_Cómo deben seer escarmentados los que volviesen pelea entre los suyos
en tiempo de guerra de que nasciese muerte, ó ferida ó deshonra._
[1057] Pelea et vuelta fue cosa que extrañaron mucho los antiguos, et
mayormente en fecho de guerra: et esto ficieron por dos males que en
ello entendieron: el primero avoleza en dexar de facer el bien que
comenzáran para valer mas, et tornar á facer mal para valer menos: el
segundo falsedat en non querer acabar aquel fecho por que van, dando
la honra dél á los enemigos, et la deshonra á sí mesmos. Et por ende
establescieron que todo aquel que sacase armas en hueste ó en cabalgada
para tal fecho como este, que gelas tollesen, et fuese recabdado
mientre aquel fecho durase, et de alli adelante que non hobiese parte
en la ganancia que los otros ficiesen. Mas si deshonrase de dicho
ó de fecho que hobiese doble pena que si lo ficiese en otro logar,
salvo ende en corte de rey: et si acaesciese que diese ferida de que
fincase lisiado, quel cortasen aquel miembro con que gela diera, asi
como pie ó mano: et si muriese della que lo soterrasen so el muerto,
fueras ende si ficiese algunos destos fechos en defendiendo su cuerpo
ó acabdellando ó castigando su compaña. Et esto non se entiende de los
mayores, ca estos quando tal cosa ficiesen deben seer presos et metidos
en prision para siempre: [1058] pero si amor les quisiesen facer
puédenlos echar del regno para todavia. Mas si el rey se hi acertase,
en qualquier manera quel escarmentase, puédelo facer con derecho: et
si non se acertase hi, tovieron por bien que fuesen recabdados los que
estos ficiesen, et que les diese el rey pena por su alvedrio segunt
quales homes fuesen los facedores del daño et el que lo rescebiese, et
el logar et el tiempo en que fuese fecho, et catando sobre todo el mal
que ende viniera ó podrie venir.