faisoient il (les Écossais) et ne quidoient pas que nuls lor deuist
aler au devant ne resister lor cemin, tant estoient il ºrguilleus
et presomptieus; mais si fissent, car si tretos que les nouvelles
vinrent à la roine d’Engleterre, qui se tenoit à Iorch, et qui là
avoit asamblé ce que elle pooit avoir de gens, [et que elle] sceut que
li rois d’Escoce et les Escoçois estoient entré en Norhombrelande et
ardoient et essilloient le pais, pour mieux montrer que la besongne
estoit sienne, elle se departi de Evruich à ce que elle avoit de gens,
le conte de Honstidonne, que elle avoit fait connestable de toute son
hoost, et le signeur de Moutbrai, marescal, en sa compaignie. Et là
estoient li archevesques de Cantorbie, li archevesques d’Iorch, li
evesques de Londres, li evesques de Harfort, li evesques de Nordvich,
li evesques de Lincole et li evesques de Durames; car en Engleterre,
qant li besoins est, tout li prelat et li clergiés s’arment pour aidier
à deffendre et garder leur pais. Li rois d’Escoce et les Escoçois
esploitièrent tant que il vinrent logier à trois petites lieues dou
Noef Chastiel sur Thin, où la roine d’Engleterre estoit venue. Et pas
ne savoient les Escoçois que elle fust là ne en celle assamblée des
Anglois, et ne le tenoient pas à si vaillant fenme que elle estoit et
que il le trouvèrent.
Bien sçavoient les Escoçois que les Englois estoient requelliet en
la ville dou Noef Chastiel sur Thin; si ques, qant il furent venu et
aresté à trois petites lieues englesces priès de là, il leur mandèrent
par un hiraut que, se il voloient traire hors et venir sur les camps,
il trouveroient les Escoçois tous prês, qui les combateroient; et,
se il ne venoient, il fuissent tout conforté que il les venroient
requerre dedens le Noef Chastiel. Li baron de Northombrelande et li
contes de Hostidonne, as quels les paroles et resquestes adrechièrent,
respondirent que il isceroient bien, qant bon lor sambleroit, non à
la volenté de lors ennemis. Qant ceste response fu oïe, li Escoçois
dissent ensi ensamble: «Ces Englois nous doubtent. Il ne sont que
un petit de gens; il n’oseront issir hors du Noef Chastiel. Se nous
les voulons avoir, il les nous couvient là aler querre. Nous les
assegerons; il seront nostre. Nous tenons les camps en Engleterre.
Avant que li rois d’Engleterre et sa poissance qui sont à siège devant
Calais, soient chi venu, nous auerons fait nostre fait et desconfi
tout le pais. Nous sçavons bien, honmes pour honmes, que nous sonmes
siis contre un, car li pais d’Engleterre est à present tout wis; et
ºnt encores avoecques euls grant fuisson de clergiet, liquel n’aueront
nulle durée contre nous, car il ne sont point fait de la guerre.»
Ensi se devisoient li Escoçois et comptoient les Englois pour tous
desconfis; mais li Englois ne l’entendoient pas ensi. Ançois missent
ils en lors arrois sens, ordenance, avis, et moustrèrent corage de
vaillance. Et furent consilliet, sus la response que il avoient faite
as hiraus qui lor avoient aporté la bataille, que il n’atenderoient
pas que les Escos les venissent requerre ne enclore dedens la ville
dou Noef Chastiel sur Thin, mais se departiroient, le bon matin, tout
apresté pour tantos combatre, se il besongnoit, et se meteroient sus
les camps et prenderoient cel avantage, et ensi esbahiroient ils lors
ennemis. Sus la fourme et manière que il proposèrent, ensi le fissent
ils. Ce prope soir, li contes de Hostidonne, connestables de l’oost,
et li sires de Moutbrai, marescaus, envoiièrent nonchier, d’ostel en
ostel, parmi la ville dou Noef Chastiel sus Thin que au point dou jour,
au son de la tronpette, casquns fust prês pour monter à cheval et pour
sievir l’oost là où les banières chevauceroient. Tout l’acordèrent.
