UN Poëte Latin parlant des langues & dictions qui perissent bien
souvent, & se remettent sus selon les humeurs & usages des temps, dit
fort bien:
_Multa renascentur quæ jam cecidere, cadentque._ Ainsi est-il des faits
de plusieurs personnages, déquels la memoire se pert bien souvent avec
les hommes & sont frustrez de la louange qui leur appartient. Et pour
n'aller chercher des exemples externes, le voyage de nôtre Capitaine
Jacques Quartier depuis Sainte-Croix jusques au saut de la grande
riviere, étoit inconu en ce temps ici, les ans & les hommes (car
Belleforet n'en parle point) lui en avoient ravi la louange, si bien que
Champlein pensoit étre le premier qui en avoit gaigné le pris. Mais il
faut rendre à chacun ce qui lui appartient, & suivant ce, dire que ledit
Champlein a ignoré l'histoire du voyage dudit Quartier: Et neantmoins ne
laisse d'estre louable en ce qu'il a fait. Mais je m'étonne que le sieur
du Port Gravé Capitaine hantant dés long temps les Terres-neuves, &
conducteur de la navigation dudit Champlein pour le sieur de Monts, ait
ignoré cela. Or pour ne nous amuser, voila la description du voyage
d'icelui Quartier au dessus du port de Sainte-Croix.
Le dix-neufiéme jour de Septembre nous appareillames & fimes voile avec
le gallion & les deux barques pour aller avec la marée amont ledit
fleuve, où trouvames à voir des deux côtez d'icelui les plus belles &
meilleures terres qu'il soit possible de voir, aussi unies que l'eau,
pleines des plus beaux arbres du monde, & tant de vignes chargées de
raisins le long du fleuve, qu'il semble mieux qu'elles y ayent été
plantées de main d'homme, qu'autrement. Mais pource qu'elles ne sont
cultivées, ni taillées, ne sont lédits rasions si doux, ne si gros comme
les nôtres. Pareillement nous trouvames grand nombre de maisons sur la
rive dudit fleuve, léquelles sont habitées de gens qui font grande
pécherie de tous bons poissons selon les saisons, & venoient en noz
navires en aussi grand amour & privauté que si eussions été du païs,
nous apportans force poisson & de ce qu'ils avoient, pour avoir de notre
marchandise, tendans les mains au ciel, faisans plusieurs ceremonies &
signes de joye. Et nous étans posés environ à vint-cinq lieues de
_Canada_ en un lieu nommé _Achelaci_, qui est un détroit dudit fleuve
fort courant & dangereux tant de pierres, que d'autres choses, là
vindrent plusieurs barques à bord, & entre autres vint un grand seigneur
du païs, lequel fit un grand sermon en venant & arrivant à bord,
montrant par signes evidens avec les mains & autres ceremonies, que
ledit fleuve étoit un peu plus à-mont fort dangereux, nous avertissant
de nous en donner garde. Et presenta celui Seigneur au Capitaine deux de
ses enfans à don, lequel print une fille de l'aage d'environ huit à neuf
ans, & refusa un petit garçon de deux ou trois ans, parce qu'il étoit
trop petit. Ledit Capitaine festiva ledit Seigneur & sa bende de ce
qu'il peut, & lui donna aucun petit present, duquel remercia ledit
Seigneur le Capitaine, puis s'en allerent à terre. Dempuis sont venus
celui Seigneur & sa femme voir leur fille jusques à _Canada_, & apporter
aucun petit present au Capitaine.
Dempuis ledit jour dix-neufiéme jusques au vint-huitiéme dudit mois nous
avons été navigans à-mont ledit fleuve sans perdre heure ni jour, durant
lequel temps avons veu & trouvé aussi beaucoup de païs & terres aussi
unies que l'on sçauroit desirer, pleines de plus beaux arbres du monde,
sçavoir chénes, ormes, noyer, pins, cedres, pruches, fraines, boulles,
sauls, oziers, & force vignes (qui est le meilleur) léquelles avoient si
grande abondance de raisins, que les compagnons (_c'est à dire les
matelots_) en venoient tout chargés à bord. Il y a pareillement force
gruës, cygnes, outardes, oyes, cannes, alouettes, faisans, perdris,
merles, mauvis, tourtres, chardonnerets, serins, linottes, rossignols, &
autres oyseaux, comme en France, & en grande abondance.
