LE lendemain au plus matin le Capitaine accoutra, & fit mettre ses gens
en ordre pour aller voir la ville & demeurance dudit peuple, & une
montagne qui est jacente à ladite ville, où allerent avec ledit
Capitaine les Gentils-hommes, & vint mariniers, & laissa le par-sus pour
la garde des barques, & print trois hommes de ladite ville de
_Hochelaga_ pour les mener & conduire audit lieu. Et nous étans en
chemin, le trouvames aussi battu qu'il soit possible de voir en la plus
belle terre & meilleure plaine: des chénes aussi beaux qu'il y en ait en
forest de France, souz léquels estoit toute la terre couverte de glans.
Et nous ayans fait environ lieuë & demie trouvames sur le chemin l'un
des principaux seigneurs de ladite ville de _Hochelaga_, avec plusieurs
personnes, lequel nous fit signe qu'il se falloit reposer audit lieu
prés un feu qu'ils avoient fait audit chemin. Et lors commença ledit
seigneur à faire un sermon & prechement, comme ci-devant est dit étre
leur coutume de faire joy & conoissance, en faisant celui seigneur chere
audit Capitaine & sa compagnie, lequel Capitaine lui donna une couple de
haches & une couple de couteaux, avec une Croix & remembrance du
Crucifix qu'il lui fit baiser, & le lui pendit au col. Dequoy il rendit
grace audit Capitaine. Ce fait marchames plus outre, & environ demie
lieuë de là commençames à trouver les terres labourées, & belles grandes
campagnes pleines de blé de leurs terres, qui est comme mil de Bresil,
aussi gros ou plus que poins, duquel ilz vivent ainsi que nous faisons
de froment. Et au parmi d'icelles campagnes est située & assise ladite
ville de _Hochelaga_, prés & joignant une montagne qui est à-lentour
d'icelle, bien labourée & fort fertile, de dessus laquelle on voit fort
loin. Nous nommames icelle montagne _Le Mont Royal_. Ladite ville est
toute ronde, & close de bois à trois rangs, en façon d'une Pyramide
croisée par le haut, ayant la rengée du parmi en façon de ligne
perpendiculaire, puis rengée de bois couchez le long bien joints &
cousus à leur mode, & est de la hauteur d'environ deux lances. Et n'y a
en icelle ville qu'une porte & entrée qui ferme à barres, sur laquelle &
en plusieurs endroits de ladite cloture y a manieres de galleries &
echelles à y monter, léquelles sont garnies de rochers & cailloux pour
la garde & defense d'icelle. Il y a dans icelle ville environ cinquante
maison longues d'environ cinquante pas ou plus chacune, & douze ou
quinze pas de large, toutes faites de bois couvertes & garnies de
Grandes écorces, & pelures dédits bois, aussi large que tables, bien
cousues artificiellement selon leur mode: par dedans icelles y a
plusieurs aire & chambres: & au milieu d'icelles maisons y a une grande
salle par terre où font leur feu, & vivent en communauté, puis se
retirent en leurdites chambres les hommes avec leurs femmes & enfans, &
pareillement ont greniers au haut de leurs maisons où mettent leur blé,
duquel ilz font leur pain qu'ils appellent _Caraconi_, & le font en la
maniere ci-apres. Ils ont des piles de bois, comme à piler chanve, &
battent avec pilons de bois ledit blé en poudre, puis l'amassent en
pâte, & en font des tourteaux, qu'ilz mettent sur une pierre chaude,
puis le couvrent de cailloux chauds, & ainsi cuisent leur pain en lieu
de four. Ils font pareillement force potages dudit blé & de féves &
pois, déquels ils ont assez: & aussi de gros concombres, & autres
fruits. Ils ont aussi de grands vaisseaux comme tonnes en leurs maisons,
où ilz mettent leur poisson, sçavoir anguilles & autres qui seichent &
la fumée durant l'Eté, & vivent en Hiver, & de ce font un grand amas,
comme avons veu par experience. Tout leur vivre est sans aucun goût de
sel, & couchent sur écorces de bois étenduës sur la terre, avec
méchantes couvertures de peaux, dequoy font leurs vétemens, sçavoir
Loire, Biévres, Martes, Renars, Chats sauvages, Daims, Cerfs, & autres
sauvagines; mais la plus grande part d'eux sont quasi tout nuds.
La plus precieuse chose qu'ils ayent en ce monde est _Esurgni_, lequel
est blanc, & le prennent audit fleuve en Cornibots en la maniere qui
ensuit. Quant un homme a deservi la mort ou qu'ilz ont prins aucuns
ennemis à la guerre ilz le tuent, puis l'incisent par les fesses &
cuisses, & par les jambes, bras, & épaules à grandes taillades. Puis és
lieux où est ledit _Esurgni_ étalent ledit corps au fond de l'eau, & le
laissent dix ou douze heures, puis le retirent et trouvent dedans
lédites taillades & incisions lédits Cornibots, déquelz ilz font des
patenotres, & de ce usent comme nous faisons d'or & d'argent, & le
tiennent la plus precieuse chose du monde. Il a la vertu d'étancher le
sang des nazilles: car nous l'avons experimenté. Cedit peuple ne
s'addonne qu'à labourage & pécherie pour vivre. Car des biens de ce
monde ne font compte, parce qu'ilz n'en ont conoissance, & qu'ils ne
bougent de leur païs, & ne sont ambulatoires comme ceux de _Canada_, &
du _Saguenay_: nonobstant que lédits Canadiens leur soient sujets, avec
huit ou neuf autres peuples qui sont sur ledit fleuve.
_Arrivée du Capitaine Quartier à_ Hochelaga: _Accueil & caresses à lui
faites: Malades lui sont apportez pour les toucher: Mont-Royal: Saut de
la grande riviere de_ Canada: _Etat de ladite riviere outre ledit Saut:
Mines: Armures de bois, duquel usent certains peuples: Regret de sa
départie._