真君姓许，名逊，其号安做敬之，係江西南昌府生米乡，後汉三国当时嘅人。这只人极忠厚，做过旌阳县官，治理子民极有仁爱，好习练老君嘅教，施药炼丹，死後葬在许家庄。後来遇着江西大水，冲崩民间屋舍，假作谣言，孽龙作乱，若使唔係许逊擒住，江西就哙变做湖啰。许逊门边有一只大潭，该等水周长年冇乾，侧边有一樖铁色嘅树。就係话，该樖树与该只大潭，做祭孽龙嘅地方。又话许逊一家人，男妇老少鸡狗，白日升天。传等假话，诱惑好多人。至到宋朝徽宗皇帝，也习练老君道教，封许逊做神功妙济真君，赐倒一只匾额，写“竟王隆万寿”，故所以今下称其嘅庙堂，话万寿宫。又称做江西福神，男女都去敬拜，望佢保佑。宋徽宗封好多道教人为神，到亡国当时，冇一只神来救佢。这只许逊既然冇能为救其恩人，佢样边还救得别人呢？今下拜许真君侪，做乜嘅唔晓醒悟弃绝佢，来服事真神呢？