Ledit vint-huitiéme de Septembre nous arrivames à un grand lac & plaine
dudit fleuve large d'environ cinq ou six lieuës, & douze de long. Et
navigames ce jour à-mont ledit lac sans trouver par tout icelui que deux
brasses de parfond également sans hausser ni baisser. Et nous arrivans à
l'un des bouts dudit lac ne nous apparoissoit aucun passage, ni sortie,
ains nous sembloit icelui étre tout clos, sans aucune riviere, & ne
trouvames audit bout que brasse & demie, dont nous convint poser &
mettre l'ancre hors, & aller chercher passage avec noz barques, &
trouvames qu'il y a quatre ou cinq rivieres toutes sortantes dudit
fleuve en icelui lac, & venantes dudit _Hochelaga_. Mais en icelles
ainsi sortantes y a basses & traverses faites par le cours de l'eau où
il n'y avoit pour lors qu'une brasse de parfond, & lédites basses
passées y a quatre ou cinq brasses, qui étoit le temps des plus petites
eaux de l'année, ainsi que vimes par les flots dédites eaux qu'elle
croissent de plus de deux brasses de pic.
Toutes icelles rivieres circuissent & environnent cinq ou six belles
iles qui sont le bout d'icelui lac, pour se rassemblent environ quinze
lieues à-mont toutes en une. Celui jour nous fumes à l'une d'icelles ou
trouvames cinq hommes qui prenoient des bétes sauvages, léquelz vindrent
aussi privément à noz barques que s'ilz nous eussent veuz toute leur
vie, sans avoir peur ni crainte. Et nodites barques arrivées à terre,
l'un d'iceux hommes print ledit Capitaine entre ses bras, & le porta à
terre ainsi qu'il eust fait un enfant de six ans, tant estoit icelui
homme fort & grand. Nous leur trouvames un grand monceau de Rats
sauvages qui vont en l'eau, & sont gros comme Connils, & bons à
merveilles à manger, déquelz firent present audit Capitaine, qui leur
donna des couteaux & patenotres pour recompense. Nous leur demandames
par signes si c'étoit le chemin de _Hochelaga_; & ilz nous répondirent
qu'oui: & qu'il y avoit encore trois journées à y aller.
Le lendemain vint-neufiéme de Septembre le Capitaine voyant qu'il
n'étoit possible de pouvoir pour lors passer ledit gallion, fit
avictuailler & accoutrer les barques, & mettre victuailles pour le plus
de temps qu'il fût possible, & que lédites barques en peurent accuillir,
& se partant avec icelles accompagné de partie des Gentils-hommes,
sçavoir de Claude du Pont-briant Echanson de monseigneur le Dauphin,
Charles de la Pommeraye, Jean Govion & vint-huit mariniers y compris
Mace Jalouber, & Guillaume le Breton, ayant la charge souz ledit
Quartier des deux autres navires, pour aller à-mont ledit fleuve au plus
loin qu'il nous seroit possible. Et navigames de temps à gré jusques au
deuxiéme jour d'Octobre, que nous arrivames à _Hochelaga_, qui est
distant du lieu où étoit demeuré le gallion d'environ quarante-cinq
lieuës.
Durant lequel temps & chemin faisans, trouvames plusieurs gens du païs
qui nous apporterent du poisson & autres victuailles, dansans & menans
grand'joye de notre venue. Et pour les attraire & tenir en amitié avec
nous leur donnoit ledit Capitaine pour recompense des couteaux,
patenotres, & autres menues hardes, dequoy se contentoient fort. Et nous
arrivez audit _Hochelaga_, se rendirent audevant de nous plus de mille
personnes tant hommes, femmes, qu'enfans, léquelz nous firent aussi bon
recueil que jamais pere fit à enfant, menans une joye merveilleuse. Car
les hommes en une bende dansoient, & les femmes de leur part, & leurs
enfans d'autre, léquels nous apportoient force poisson & de leur pain
fait de gros mil, lequel ilz jettoient dedans nodites barques, en sorte
qu'il sembloit qu'il tombât de l'air. Voyant ce le Capitaine descendit à
terre accompagné de plusieurs de ses gens, & si tôt qu'il fut descendu,
s'assemblerent tous sur lui, & sur les autres, en faisans une chere
inestimable: & apportoient les femmes leurs enfans à brassées pour les
faire toucher audit Capitaine, & és autres qui étoient en sa compagnie,
en faisant une féte qui dura plus de demie heure. Et voyant ledit
Capitaine leur largesse, & bon vouloir, fit asseoir & ranger toutes les
femmes, & leur donna certaines patenotres d'étain, & autres menues
besongnes; & à partie des hommes des couteaux. Puis se retira à bord
dédites barques pour soupper & passer la nuit: durant laquelle demeura
Icelui peuple sur le bord dudit fleuve, au plus prés dédites barques,
faisans toute la nuit plusieurs feuz & danses, en disant à toutes heures
_Aguiazé_ qui est leur dire du salut & joye.
_Comment les Capitaines & les Gentils-hommes de sa compagnie, avec ses
mariniers bien armez & en bon ordre allerent à la ville de_ Hochelaga.
_Situation du lieu. Fruits du païs: Batimens: & maniere de vivre des
Sauvages._