Qant ce vint au point dou jour, les tronpètes sonnèrent; toutes
manières de gens se resvillièrent. Au second cop de la tronpète, tout
s’armèrent; et au tierch son de la tronpète, tout montèrent as chevaus,
voires chil qui cheval avoient. Et chil de piet furent tous prês aussi
pour partir et euls poursievir; et issirent tout dou Noef Chastiel
et se traissent sus les camps, et ceminèrent tout droit deviers les
Escoçois. Et là estoit la bonne roine d’Engleterre, la très vaillans
dame, de quoi tous estoient plus rencoragiet assés, de ce que il le
sentoient avoecques euls.
Les Escos ne se donnèrent de garde au matin, qant les nouvelles lor
vinrent. Et leur fu dit ensi: «Vechi les Englois: il nous viennent
courir sus et combatre.» De ces paroles furent ils moult esmervilliet,
et ne le voloient li auqun croire; et i envoiièrent lors coureurs
pour descouvrir et sçavoir se ces nouvelles estoient vraies. Chil
qui i furent envoiiet raportèrent que il avoient veu les Englois qui
tout s’estoient ordonné au lonch de une haie et mis en bataille, et
les archiers sus deux elles. Donc demandèrent li contes Douglas et li
contes de Moret, en la presence du roi d’Escoce, se il estoient grant
fuisson. Chil respondirent sagement et disent: «Nous ne les poons avoir
tous nombrés, car il se sont couvert et fortefiiet de la haie. Se ne
savons se il en i a otretant delà la haie que nous en avons veu dechà.»
Donc fu dit et devisé entre les Escos: «Or les laisons en ce parti où
il sont; il n’osent traire avant, car il ne se sentent pas fort assés.
Il se taneront et hoderont, et jà sus le soir, nous les irons combatre,
se il nous vient bien à point.» Chils consauls fu tenus, et se tinrent
les Escoçois tout quoi; et n’estoit nulles nouvelles de euls ne fu
jusques à haute nonne: dont les Englois furent tout esmervilliet de ce
que il ne traioient avant.
En celle detriance se conseillèrent li baron et li prelat d’Engleterre
et regardèrent pour le millour et le plus segur que la roine, lor
dame, retournerait au Noef Chastiel: si aueroient mains de carge
et de songne; et remoustrèrent cel avis et lor consel à la roine,
et le peril aussi que ce pooit estre de li, car pour le millour on
l’avoit consilliet. La bonne dame ne volt pas brisier lor consel,
quoique volentiers elle fust demorée dalés ses gens. Qant ce vint au
departir, elle lor pria de bon coer et par grande affection que tout
vosissent entendre au bien conbatre, se la bataille avoient; et tout li
fianchèrent, par la foi de lor coer, que jà ne se fainderoient, mais
feroient tant que il aueroient honnour et pourfit. Adonc se departi la
roine de la place, et retourna deviers le Noef Chastiel et laissa ses
gens couvenir.
Qant la roine fu departie, li signeur et li prelat se remissent
ensamble en consel; et dissent chil liquel estoient le plus usé
d’armes: «Se nous atendons jusques à la nuit, ces Escoçois, qui sont
grans gens, nous poront venir courir sus et porter trop grant damage.
Si seroit bon que nous envoions viers euls jusques à cinq cens lances,
pour euls atraire hors de lors logeis, et que li nostre se facent
cachier, tout au lonch de celle haie, là où nostre archier seront mis
et aresté. Et se les Escos viennent soudainement après nos gens, ensi
que il sont bien tailliet de ce faire, car il sont chaut, boullant
et orguilleus, et tant que pour l’eure il prisent moult petit nostre
affaire, nostres archiers, qui sont frès et nouviauls, trairont sus
euls et entre euls; et nous aussi, gens d’armes, les requellerons
ensi conme il apertient à faire: par ce parti porons nous bien avoir
bonne aventure. Et se il se voellent tenir là où il sont, il donront à
entendre que il nous vodront venir courir sus de nuit, mais nous nos
departirons avant et nous retrairons dedens le Noef Chastiel, car pas
ne nous seroit pourfitable à chi atendre et logier le nuit.»
