_Cómo deben apreciar las bestias et las armas de la hueste et de la
cabalgada ante que se vayan del logar do han á salir, porque sepan cómo
han de facer la emienda._
Bestias, et armas et otras cosas pierden los homes en las guerras de
que han á haber emienda, et señaladamente de lo que ganaren de los
enemigos. Et porque cobdicia face á los homes demandar á las vegadas
mas de lo que valen las cosas que pierden, por ende tovieron por bien
los antiguos que ante que la hueste ó la cabalgada moviese del logar
onde hobiesen á salir, que fuesen apreciadas las armas et las bestias
que levasen: et esto pusieron non tan solamente porque cada uno hobiese
emienda de lo que hobiese perdido, mas aun porque los perdidosos non
agraviasen á los otros demandando por las cosas mas de lo que valiesen:
et para esto facer tovieron por bien que escogiesen los mas sabidores
homes et los mas leales que fallasen entre sí, et estos que fuesen
apreciadores jurando primeramente por Dios que guardarán á cada uno su
derecho, tambien á aquellos cuyas son las cosas que aprecian como á los
otros que han á facer las erechas por ellos. Et desque hobieren desta
guisa jurado deben apreciar las cosas, et las bestias et las armas, et
facerlas escrebir quántas son las que cada uno lleva, et quánto vale
cada una por sí: et quando tornaren de la hueste ó de la cabalgada debe
seer fecha la emienda de lo que ganasen segunt el apreciamiento destos
sobredichos daquello que fallaren en verdat que perdieron por ocasion
et sin culpa daquellos cuyo era.