_Quántas maneras son de gualardones._
Los gualardones que merescen los que son bien acabdellados et facen
los grandes fechos en las guerras son en dos maneras: la una es
sobre bondades ciertas que los homes facen segunt los fechos que les
acaescen, la otra por alvedrio de aquellos que los han de gualardonar.
Et esta primera que es de los gualardones ciertos se departe en tres
maneras: la primera quando el home rescibe gualardon sin pérdida que
haya fecho, la segunda quando gelo dan por pérdida que rescibe, la
tercera quandol gualardonan el bien que face mas de razon. Et nos
fablaremos en las leyes deste título de cada uno segunt lo ellos
departieron: et primeramente de los gualardones que son ciertos,
et desi la pena que deben haber los que esto pudiesen facer et non
quisiesen.