Chils consauls fu tenus, et chil ordonné, liquel iroient veoir les
Escos. Et se departirent tout en une brouse, bien cinq cens lances,
tous as chevaus; et cevauchièrent tant que il vinrent sus le logeis des
Escoçois: liquel avoient aussi de lors gens sus les camps, pour savoir
le couvenant des Englois. Si tretos que ces chevauceours d’Escoce
les veirent cevauchier, il se hastèrent de retourner viers lors gens
et de euls noncier les nouvelles. Les Escoçois se conmenchièrent
à estourmir et à armer, chil qui desarmé estoient et avoient lors
chevaus tous prês. Evous les Englois venus en une brousse, et vinrent
faire une course devant les Escos. Qant les Escoçois les veirent
venus, tantos ils furent prest de monter à chevaus et de prendre lors
glaves et de venir sus ces Englois, liquel n’atendirent point, mais
se missent au retour tout sagement. Qant les Escos les veirent fuir,
si conmenchièrent à juper et à criier moult hault et à brochier de
l’esporon apriès euls. Les Englois, qui estoient aviset de ce que il
devoient faire, passèrent tout au lonch de la haie où lor archier
estoient; et qant les Escos furent venu jusques à celle haie, les
archiers englois conmenchièrent à traire moult fort et moult roit, et à
enpaller hommes et cevaus et à mettre à grant meschief. Ces cinq cens
lances d’Englès retournèrent tout à un fais et moustrèrent visage, et
encores plus de mille lances qui estoient tout pourveu et aviset de lor
fait.
Ensi se conmença li bataille qui fu grande et grose, et issirent tous
les Escoçois de lors logeis. Et les archiers d’Engleterre s’estendirent
au lonc et donnèrent moult grant confort as gens d’armes de lor costé
et grant painne as Escoçois, liquel se confioient grandement en lor
poissance. Et pour ce que les Englois sentoient bien que il estoient
grans gens, et que, se la journée estoit contre euls, il i prenderoient
si grant damage que jamais ne seroit recouvré, car toute Engleterre
seroit courue tant que dou plat pais, ne jà li rois d’Engleterre, qui
tenoit son siège devant Calais, ni poroit venir à temps. Et tout ce
lor avoit bien et sagement la ditte roine remoustré avant que elle se
departesist de euls, et que toute l’onnour dou roiaulme d’Engleterre
gisoit en celle journée. Et, au voir dire, Englois moustrèrent bien là,
et aussi ont il fait aillours, en toutes places où il se sont trouvé,
que ce sont vaillans gens et de grant corage et conforté en lors
besongnes; et tant plus voient de sanch espars et espandu, et tant sont
il plus hardi et outrageus.
Che jour, ensi que de la belle aventure que li rois d’Engleterre et ses
gens orent de la bataille de Crechi et que euls quinze mille hommes
en tout en desconfirent cent mille, parellement à la bataille dont je
vous parole presentement, un petit de gens que les Englois estoient ou
regart des Escos, desconfirent lors ennemis. Et fu pris li rois qui
moult vaillanment se combati et fu navrés en venant en la bataille,
ou chief, de deus saiètes: de quoi, au traire hors, les fiers li
demorèrent entre les tès et le quir; et depuis par puissons on l’en
fist l’une des saiètes issir hors par le nés, et li aultre li demora
tant que il vesqi. Si le porta il moult lonc temps, car il fu pris l’an
de grace mil trois cens quarante siis.
Et je Jehans Froissars, actères de ces croniques et histores, fui ens
ou roiaulme d’Escoce l’an de grace mil trois cens et soissante cinq,
et de l’ostel le dit roi quinse sepmainnes, car ma très honnourée
dame, madame la roine Phelippe d’Engleterre, m’escripsi deviers li et
deviers les barons d’Escoce, qui pour l’amour de ma dame me fissent
tout bonne chière, et especiaulment li rois, et sçavoit parler moult
biau françois, car il fu de sa jonèce nouris en France, ensi que il
est contenu ichi desus en nostre histore; et euch l’aventure, de tant
que je fui avoecques lui et de son hostel, que il viseta la grignour
partie de son roiaulme. Si le vei tout et considerai par estre en ses
cevauchies, et moult de fois li oy parler et deviser à ses gens qui là
estoient [et] à auquns chevaliers, de la bataille et de sa prise. Et
là i estoient, qui furent à la bataille, mesires Robers de Versi, et i
fu pris dou signeur de Sees en Northombrelant, et mesires Guillaumes
de Glaudigevin, et messire Robert Bourme et mesires Alixandres de
Ramesai; mais li contes de Douglas et le conte de Moret que je trouvai
en Escoce, ce fu lors pères qui avoient esté à celle besongne. Et le
di pour tant que li rois d’Escoce avoit encores le fier de la saiette
ou chief; et qant la lune se renouvelloit, il avoit par usage le chief
moult dolereus, et vesqi depuis que je oy esté en Escoce, plus de douse
ans. Ensi appert il que il porta ce fier enfieret, bien trente deus ans.
