Meester:
Waer sidi, hoghe gheboren coninc
Van Damast [26], gheweldich [27] heer?
Mijn herte es mi van rouwen seer [28],
Van saken, die ic hebbe ghesien.
De coninc:
Platus meester, wat sal gescien,
Daer ghi aldus om tachter [29] sijt?
Meester:
Her coninc, te nacht, te metten tijt [30]
Was ic daer buten opdat velt.
Daer sach ic die locht alsoe ghestelt
Ende die planeten ant fiermament,
Dat in kerstenrijc [31] een kint
Gheboren es van hogher weerde,
Dat u sal doeden metten sweerde.
Her coninc here, ende nemen dlijf,
Ende u dochter sal sijn sijn wijf,
Ende kerstenheit sal si ontfaen [32].
De coninc:
Meester, nu doet mi verstaen,
Wanneer soe was dat kint gheboren?
Meester:
Te nacht, her coninc, als ghi mocht horen,
Soe wort [33] gheboren dat jonghelinc.
Syn vader es een hoghe coninc
Van Cecilien in kerstenlant.
De coninc:
Meester, nu so doet mi bekant,
Selen dese saken moeten sijn?
Meester:
Jaes, [34] her coninc, bi Apolijn! [35]
Ofte en doe [36] cracht van groter hoeden [37]
Maer wildi werken na den vroeden
Ic sal u enen raet visieren [38]
Hoe ende in wat manieren
Dat ghi selt bliven in uwen staet;
Want enen goeden scarpen raet
Waer hier goet toe gheoerdeneert. [39]
De coninc:
Ay, nu so benic ghescofeert! [40]
Van der saken, die ghi mi telt,
Es mijn herte alsoe ontstelt,
Dat ic mi niet gheraden en can; [41]
Maer ghi sijt soe wisen man,
Platus, meester, lieve vrient,
Ende hebdi mi langhe met trouwen ghedient,
Ende meneghen wisen raet ghegheven,
Dat ic in eren altoes ben bleven;
Nu biddic u, meester ghetrouwe ende goet,
Dat ghi al metter spoet
Wilt hulpen vinden enen raet.
So dat ic blive in minen staet
Ende van den jonghelinc onghequelt,
Daer ghi mi dus vele af telt,
Dat ic sijns mach wesen vri.
Meester:
Her coninc here, soe hoert na mi,
Edel baroen, edel wigant:
Ghi selt mi gheve alte hant [42]
Enen scat met mi te voeren,
Ende ic zal in corten uren
Daer waert riden onghespaert. [43]
Den jonghelinc van hogher aert
Sal ic ghecrighen [44] met miere [45] const.
Ik bidde Mamette [46] om sine onst, [47]
Dat icken [48] ghewinnen moet met eren;
Want nemmermeer en menic [49] te keren,
Ic salne [50] u bringhen in uwer ghewout. [51]
Daer omne seldi mi selver ende gout,
Her coninc, gheven in miere ghewelt. [52]
Ic salne stelen of copen om ghelt
Ofte ghecrighen met enegher list:
Aldus hebbic den raet gheghist, [53]
Dan sal hi u vri eighen [54] sijn,
Hi sal werden een goet payijn, [55]
Na onser wet selen wine [56] leren:
Aldus soe seldi bliven in eren,
Hi sal wenen, [57] dat ghi sijn vader sijt.
Nu lichtelijc, [58] het is meer dan tijt.
Ic wil gaen varen metter spoet.
Deconinc:
Platus meester, desen raet es goet.
Gaet henen ende haast u metter vaert,
Ic wille dat ghi niet en spaert. [59]
Nemt scats ghenoech in uwer ghewelt [60]
Metter ghisschen [61] onghetelt,
Ende brinct mi den jonghelinc:
Dies biddic u boven alle dinc,
Ende en spaert daer ane ghenen cost,
Want ic hebben soe groten lost, [62]
Dat ic den jonghelinc soude beschouwen.
Meester:
Her coninc here, in rechter trouwen!
Ic sal daer omme pinen dach ende nacht.