QUE FABLA DE QUAL DEBE SEER EL PUEBLO EN GUARDAR, ET EN BASTECER, ET
EN DEFENDER ET EN DAR LOS CASTIELLOS ET LAS FORTALEZAS DEL REY ET DEL
REGNO.
Guardar los castiellos et las fortalezas, et darlos á aquellos
cuyos son et á los que gelos dieron, es cosa que deben los homes en
todas guisas facer. Onde pues que en el título ante deste fablamos
de qual debe seer el pueblo en guardar al rey en las cosas que son
llamadas muebles ó raices que pertenescen á él señaladamente para su
mantenimiento, queremos aqui mostrar como el rey debe seer guardado
en sus villas, et en sus castiellos et en las otras fortalezas que
pertenescen á él et al regno: et mostraremos como deben los del pueblo
facer esta guarda: et por qué razones: et quáles deben seer los
alcaydes que han de tener los castiellos: et cómo los deben rescebir:
et qué es lo que deben facer para guarda et amparanza dellos: et cómo
se deben dar et emplazar los castiellos, et á quien. Et sobre todo
diremos de las fortalezas que dan los reyes en fieldat entre sí, et
de los otros castiellos que cobran ó ganan los naturales del rey en
su conquista de como se deben dar segunt fuero antiguo de España: et
en cada ley deste título diremos la pena que deben haber los que de
otra guisa guardasen, ó diesen, ó retoviesen para sí ó enagenasen los
castiellos del rey et las otras fortalezas que pertenescen á él et al
regno.