Or retournons à la bataille dont je parloie presentement, et recordons
conment elle se persevera, et la grace que Dieus fist ce jour as
Englois, car vous devés sçavoir que Escoçois en bataille sont mallement
fort, appert, dur et hardi. A faire une telle bataille et là où li
rois est navrés et pris, il couvient que il i ait des grans apertisses
d’armes faites. Ces Escos portent haces par usage, dont il donnent et
frapent trop biaus horions; et n’est homs, tant soit bien armés, se il
en est atains de bon brac, qui ne soit couchiés par terre. La bataille
des Englois branla deux ou trois fois, et furent les Englois sur le
point de estre tout desconfi; et l’euissent [esté], se Dieus et fortune
et bonne aventure ne les euist aidiés. Li evesques de Durames, oncles
au signeur de Persi, qui là estoit, uns moult vaillans homs, tenoit une
bataille sus èle, qui reconfortoit les branlans; et ce leur fist trop
de biens, et li trais des archiers. Finablement, les Escoçois furent là
desconfis, mort et pris et tournés en voies, et tantos fu tart. Si ne
dura point la cace longement.
Et escei li rois ens ès mains d’un esquier de Norhombrelande, liquels
se nonmoit Jehans de Qopelant. Chils prist le roi d’Escoce par
vaillance de corps et d’armes, et ot son gant et le fist fiancier à
lui. Chils Jehans de Qopelant, qant il congneut que il avoit si grande
aventure et si belle que pris le roi d’Escoce, il se doubta que on ne
li vosist rescourre ou efforcier; car il i avoit là des grans barons
et chevaliers d’Engleterre trop plus grans que il ne fust, et que les
envies en ce monde sont grandes et les convoitises: si destourna le
roi d’Escoce et ne le mena pas deviers la roine d’Engleterre au Noef
Castiel, mais aillours en un chastiel assés fort et d’un sien grant
ami. Et dist bien Jehans de Qopelant que il ne le renderoit à nul honme
dou monde, fors au roi qui estoit son signeur, et de qui il tenoit son
hiretage. Fºs 129 vº à 131 vº.
P. 20, l. 23: ses gens.--_Ms. B 6_: A che mandement vint l’archevesque
d’Iorch, l’archevesque de Cantorbie, l’evesque nouviaulx de Lincole,
l’evesque de Duram, qui nouvellement estoit revenu du siège de Calais.
Et amena chacun prelat tout che qu’il pot de gens d’armes et d’archiers
et de gens de piet. Là vint messire Edouart de Bailleul, le sire de
Montbray, le sire de Persy et le sire de Nuefville et pluiseurs aultres
chevaliers et esquiers, et tant qu’il furent douze cens à cheval et
cinq mille archiés et bien neuf mille hommes de piet. Fº 359.
P. 20, l. 24 à 26: li archevesques.... Lincolle.--_Ms. B 3_: les
evesques d’Iorc, de Durem et de Lincole. Fº 140.
P. 20, l. 25: d’Yorch.--_Mss. A 1 à 6_: de Diorth. Fº 157 vº.
P. 20, l. 30: gens.--_Mss. A 1 à 6, 11 à 29, B 3_: ès marches de north
et du pais de Northombrelande et de Galles qui marchissent assez près
de là. Fº 157 vº.
