bestia brava por prescio quel den non puede
seer vocero por otri sinon por personas señaladas._
Non puede seer abogado por otri ningunt home que rescibiese prescio
por lidiar con alguna bestia fiera, fueras ende si hobiese á razonar
pleyto que pertenesciese á huérfanos quél mesmo hobiese en guarda: et
defendieron que tal home como este non podiese abogar, porque cierta
cosa es que quien se aventura á lidiar por prescio con bestia brava
non dubdarie de lo rescebir por facer engaño et nemiga en los pleytos
que hobiese de razonar. Pero el que lidiase con bestia fiera non por
prescio mas por probar su fuerza, ó si rescibiese prescio por lidiar
con tal bestia que fuese dañosa á los de alguna tierra, en ninguna
destas dos razones non le empescerie que non podiese abogar, porque
este se aventura mas por facer bondat, que por cobdicia de dineros.