P. 21, l. 2: se prendoit.--_Mss. A 1 à 6, 11 à 14_: se penoit. Fº 140.
P. 21, l. 15 et 16: se rastinrent.--_Mss. A 15 à 17_: se abstindrent.
Fº 157.--_Mss. A 20 à 22_: se retindrent. Fº 225.--_Ms. B 3_: se
boutèrent. Fº 140.
P. 21, l. 31: hommes.--_Les mss. A 15 à 17 ajoutent_: tuffes,
grueliers, bomules, termulons et tacriers. Fº 157.
P. 22, l. 18: de Bailluel.--_Mss. A 20 à 22_: de Ros. Fº 225 vº.--_Les
mss. A 23 à 33 ajoutent_: le sire de Ros. Fº 174 vº.
P. 22, l. 20: li arcevesques.--_Mss. A 15 à 17_: monseigneur Guillaume
arcevesque.... Fº 157.
P. 23, l. 7: s’encontrèrent.--_Ms. B 6_: Les Escochois, qui estoient
sur les camps assés près des Englès, se ordonnèrent et se rengièrent
et firent quatre batailles: en chacune avoit six mille hommes. Et se
mirent tous à piet et leur chevaulx derrière yaulx. En la prumière
bataille estoit le sire de Douglas, en le seconde le conte de Moret,
le conte Patris, le conte de Mare; en le tierche, le conte d’Orkenay,
le conte de Rose; en la quatrième, le roy David d’Escoche, le conte
d’Astrederne, le conte de Fy, le conte de Boskem, le conte de Surlant,
l’evesque d’Abredane, l’evesque de Saint Andrieu, messire Robert de
Versy, messire Simon Fresiel. Et estoient ces deus chevaliers delés
le roy et à son frain. Et portoit à ce donc le souveraine banière du
roy Alixandre de Ramesay, ung très bon et vaillant homme d’armes. Et
vous dy que les Escochois estoient bien ordonnez et avoient mis devant
leur bataille che qu’il avoient d’archiers. Et, d’aultre part, les
Englès, qui n’estoient pas sy grant nombre, avoient ausy ordonné quatre
batailles, mis en chacune quinze cens archiés, trois cens homes d’armes
et deux mille pietons. Fºs 361 et 362.
P. 23, l. 8: l’autre.--_Ms. A 29_: à tirer ces saiettez, qui voloient
aussi espessement que neige.
P. 23, l. 10: able.--_Mss. A 7 à 19_: habilles. Fº 141.--_Mss. A 20 à
22_: habilliez legierement. Fº 225 vº.
P. 23, l. 21: donnoient.--_Les mss. A 11 à 14 ajoutent_: aux Godons dis
Anglois. Fº 150 vº.
P. 23, l. 21: horions.--_Ms. A 29_: si grands qu’ils pourfendoyent
testes et bacinets, et abatoyent bras et poings.
P. 23, l. 22: se prendoient.--_Mss. A 1 à 6, 11 à 14, 18 à 22_: se
penoient. Fº 158 vº.--_Mss. A 7 à 1O, B 3_: se prenoient. Fº 141
vº.--_Mss. A 15 à 17_: se prenoient près garde. Fº 157 vº.
P. 23, l. 30: de Fi.--_Mss. A 1 à 14, 18, 19, 23 à 29_: de Fii.--_Mss.
A 15 à 17_: de Fye. Fº 157 vº.--_Mss. A 20 à 22_: de Zii. Fº
226.--_Mss. A 30 à 33_: de Siz. Fº 193.
P. 23, l. 31: Boskem.--_Mss. A 23 à 29_: Oskem. Fº 175.--_Mss. A 30 à
33_: Oske. Fº 193.
P. 23, l. 32: Astrederne.--_Mss. A 18, 19, 23 à 33_: Astrederu. Fº 162
vº.
P. 24, l. 1: Thumas.--_Mss. A 20 à 22_: Guillame. Fº 226.
P. 24, l. 2: Fresiel.--_Mss. A 23 à 29_: Fresnel. Fº 162 vº.
P. 24, l. 6: navrés.--_Ms. B 6_: ou corps et ou chief, dont il y parut,
tant qu’il vesquy. Fº 363.
P. 24, l. 7 et 8: Copeland.--_Ms. B 6_: qui mist grant painne à le
garder, car les Englès le volloient tuer entre ses mains. Fº 363.
P. 24, l. 12: carge.--_Ms. B 6_: Et fist le roy David son prisonnier
monter sur ung pallefroy, et l’enmena secretement hors de l’armée. Et
puis chevauça fort et fist tant que il vint en ung sien castiel, que
on appelloit le Castiel Orguillous, quy siet sur la rivière de Tin, à
vingt cinq lieues du Neuf Castiel où la bataille avoit esté. Fº 364.
P. 24, l. 19: Archebaus.--_Mss. A 1 à 6, 11 à 14_: Dassambaut. Fº
158 vº.--_Mss. A 18, 19_: Arsambault, Fº 162 vº.--_Mss. A 20 à 22_:
Arquembault. Fº 226.--_Mss. A 23 à 29, 30 à 33_: Archembault. Fº 175.
P. 24, l. 20: Versi.--_Mss. A 20 à 22_: Persy. Fº 226.
P. 24, l. 20 et 21: d’Abredane.--_Mss. A 1 à 6_: de Bredant.--_Mss. A
20 à 29, B 3_: de Bredane.
P. 24, l. 26: six.--_Mss. A 20 à 22_: cinq. Fº 226.
P. 24, l. 26: le mardi.--_Mss. A 23 à 33_: le samedy. Fº 175.
§ =298=. P. 24, l. 28: Quant la royne.--_Ms. de Rome_: Qant la roine
d’Engleterre, qui se tenoit au Noef Chastiel, entendi que la journée
estoit pour li et pour ses gens, si en fu grandement resjoïe, et ce
fu raisons. Or vinrent ses gens, les uns apriès les aultres, ensi que
on se depart de tèles besongnes, le conte de Honstidonne, connestable
de l’oost, le signeur de Moutbrai, marescal, le signeur de Persi, le
signeur de Noefville, les prelas, les barons et les chevaliers. Et ensi
que il rentraient en la ville, la bonne roine lor estoit au devant, et
les requelloit doucement et liement, et les prioit et disoit: «Vous
venrés souper avoecques moi; vous l’avés bien gaegniet.» Chil signeur
li acordoient; et tant fu la bonne dame là sus son palefroi avoecques
ses damoiselles, que tout li signeur ou auques priès furent rentret.
Or avoit on dit à la roine que li rois d’Escoce estoit pris, si ques
la bonne dame demandoit: «Et qant verai je mon prisonnier, le roi
d’Escoce, et celi qui l’a pris aussi?» Qant elle vei que point ºn ne
l’amenoit, si dist as chevaliers qui estaient dalés li: «Et pourquoi
ne me amainne chils qui a pris le roi d’Escoce mon adversaire,
son prisonnier, et je le veroie jà moult volentiers.»--«Madame,
respondirent li chevalier, où que il soit, il est vostres et est bien:
n’en aies nulle soupeçon; espoir le vous amenra il jà au souper, pour
vous plus honnourer et conjoïr.» La roine s’apaisa tant et vint à son
hostel, et fu li soupers apparilliés très grans et très biaus. Et i
furent tout li chevalier, voires chil qui i vodrent estre; auquns en
i avoit des bleciés et des navrés et des lassés qui demorèrent à lors
hostels, pour euls aisier.
Qant la roine vei que Jehans de Qopelant n’amenoit point le roi
d’Escoce, si fu toute merancolieuse et se contenta mal de li. Mais
li chevalier le rapaisièrent et li dissent: «Madame, où que li rois
d’Escoce soit, c’est vostres prisonniers. Jehans en fera bonne garde.»
Ensi se passa la nuit. Qant ce vint à l’endemain, nouvelles vinrent à
la roine, car on en avoit fait bonne enqueste, que Jehans de Qopelant
en avoit menet le roi d’Escoce en un chastiel assés pourlic, et que
ce estoit se intension que là le tenroit il et garderoit, tant que li
rois d’Engleterre, ses sires, retourneroit au pais, et ne le deliveroit
à honme ne à fenme, fors au roi meismes ou à son conmant. La roine
d’Engleterre, pour savoir mieuls le intension de ce Jehan de Qopelant,
envoia le conte de Honstidonne et de ses chevaliers parler à lui.
Et cevauchièrent tant que il vinrent au chastiel où Jehans estoit,
et aussi li rois d’Escoce son prisonnier; et parlèrent à lui et li
remoustrèrent conment sa dame, la roine d’Engleterre, les envoioit là,
et li remoustrèrent tout au lonc, ensi que la matère requeroit.
Jehans de Qopelant ne fu pas esbahis de respondre et dist: «Mi chier
signeur, je congnois assés que ce que vous me remoustrés, vous le me
dittes pour mon bien, et le deveroie faire; mais dittes ensi à ma
très redoubtée dame, madame d’Engleterre, que mon prisonnier le roi
d’Escoce, je l’ai encores peu gardé; et qant la congnissance en sera
venue à mon très redoubté signeur, monsigneur le roi d’Engleterre, que
je l’aie assés gardé, et que je le rende et mette là où il l’en plaira
à ordonner, je le ferai, et non, de ma volenté oultre, se on ne le
m’esforce. Mais je prench si très grande plaisance à lui veoir que je
m’i consoole tous. Et m’est avis que j’en doi rendre trop grans graces
à Nostre Signeur, qant à moi qui sui uns povres bacelers, entre tant
de vaillans honmes, chevaliers et esquiers dou roiaulme d’Engleterre
qui ont esté à celle journée, Dieus le m’a envoiiet. Et m’est avis
que nuls n’en doit estre courouciés, ne n’en doit avoir envie. Et,
mi signeur, ensi que vous porés dire à madame la roine, j’en ferai
bonne garde et renderai bon compte; et de ce elle ne soit, ne nuls, en
doubte ne en soupeçon. Avoecques tout ce, il est bleciés et ne poroit
soufrir le cevauchier ne le cariier, ne prendre nul air. Et dient chil
qui l’ont en garde, tant que pour le medeciner et purgier dou mal dou
chief, il seront plus de trois mois, avant que il puisse issir de la
cambre. Et se il me moroit par ma coupe, otant que je sui resjoïs de sa
prise, seroi je courouchiés de sa mort, et à bonne cause. Et toutes
ces raisons que je vous remoustre en espice de bien, voelliés dire et
moustrer sus bonne fourme à madame la roine, et je vous en prie; car,
se vous ne fuissiés ichi venus, si euissé jou envoiié deviers li, ou
je i fuisse alés en prope personne pour moi escuser, car je me vodroie
acquiter deviers madame et deviers le roiaulme d’Engleterre, loiaument.
Et on n’a point veu le contraire en moi, ne ne vera on jà tant que
je vive, et Dieus, qui a bien conmenchiet, dont je l’en regratie, me
doinst tousjours bonne perseverance.»
«Ce face! Jehan,» ce respondi li contes de Honstidonne, qui avoit
proposé toutes les paroles: «Et je vous escuserai, dist li contes, tant
que madame et son consel se contenteront de vous, mais je vous pri,
se on puet veoir ce roi d’Escoce, que je le voie.»--«Oil,» respondi
Jehans de Qopelant. Il li fist veoir qant il fu heure, et le mena
dedens la cambre où il se gissoit sus une couce. Et parla li rois au
dit conte, et li contes à lui, et li dist que madame d’Engleterre
l’avoit là envoiiet, pour lui veoir et viseter. Li rois s’en contenta
et li dist: «Salués moi la roine d’Engleterre. Quoi que je me tiengne
ichi et en la garde de l’esquier qui m’a creanté, je me tieng à son
prisonnier.»--«Sire, dist li contes, pensés de vostre santé, et ne
vous merancoliiés point, tant que vous en valés mains; car tous jours
finerés vous bien. Et considerés le bon moiien que vous avés en vostre
querelle, c’est que madame la roine d’Escoce est serour germainne de
nostre signeur le roi d’Engleterre.» Donc respondi li rois d’Escoce et
dist: «Contes de Honstidonne, je vosisse bien aultrement se il deuist
estre, et tant que ma santé, j’en passerai; mais je vous pri: dites
à la roine qui chi vous envoie, que elle me face viseter par bons
fusesiiens et medecins, car, se je moroie an uit, les Escoçois feroient
demain un roi en Escoce.»